پرویز مشرف اک فوجی آمر سی۔ ہندوستان وچ اوہنوں کارگل جنگ دا رچنہار سمجھیا جاندا اے۔ اِنج گذریل وزیراعظم اٹل بہاری واجپائی وَلوں اوس نوں جولائی 2001 ء آگرہ سمجھوتے تے سَدن ویلے خوف سی۔
پر دورے دا مُڈھ اِی پھِکا پے گیا جدوں مشرف نے دِلی وچ ہائی کمشنر دے گھر تے وکھیواں پسند حریت آگوواں نوں چاء واسطے سَدیا تے دو گذریل ہندوستانی وزیراعظماں نوں باہر بٹھائی رکھیا۔ آگرے وچ ایہہ گل نتر کے ساہمنے آگئی سی پئی مشرف دے دماغ وچ بھورا کُو گلاں ہین۔
ہندوستان نال کوئی وی سمجھوتہ صرف اک تے اِکو اِی گل تے ہووے گا۔۔۔۔۔۔۔۔۔کشمیر۔ ہندوستان نوں اپنی پہلی لوڑیندی نوں پچھاننا ہووے فیر کوئی حل لبھ سکدا اے۔ اِنج دیاں گلاں کردا سی۔ جدوں ہندوستان ات گردی دی گل کردا، مشرف آکھدا ایہہ کیہ اے؟ اوہ شملہ سمجھوتے تے اعلان لہور دی توہین کردا سی تے ہندوستان نوں گھُوریاں وَٹدا سی۔
پاکستانی آگوواں نال گل بات کرن والے ہندوستانی بیوروکریٹس نوں چھیتی اِی خیال آگیا پئی مشرف اوہناں نے زبردست چال چل رہیا اے۔ اوہ امن واسطے دِلوں چاہیوند نہیں سی سگوں اوہ ہندوستان نوں کشمیر تے بلڈوز کرناچاہوندا سی۔ اِنج کوئی مشرف دی تعریف نہیں کردا سی۔ ایویں اِی سولاں جولائی دی سویرے مشرف نے ہندوستانی ایڈیٹرز دے جتھے نوں سَدیا اوہنے ہس کے کشمیری اُتھل پتھل نوں " مقامی آزادی دی جدوجہد" کیہا ، ہور آکھیا پئی جیکر ہندوستان بنگلہ دیش نوں "آزاد" کروا سکدا اے تاں پاکستان نے وی ایہو کشمیر واسطے کارگل وِچ کیتا۔ ایہہ ویڈیو باہر نکل گئی تے ٹی وی تے چل گئی جو دورے نوں مُکاون دا اخیر بنی۔
مشرف واجپائی کول گیا اوہدا خیال سی پئی اوہ سدھا بندہ اے۔ پر اوڑک واجپائی تے سیکورٹی تے کابینہ پرھیا دے ممبراں نے اکٹھیاں ہوکے مشرف نوں جاون دا آکھ دِتا۔
مشرف خالی ہتھیں صرف تاج محل تے اپنی سوانی صہبا نال فوٹو کھِچوا کے پرت گیا جو اوہنوں یاد دیواندی رہوے گی۔ اِسلام آباد پرتن مگروں مشرف نے واجپائی حکومت تے " کٹڑ پُنے" دا اِلزام لایا پر اصل حقیقت ایہہ سی پئی اوہ بدلہ لین گیا پر ہار کے پرتیا۔
