پاکستان وچ بس ہن مشرف سرکار دا مقطع یاں ناں والا مصرعہ ہی چل رہیا ہے۔ دل کا جانا ٹھہر گیا صبح گیا کہ شام گیا اوہی گل '' آمریت آوندی گھوڑے دی رفتار نال ہے تے جاندی جوں دی تورے ہے۔ اخیر ایہہ ڈرامہ کیہہ ہے ؟ اک پاکستانی نے مینوں جیکسن ہائیٹس دے فٹ پاتھ تے پچھیا تے پھیرآپوں کہیا مشرف توں تے صدر ایوب چنگے سن گھٹو گھٹ عزت نال گھر تے ٹر گئے سن۔ کل میرے اک بیلی نے اپنے کسے فوجی افسر بیلی دے حوالے نال کہیا فوج نے تے مشرف نوں استعفیٰ دے کے جاون دا کہہ دتا ہے پر اوہ من نہیں رہے تے کہندے ہین میں کمانڈو واں مقابلہ کراں گا۔
جدوں شہنشاہ ایران محمد رضا پہلوی ایران وچ عوامی غصے وچ ملک چھڈ کے جا رہے سن تے ائیر پورٹ تے اک فوجی جنرل اوہناں دی جتی چمن لگ پیا سی تے شہنشاہ نے اوہنوں کہیا سی '' ہن ایہدی لوڑ نہیں۔ مشرف لئی ہن تے انج دے حالات پیدا نہیں ہوئے پر پاکستان دی فوج اپنے ایس گذریل چیف نوں کوئی عبرت دا نشان بنیا نہیں ویکھنا چاہندی۔
پاکستان دے حکمراناں دیاں حکومتاں دے جدوں چھیکڑلے دن آوندے ہین تے اوہ کئی سالاں تیکر ایدھی سنٹر کھارادر وچ عبدالستار ایدھی دا رخ ضرور کردے ہین۔ذوالفقار علی بھٹو نے وی ایہو کہیا سی تے جام صادق علی نے وی۔ ہن بلال مشرف نوں وی اوتھے گھلیا گیا۔ بینظیردور وچ تے بہادر ریٹائرڈ جنرل اوہناں نوں وزیر اعظم بناونا چاہندے سن پرایدھی وی کمال کردے ہین۔ اوہ کہندے نیں ملک لئی مارشل لاء ضروری ہے۔ ساڈی سول سوسائٹی دے اینے وڈے بندے دی وچار ویکھو آمریت پسند ہے۔ مشرف دے رہ جاون دی صورت وچ کہندے ہین فوجی جنرل پارلیمان دے سارے ایواناں وچ '' نمبر گیم '' اوہناں دے حق وچ کرنا چاہندے ہین تے پھیر حامد ناصر چٹھہ تے مخدوم امین فہیم نوں ایس قوم دا حامی تے ناصر بناونا چاہندے ہین۔ فوجی نہیں چاہندے اوہناں دے گذریل چیف دا مواخذہ ' بلڈی سیویلین '' کریں۔ بھاویں پاکستانی فوج تے اوہدی آئی ایس آئی دا بھانڈا سڑک دے وچ بھج گیا ہووے جو اوہناں دے طالبان یاں شدت پسنداں نال پرانے سانگیاں دا پتہ ہن امریکہ سنے سارے عالم وچ لگ گیا ہے۔ ایہہ واقعی کیہڑے دوہواں ملکاں وچکار سانگیاں دی بحالی تے سفارتی تے فوجی تاریخ دا مخول ہے جو پچھلے چھیاں سالاں وچ باراں بلین ڈالر دی امداد دے مگروں وی امریکہ نال ڈبل گیم کھیڈی جارہی سی۔ یعنی وردی تے پاکستانی فوج دی سی دل طالبان نال ملے ہوئے ہین ہن فوج صرف اک بندے نوں ہی قربانی دا بکرا بناونا چاہندی ہووے تے ہور گل ہے پر کوئلے دے ایس کاروبار وچ ہتھ تے مونہہ سارے جرنیلاں تے سارے اداریاں دے کالے ہو چکے ہین جیویں ضیاء نے افغانستان وچ روسی مداخلت وچکار کیتا سی۔
ایس واری تے پاکستانی حکمران امریکہ وچ سچی مچی دے کوئلے دا کاروبار کرن آئے سن۔ سندھ دا کوئلہ وفاقی کنٹرول وچ کر کے اوہدے خریدار تے سرمایا کار امریکہ وچ لبھن آئے سن۔ نال اوہ وزیر اعلیٰ قائم علی شاہ وی آیا جیہدی حکومت اُکا خیر پور میرس تیکر ہی ہے۔ '' سندھ دا وزیر اعلیٰ کون ہے ؟ قائم علی شاہ، ایم کیو ایم والے ذوالفقار مرزا یاں فریال تالپور؟
جیویں صدر بش نے وزیر اعظم یوسف رضا گیلانی نوں پچھیا جو آئی ایس آئی دا اصلی کنٹرول کیہدے ہتھ وچ ہے ؟ ملک تے مصیبتاں آئیاں ہوئیاں تے اسیں آں کہ وزیر اعظم دی انگریزی ٹھیک کرن تے تلے ہوئے آں۔ سرائیکی بولی تے سبھاء رکھن والے وزیر اعظم کاش اپنے دورے وچ سرائیکی وچ ہی کم چلاوندے۔ جدوں بھٹو ورگا وزیر اعظم پھانسی دے تختے دی راہ تے وی پاکستان دی سپریم کورٹ وچ سرائیکی دا شعر '' درداں دی ماری دلڑی علیل اے '' کہہ سکدا سی تے یوسف رضا گیلانی وی وائٹ ہاؤس دے روز گارڈن یاں کاؤنسل آن فارن ریلیشنز واشنگٹن وچ سرائیکی بول کے تاریخ وچ کوئی اپنے لئی حاشیہ ہی بنا جاندے۔ شخصے موجب اسیں کوکا کولونائیزڈ لوک آں۔ بھٹوواں نوں لوکاں دے ووٹ دیون دا اک وڈا کارن اوہناں دا سوہنا ہوونا تے فر فر انگریزی بولنا وی سی۔
وزیر اعظم گیلانی دے دورے وچکار اوہناں دی ملنی کوکا کولا دے مالک نال وی ہوئی اوہ پکی گل ہے پاکستان وچ کوکا ڈیموکریسی دی خبر لیائے ہوون گے۔
ہاں تے جدوں وزیر اعظم محمد خان جونیجو نوں سندھ وچ ہوٹلاں تے ٹیلی ویژن سیٹاں تے لوک انگریزی بولدیاں ویکھدے تے ٹھنڈا ہوکا بھر کے کہندے '' بھٹو بڑی بلاں سی۔ بینظیر نوں انگریزی بولدا ویکھ کے کسان کہندے '' انگریزی انج بول رہی ہے جیویں ٹوکہ چلدا ہووے۔
وزیر اعظم دا دورہ کامیاب ایس لئی وی گیا جو تسیں ویکھیا فوج صدر جنرل مشرف دے خلاف مواخذے دا اعلان آصف علی زرداری تے نواز شریف نے بڑے ہی اعتماد تے اتحاد نال کیتا ہویا ہے۔ ظاہر ہے جے اوہناں نوں امریکہ دی ہلاشیری نہ سہی پر گھٹوگھٹ مشرف دے مواخذے وچ امریکہ دے ' نیوٹرل' رہن دا یقین ضرور ہے۔ اُنج وی امریکہ ہن سیاسی حکومت تے قیادت نال اپنے معاملے کرنا چاہندا ہے۔ ہن اوہ فون نمبر بھروسے والا نہیں رہیا جیس کلے نمبر تے تکیہ کیتاجاندا سی۔امریکہ وچ صدارتی الیکشنز سر تے ہین تے امریکی لوک پچھدے ہین جو عراق توں بوہتا امریکی خون تے پسینہ افغانستان تے وہایا گیا ہے جیس نال بوہت سارے مقصد بوہت گھٹ نکلے۔ اک برطانوی جریدے نے لکھیا سوال ایہہ ہے جو مشرف جیہڑے ہن پاکستانی فوج لئی اک اثاثے توں ودھ اک ہرجانہ بن گئے ہین نوں کدوں قربانی دا بکرا بنایا جاوے گا؟
انج وی نہیں جو جنرل پرویز مشرف دے خلاف مواخذے دی تحریک کامیاب ہوون دی صورت وچ پاکستان وچ ددھ تے شہد دیاں نہراں وگن گئیاں۔ پاکستان وچ سیاسی طوائف الملوکی ہن ہے تے پھیر وی طوائف الملوکی ہی رہوے گی۔ سوال ایہہ ہے جو فوجی جرنیلاں نے وی پورے ملک نوں جنرل رانی بنایا ہویا ہے ایہدے مگروں وی جنرل رانی ہی بنائے رکھن گے؟
ساری گیم وچ آصف زرداری ایس میلے باز جواری وانگوں لگ رہے ہین جیہڑا میلے گھمن دے چاہ وچ تمبو لئے پر اینے پیسے، گھڑی تے کیہہ اپنی جتی تے واپسی دا کرایہ وی داء تے رکھ لیندا ہے۔
