پاکستان دے بھکھ مردیاں لئی بھیک منگن والے عبدالستار ایدھی نال ایس بیان نوں جوڑ دتا گیا ہے جو ایس ویلے پرویز مشرف، آصف زرداری تے نواز شریف پاکستان دے فیدیاں نوں اگے ودھاون دی بجائے اپنی ذات دے دوالے گھم رہے ہین۔
تسی چاہو تے ایس بیان توں مگروں ایدھی نوں ایہہ کہہ کے دھتکار سکدے او جو اوئے بڈھیا تنوں کیہہ پتہ سیاست دی الف ب۔ تو صرف لنگر ونڈھ، کھلاں کٹھیاں کر، پوستیاں دا علاج کر، پھٹڑاں لئی ایمبولینس نسا، لوتھاں چک تے لاوارث نیانیاں دی ویکھ بھال کر تے اللہ اللہ کر۔۔۔۔
یاں تسیں چاہو تے ایدھی دے اہناں دوہواں جملیاں دے آئینے وچ اپنے سیاسی مونہہ دیاں جھریاں وی گن سکدے او۔ مثال دے طور تے ایس ویلے پرویز مشرف دا ' سب توں پہلے پاکستان دا نعرہ عملاََ سب توں پہلاں میں وچ بدلیا گیا ہے۔ اوہ اپنی بقا تے پاکستان دی سلامتی نوں وکھرے وکھرے خانیاں وچ ویکھن تے ظاہر وچ مجبور نظر آرہے ہین۔ پر ایہدے وچ اوہناں دا وی کیہہ قصور؟
اک انج دا بندہ جنہوں نو ورہے اوہدے چمچیاں نے دن رات بس ایہہ پک کروایا جو حضور تسیں ہی اوہ گاں او جنہے دنیا دا بھار اپنے سینگاں تے چکیا ہے۔ تے ایہہ سنگ تھوڑا جیا وی ہلے تے سارا کجھ برباد ہو جاوے گا۔ ہن ایہو چمچے ایس مقدس گاں توں آس لائی بیٹھے ہین جو اوہ اگلے کجھ گھنٹیاں وچ اپنا ذہن بدل لوے۔ چابیاں نویں مینیجر دے حوالے کرے تے ٹیکسی منگوا کے پچھلے بوہے وچوں نکل جاوے۔۔۔۔
ایدھی دے بیان دے دوجے کردار آصف زرداری نوں لے لوو جنہاں دی زبان تے مواخذے دا لفظ اُس دن توں مگروں چڑھیا جدوں این آر او ہیٹھ اوہ اخیرلے مقدمے توں وی بری ہو گئے۔ ایہدے مگروں اوہناں نے این آر او دے ہی کاغذ نوں پرت کے پرویز مشرف دے خلاف چارج شیٹ لکھوان لئی ورت لیا۔
جتھوں تیکر ایدھی دے بیان دے تیجے کردار میاں نواز شریف دا سوال ہے تے اوہناں دا مسئلہ ظاہر وچ مواخذے توں ودھ ذاتی اہنوں برابر کرنا لگ رہیا ہے۔ ایس لئی نواز شریف نوں ججاں دی بحالی دی منگ نوں وی اگے پاون وچ کوئی ہرکھ نہیں ہویا۔ نواز شریف تے اوہناں دے سنگیاں دے اہناں بیاناں دے پچھے جذبے تے غور کیتا جاوے تے ایہہ گل ڈُلھ ڈُلھ باہر آرہی ہے کہ اودوں تیکر کلیجہ ٹھنڈا نہیں ہووے گا جدوں تیکر صدر نوں فلم مولا جٹ دا نوری نتھ نہ بنا دتا جاوے۔ صدر نوں اسمبلی توں بکتر بند گڈی وچ بہا کے اٹک دے قلعے وچ کھڑیا جاوے تے اوہناں تے انج دی دفعہ لگے جیس دی سزا موت ہووے تے پھیر اہنوں معافی وچ بدل کے اوہناں نوں جہاز وچ سوار کرایا جاوے تے ایہدے مگروں اوہناں دی جائیداد ضبط کر لئی جاوے۔ بھاویں ایہدے نتیجے وچ اک ہور باراں اکتوبر ہی کیوں نہ ہو جاوے۔
یعنی تنے بندے نعرہ تے پاکستان تے جمہوریت بچاء دا لا رہے ہین پر ہر اک اپنا اپنا پاکستان اپنی ذات دے آئینے توں باہر وی نہیں ویکھنا چاہندا۔
اہناں حالاں وچ پاکستان نوں اک نہیں سگوں دو مواخذیاں دا ساہمنا ہے۔ اک مواخذے لئی تے پارلیمنٹ وچ کٹہرا تیار ہورہیا ہے۔ تے اک کٹہرا پارلیمنٹ توں باہر تیار ہے جیس وچ آپوں پاکستان نوں کھلیارن دی کوشش زوراں تے ہے تے ایس مواخذے دے نکات امریکہ، افغانستان، کشمیر دے حالات، معیشت ریاستی رٹ دے پچھے پئے ادارے تے طالبان اکو واری کر رہے ہین۔
بچت دا اک ہی راہ ہے جو اہناں دوہواں وچوں اک مواخذہ چھیتی توں چھیتی کامیاب ہووے تے اک ناکام۔۔۔۔ دوجی صورت وچ ایہو ہووے گا نا کہ عبدالستار ایدھی دے رضا کاراں دا کم کجھ ہور ودھ جاوے گا۔
