جمیعت علماء اسلام (فضل گروپ) دے سینیٹر خالد محمود نے 14 جولائی نوں نواز شریف ہوراں نوں آکھیا پئی اوہ معطل ججاں دی بحالی جیہے "نان ایشوز" نوں چُکنا بند کردین۔ دوجے سینیٹراں نے وی ایہو بولی بولی۔اوہناں دا خیال سی پئی حکومت ایس ویلے اِکو مسئلے نال نبڑ سکدی ہے ججاں دا مسئلہ اوہنوں دوجے اہم مسئلیاں توں پرانہہ کر رہیا اے۔
اجوکی حکومت 50 ڈویژن تے اوہناں نال جڑیاں ایجنسیاں نال کم کر رہی ہے۔ کابینہ دیاں بیٹھکاں وچ ہر ایجنڈے اُتے گل بات ہوندی ہے پر اوکھیاں ای کابینہ نے کسے اک مسئلے تے کوئی بیٹھک کیتی اے، بحث یاں فیصلہ نبیڑیا اے۔ ڈر اے پئی جیویں گنوار پُنے وچ حکومت کم کر رہی ہے اوہ ججاں دی بحالی پاروں پٹڑیوں لتھی لگدی ہے۔
ایہہ گل گوہ گوچری ہے پئی جج سرکار نوں پٹڑیوں نہیں لاہ رہے نیں۔ آصف زرداری دی ہدایتاں تے حکومت دا ججاں نوں بحال کرن دا کوئی ارادہ نہیں ہے۔ نواز شریف ہوراں دے لوک بیانات نال جاپدا اے پئی اوہ ایس معاملے وچ آصف زرداری دا چنگی طرحاں جانوں اے تے اوس نال راضی اے ۔
15 جولائی نوں لندن وچ اپنے حمایتاں نال خطاب کردیاں ہویاں نواز شریف نے دعویٰ کیتا پئی پاکستان نوں ترقی تے خوشحالی دے راہے پاون دا ایجنڈا اوہدے کول ہے جیس دے اہم پکھ ایہہ نیں 1 ۔ قنون دی حکمرانی 2۔ عدلیہ دی آزادی 3 ۔ معطل ججاں دی بحالی 4 ۔ آرمی دے حکومت وچ عمل دخل نوں ڈَکنا 5 ۔ پارلیمنٹ دی اُچیچتا 6- فارن ڈکیٹیشن نوں مُکانا 7 ۔ احتساب تے 8- مشرف خلاف غداری دا مقدمہ چلانا۔
آئینی بحران وارے صدر دے قومی اسمبلی نوں توڑن دے اختیار توں اڈ ،نواز شریف دِیاں ساریاں گلاں 1973 ء دے اصلی آئین دا پہلے اِی انگ نیں۔ سبھ توں پہلا کم تے ایس آئین دی بحالی ہونا چاہیدا اے۔ فیر ایہہ حقیقت وی ہے اج تیک آون والیاں ساریاں سَنے نواز شریف دی حکومتاں ایس آئین اُ تے دِلوں عمل نہیں کردیاں۔ ہرکوئی حیران ہووے گا جیکر نواز شریف اگلی واری وزیراعظم بن کے چنگا کم کرے۔
اوہدیاں نیک نیتاں ساریاں مُل جوگ ہین پر قوم تے واپرن والی قیامت پاروں ایس دی ایڈی کالھی وی نہیں اے۔ اسیں اوہ وی ویلا ہنڈا چُکے ہاں جدوں ساڈے کول کوئی آئین نہیں سی ہوندا تے اک ناں چاہیا آئین ساڈے تے مڑھ دِتا گیا سی۔ کیہہ نواز شریف ہوراں دا ایجنڈہ سانوں ترقی تے خوشحالی دے راہے پاسکدا ہے؟ کہن نوں تے کیہا جا سکدا ہے ہاں، مثال دے طور تے عدلیہ آزاد ہو جاندی ہے حکومتی افسر لوکائی اگے جوابدہ بن جاندے ہین تے اِنج آکھیا جا سکدا ہے کہ شہری رہتل دے کھیتر وچ اساں ترقی کیتی ہے پر ترقی دے ہور وی پکھ ہین جیہناں دا ایس ترقی نال کوئی سِدھا مِیل نہیں۔
ترقی ذہانت، تانگھ، کسے کم نوں پورا کرن دے اُدم نال جڑت ہے آرٹس سائنس وچ اُچیائی حاصل کرنا، ناپسندیدگی دی تھاں رواداری ایہہ سبھ نوں مِلا کے امن سکون ترقی دا ناں اے۔ آزاد عدلیہ بھانویں اک نیک عمل ہے پر ایہدا ایہناں گلاں وچ بھورا کُو اِی حصہ اے۔
خوشحال دا مطلب ایہی نہیں کہ لوکائی کول اپنی مُڈھلیاں لوڑاں پوریاں کرن واسطے اونی کُو رقم ہووے سگوں اوہ اپنی حیاتی نوں آرام دہ بنا سکن ، بچت ہووے تے وادھے دے پیسے کتھے ہور وی لا سکن۔ انج اودوں اِی ہوندا ہے جد زرعی پیداوار تے آمدن ودھدی ہے صنعت وچ کھلار تے ودھ نوکریاں نکلدیاں نیں۔ ایہہ ترقی اودوں تائیں نہیں حاصل ہوندی جدوں امن وامان خراب ہووے، ہر پاسے بے یقینی تے ڈر کھلریا ہووے یاں حکومت ڈانواں ڈول ہووے تے اوہدیاں پالیسیاں کچیاں ہون۔ پر ایہدے تے اثر حکومت کارندیاں دے احتساب یاں آزاد عدلیہ نال نہیں پیندا ۔ جیکر ایہناں ترقیاں دے دونہاں بَنیاں وچ کوئی سانگا ہووے تاں وی اوہ بوہت دور دراڈا ہووے گا۔
حیرانی جوگ گل اے پئی کھاڑکواں دا مُکاء تے امن وامان دی بحالی دا ایجنڈا نواز شریف ہوراں دے مُکھ نہیں ہے۔ انج تے نہیں اے پئی اوہ دماغی غیر حاضر ہون پاروں ایہناں نوں اکھون پروکھے کر رہیا اے۔ جیویں وی اے مُلک وچ پھیلی ہفڑا تفڑی تے کمزور ہوندیاں ریاستی نیہناں نوں بچاون واسطے ایہہ دونویں کم بوہت ضروری نیں۔ لوکاں تے اوہناں دی جائیداداں اُتے بغیر کسے فرق کیتے ننگی طاقت دی ورتوں، اغواء ، اغواء برائے تاوان، قتل تے ریاست پاکستان خلاف جنگ چھیڑ کے کھاڑکو لوکاں دے دِلاں وچ خوف بٹھا رہے نیں تے اِنج عام ویہار دی زندگی نوں روک لگ گئی ہے۔ اوہ ساڈی ریاست، سماج تے ادارے تے رہتل نوں تباہ کررہے نیں۔ ایہہ سبھ کجھ ضرور رُکنا چاہیدا اے۔
اُتھل پتھل توں وکھ نظریاتی طور تے پکے کیتے کھاڑ کواں پاروں لاء اینڈ آڈر بھج رہیا ہے جو کہ روایتی مجرماں دی لوڑ ہندی ہے۔ مجرماں دے سارے انگ جیویں چور، لٹیرے، اغواء برائے تاوان والے، زانی، قاتل تے سفید پوش جرماں والے بدعنوان ہنُ چوکھے ہوگئے نیں۔ اوہ وی لوکاں وِچکار ڈر تے غیر محفوظ ہوون دا وچار کھلار رہے نیں۔ اپریشن منحوس چکر وانگ لگ رہیا اے پئی جِناں قنون ٹُٹے گا اونے اِی قنون توڑن والے ودھن گے۔
ایہہ اوہ اوکڑاں ہین جیہناں توں کالھی وچ جان نہیں چھڑائی جا سکدی بھانویں کوئی وی حکومت کررہیا اے۔ کھان پین تے تیل دے مُل پاکستان امریکہ تے دوجیاں مُلکاں وچ ڈرامائی طور تے ودھ گئے نیں۔ اِسلام آباد وچ کوئی وی حکومت ایہناں نوں سال پہلے والی تھاں تے نہیں لیا سکدی۔ کوئی حکومت مُلکی معیشت نوں سٹیگفلیشن ( کساد بازاری تے رُوپیے دے کھلار) توں نہیں کڈھ سکدی۔ ایہہ اوہ حال جے جیہدے وچ امریکہ تے ہور دوجیاں معیشتاں پھسیاں ہوئیاں نیں۔ میں سُنیا اے انج ہور چھے مہینیاں تیک رہوے گا کوئی وی حکومت اوہناں دی مدد لئی ہتھ نہیں ودھاوے گی۔
جُرم نوں گھٹانا تے امن وامان بحال کرنا، اجوکے پربندھاں ہیٹھ کسے وی حکومت دی پہلی ترجیح ہونی چاہیدی اے۔ ایس معاملے نوں پہل دے کے میرٹ سِر کرن تے اوس واسطے ہر قسم دے وسیلے ورتن دی لوڑیندی ہے۔ ایہہ کم کرن لئی جیکر گیلانی ہوراں دی حکومت وچ آس تے مَت نہیں تاں اوہنوں کُرسی چھڈ دینی چاہیدی اے۔ عسکریت پسندی نوں جڑوں مُکاؤنا حقیقت وچ اوکھا کم اے پر ایہہ ناممکن وی نہیں جیس واسطے پکا یقین تے بھرویں طریقے ورت کے کامیابی حاصل کیتی جاسکدی ہے جو اجوکی حکومت کرنا نہیں چاہ رہی۔
