پچھلے ہفتے انٹرنیٹ بلاگرز نے شکاگو وچ اک کانفرنس کیتی جیس وچ ڈیموکریٹک پارٹی دے سارے امیدوار مباحثے لئی حاضر ہوئے۔ ایہو امیدوار فوکس ٹی وی دے مباحثے وچ رلتی ہونوں انکار کر چکے سن پر انٹرنیٹ بلاگرز دی اینی طاقت ودھ چکی ہے جو کوئی وی ڈیموکریٹک امیدوار اوہناں نوں نانہہ کرن دی جرأت نہیں کرسکیا۔ ایہہ بلاگرز امریکہ وچ کارپوریٹ میڈیا دا توڑ پیش کر رہے ہین۔ پاکستان وچ حالی تے نہ اینے بوہتے بلاگرز ہین تے نہ ہی اوہناں دی کوئی طاقت بنی ہے پر ویلا لنگھن دے نال نال پاکستان دا حکمران پوش وی انٹرنیٹ تے خبراں تے خیالاں دا پرچار کرن والیاں نوں اکھوں پروکھے نہیں کر پاوے گا۔ایہہ تھوڑے چر دی گل ہے۔
ایس کانفرنس وچ پندراں ہزار بلاگرز نے حصہ لیا۔ کانفرنس دا ناں وی اک بلاگر کاس دے ناں تے رکھیا گیا سی کیوں جو اوہناں نے ہی ایہہ تحریک شروع کیتی سی۔ جدوں عراق جنگ توں مگروں کاپوریٹ میڈیا بش دے گن گا رہیا سی تے کِتوں کوئی حق دی آواز نہیں آرہی سی تے ڈیمو کریٹک پارٹی دے جواناں نے انٹرنیٹ تے روزانہ اخبار تے وچار دا سلسلہ شروع کر دتا۔ اوہناں دی پہنچ بوہت ساری لوکائی تیکر ہوون لگی۔ انج انٹرنیٹ تے اطلاعواں اپڑاون والیاں نوں بلاگرز آکھیا جاون لگا۔ پڑھن والیاں نوں چیتا ہووے گا جو اہناں بلاگرز نے ہارورڈ ڈین نوں صفر توں چک کے اسمان تیکر اپڑا دتا سی۔ ایس سال وی براک اوبامہ دے سخر تے اپڑن وچ بلاگرز دا بوہت ہتھ ہے۔
کیوں جو بلاگر اک وڈا کارکن وی ہے تے کئی امیدواراں لئی چندہ وی جمع کردا ہے ایس لئی صدارتی امیدواراں نوں اکھوں پروکھے کیویں کردے۔سگوں ڈیموکریٹک پارٹی دے صدارتی امیدوار بلاگرز دے ساہمنے بوہتی کھلی ڈلہی گل کر رہے سن۔ جدوں کسے امیدوار نے کوئی غلط گل کیتی تے ایہدے تے اوہدی واہوا ہوٹنگ وی کیتی گئی۔
مثال دے طور تے ہلری کلنٹن نوں پچھیا گیا جو اوہ لابئیسٹاں توں اینیاں وڈیاں رقماں کیوں لے رہیاں ہین۔ ایہدے جواب وچ ہلری کلنٹن نے کہیا لابئیسٹ وی ملک دے شہری ہین تے کئی واری عام لوکاں دے فیدیاں لئی جدوجہد کر رہے ہوندے ہین۔ جیویں کہ نرساں دی ستھ دی لابی ہے۔ ایس تے بلاگرز نے اوہناں نوں بڑا ہوٹ کیتا۔ ایس دے برخلاف جان ایڈورڈ نے کہیا امریکی حکومت دا پوری طرحاں اورہال ہوون والا ہے تے رہندے امیدواراں دے ایہہ وقتی نسخے کم نہیں آون گے تے اوہناں نوں بوہت سلاہیا گیا۔
بلاگرز امریکہ دی سیاست وچ مڈھلا کردار ادا کر رہے ہین۔ اوہ انج دیاں خبراں تے وچار وی لوکاں تیکر اپڑا دیندے ہین جیہڑے کہ منجدھار دا میڈیا رد کر چکیا ہوندا ہے۔ اوہ کئی سیاسی مسئلیاں دے حل لئی تحریکاں وی چلا سکدے ہین۔ انج دے وسیلے نال ترقی پسند سیاسی طاقتاں نوں واہوا لابھ ہویا ہے۔
ایس ویلے دنیا دا بوہتا میڈیا وڈیاں وڈیاں کارپوریشناں دے ہتھاں وچ جا چکیا ہے۔ صرف روپرٹ مرڈاک امریکہ، برطانیہ تے آسٹریلیا وچ اک سو ستر اخباراں رسالیاں، ٹی وی چینلاں تے انٹرنیٹ سائٹاں دے مالک ہین۔ حالیں اوہناں نے وال سٹریٹ جنرل نوں کئی بلین ڈالراں نال خریدیا ہے۔ فوکس ٹی وی چینل تے نیو یارک پوسٹ پہلوں ہی اوہناں دی ملکیت وچ ہین۔ ایس لئی لوکائی نوں جیہڑی انفارمیشن ملدی ہے اوہ روپرٹ مرڈاک دے تعصباں نال بھری ہوندی ہے۔
روپرٹ مر ڈاک نے اپنے سارے میڈیا وسیلیاں نوں عراق وچ جنگ کروان لئی ورتیا۔ اہناں دا اثر اینا ہے جو برطانوی وزیر اعظم ٹونی بلیئر نے عراق جنگ وچ رلن توں پہلوں چار وار روپرٹ مرڈاک نوں فون کیتا۔ اوہناں نوں ٹونی بلیئر دی کابینہ دا چویہواں ممبر سمجھیا جاندا سی۔ لہندے میڈیا وچ کیوں جو امیراں دی جاگیر ہے ایس لئی اوہنے وی عراق دی جنگ دا پرچار کیتا۔ لوکائی نوں صحیح اطلاعواں دیون والا کوئی نہیں سی۔ ایس لئی جمہوری معاشرے دیاں جڑاں ہل کے رہ گئیاں کیوں جو جے لوکائی نوں حقائق دا ہی پتہ نہ ہووے تے اوہ صحیح جمہوری فیصلے کیویں کرسکدے ہین۔ ایس گھٹی ہوئی فضا وچ بلاگرز تازہ ہوا دا بُلا ثابت ہوئے۔ تے اج اوہ جمہوری وسیب دیاں نینہاں نوں پکیرا کرن لئی مڈھلا کم کررہے ہین۔
پاکستانی میڈیا وی امریکی میڈیا توں اڈ نہیں ہے۔ اخباراں ،رسالیاں، ٹی وی چینلاں تے ریڈیو سٹیشناں تے کجھ ٹبراں مل ماری ہوئی ہے۔ ایہدا مطلب ہے جو کجھ بندے پوری قوم دا ایجنڈا متھ سکدے ہین۔ حکومت اہناں گنتی دے بندیاں نوں سوکھیاں ہی قابو کر سکدی ہے۔ ایس لئی پوری قوم کجھ بندیاں دے ہتھ وس وچ ہے۔ تے کیوں جو ایہہ بندے بوہت امیر ہین ایس لئی اوہناں دا ایجنڈا وی امیراں لئی ہی ہووے گا، ایہدے وچ غریب نوں پچھن والا کوئی نہیں ہووے گا۔
حالی تیکر تے پاکستانی میڈیا وچ بڑی مقابلے بازی چل رہی ہے تے خبراں تے وچار تے خیال وچ رنگا رنگی ہے پر ویلا لنگھن دے نال بس تن چار ٹبر ایس کاروبار تے قبضہ کرن گے۔ ایس ویلے اطلاعواں مالکاں دی چھاننی وچوں ہو کے لوکاں تیکر اپڑن گئیاں تے غیر جانبدار اطلاعواں نوں کوئی نہیں پچھے گا۔
پاکستان وچ انٹرنیٹ بلاگرز تے آزاد نیوز تے ویوز دے بوہت گھٹ وسیلے ہین۔ دبی ہوئی زباناں جیویں پنجابی وچ اخبار تے وچار دا انٹرنیٹ پورٹل وچارڈاٹ کام ہے۔ انج نیو جرسی توں اک انٹرنیٹ پورٹل دیس پردیس ہے۔ پر ویلے دے نال نال اوہ ودھن گے تے امریکی بلاگرز وانگوں پاکستانی وی اپنے حکمراناں نوں متاثر کر سکن گے۔
