مینوں چیف جسٹس چوہدری افتخار نال کوئی خاص ہمدردی نہیں، نہ اوہناں نوں میری ہمدردی دی لوڑ ہے تے نہ ہی میری ہمدردی اوہناں دا کوئی بھلا کر سکدی ہے۔ پر جد میں تاریخی عمل وچ پچھلے دو سال دی سیاسی لہر نوں ویکھنا تے مینوں لگدا ہے جو جیہڑا وی چوہدری افتخار نال لڑن دی کوشش کرے گا یاں اوہناں نوں عدالتوں باہر رکھن دی کوشش کرے گا اپنے آپ نوں تباہ کر لوے گا۔ جیہڑی پارٹی اوہناں نال جنگ کرے گی مُک جاوے گی۔ ایس دی وجہ ایہہ ہے جو تسیں بندے نال لڑ سکدے ہو، مِتھ (خیالی ہیرو) نال نہیں لڑ سکدے۔ بھٹو وی اک اجیہی مِتھ سی اوس نال تے اوس دی قبر نال لڑدے لڑدے لوک آپ مر کھپ گئے پر بھٹو اوتھے دا اوتھے ہی رہیا۔
صدر مشرف تے نوں سالاں سگوں تریہہ سالاں توں چلدے نظام نوں اوس ویلے اصلی للکر پئی جد چیف جسٹس چوہدری نے شہنشاہ مشرف دے سامنے نانہہ کہی۔ اوس توں اگے جو کجھ ہوئیا اوہ پڑھن ہاراں نوں پتہ ہے۔ اسیں صرف ایہہ کہواں گے جو افتخار چوہدری دے تاریخی جلوساں توں پہلے اٹھاراں سالاں وچ نہ بینظیر بھٹو تے نہ ہی نواز شریف لوکاں نوں ہلا سکے۔ کنے ہی لانگ مارچاں دی کال بینظیر نے دتی تے کنی واری نواز شریف نے بڑھک ماری پر جد جد لانگ مارچ دا دن آوندا سی معاملہ ٹھس ہو جاندا سی۔ جماعت اسلامی وی کوئی ڈھنگ دا جلوس اہناں سالاں وچ نہ کڈھ سکی۔
ایسے لئی بینظیر تے نواز شریف باہر بہہ کے سیاست تے بیان بیازی کردے سن کدی جلوس دی کال نہیں سن دیندے۔ ملک وچ بے آسی تے نمرتا ودھ رہی سی تے سیاسی حلقیاں نوں لگدا سی جو ایہہ حال کدی نہیں بدلن گے۔ تبدیلی دی آس کرن والے وی امریکہ دے ترلے کر رہے سن جو مشرف نوں رسا پاوے پر امریکی مشرف بارے کسے دی اک نہیں سن سنندے۔ ایس لئی سب نوں پتہ سی سیاسی پارٹیاں کھسی ہو چکیاں ہین تے ایہہ کجھ نہیں کر سکدیاں۔ایہہ انی سو ستاٹھ ورگا سماں سی جد ایوب خان ٹھسے نال تخت تے بیٹھا ہویا سی۔
پر جد چوہدری افتخار جی ٹی روڈ تے نکلیا تے سماں انج ہی بدلیا جیویں بھٹو دے نکلن نال بدلیا سی۔ شہر شہر اک نویں آس اک نویں لہر جم پئی۔ ایس نے سیاسی پارٹیاں دے ورکراں نوں وی جگایا تے اوہناں نوں وی میدان وچ لا کھڑا کیتا۔ ایہہ گل درست ہے جو سیاسی پارٹیاں عدلیہ دی لہر نوں چکیا پر سیاسی پارٹیاں نوں وی عدلیہ نے ہلونیا تے جگایا سی۔ ایس عمل وچ افتخار چوہدری متھ بن گئے تے مشرف تے اوہناں دے نظام دی اک لت ٹٹ گئی۔ جے اوہ شیر سن تے اوہ پھٹڑ ہوگئے تے جے اوہ شیر دی وردی پاکے ڈراون والے بہروپئے گدڑ سن تے اوہناں دی وردی لتھی شروع ہو گئی۔
ایہہ اوہ ویلا سی جد امریکہ تے مشرف دے حامیاں دے کن کھڑے ہو گئے۔ اوہناں نوں پتہ لگ گیا جو اوہناں دے شیر دے رنگ لتھ رہے نیں تے چھیتی اوہ چٹا کاغذ ہو جاون گے (کاغذی شیر)۔ اوہناں نوں ڈر پے گیا جو عوام دی تحریک کتے سب برج ہی نہ الٹا دیوے۔ ایس لئی اوہناں سوچیا جو شیر دی مرہم پٹی کرکے اوس نوں کھڑا کیتا جاوے۔ تے مرہم پٹی سی بینظیر بھٹو جیس نال ایس توں پہلاں اوہ گل کرن دے وی روادار نہیں سن۔
بینظیر بھٹو نوں چوہدری افتخار دی لہر نوں ٹھلن لئی تے مشرف نوں ٹھمنا دین لئی پاکستان گھلیا گیا سی۔ پر بینظیر وی مرہم دی تھاں اوہناں دے شیر دے زخماں تے ویلے کویلے لون دھوڑن لگ پئی۔ اوس نوں وی پتہ لگ گیا سی جو چوہدری افتخار دی مِتھ نال رلن دی تھاں اوس تے مل مار لئی جاوے۔ ایسے لئی اوس نے چیف جسٹس دے گھر اگے جا کے نعرہ ماریا جو ''اوہناں دے چیف جسٹس افتخار چوہدری ہی ہین'' تے شاید ایس لئی اوہناں نوں اپنی جان دینی پئی۔
نواز شریف دے بوہے وی کھل گئے تے اوہ ڈگدے ڈھیندے پاکستان اُپڑ گئے۔ اوہناں مڈھلی سیانف ایہہ کیتی جو افتخار چوہدری دی متھ دے ہتھ بیعت کر لئی تے پھیر اوس دا کھٹیا کھاہدا۔ پر پیپلز پارٹی نوں ہوش نہ آئی اوہ اپنیاں کھیڈاں وچ رُجھی رہی تے پنجاب دا بہتا حصہ نواز شریف کولوں کھواہ کے ویہلی ہو گئی۔ اوسدی دی ایدھروں اودھروں پھڑ کے اکثریت تے ہو گئی پر اوہ اپنی بنیاد، وچلا پنجاب کھواہ گئی۔
چار مہینیاں وچ جو کجھ ہوئیا اوہ وی سب دے سامنے ہے۔ اک مہینہ پہلاں کسے نوں ایہہ پتہ سی جو مشرف انج چلا جاوے گا؟ پر اوہ کڈھ دتا گیا۔ تاریخ ان ڈٹھیاں دے بھید کھول رہی ہے۔ ایسے طرحاں زرداری نوں نہیں پتہ جو تاریخ نے اوہناں تے اوہناں دی پارٹی لئی کیہہ لکھیا ہوئیا ہے۔ پر سانوں ایہہ پتہ ہے جو جے اوہناں افتخار چوہدری دی مِتھ نال لڑن دی کوشش کیتی تے اوہناں دا حشر مشرف نالوں وکھ نہیں ہونا۔ امریکہ نہ مشرف نوں بچا سکیا سی تے نہ ہی زرداری نوں بچا سکے گا۔ اوہناں نوں ایہہ بھلیکھا دل وچوں کڈھ دینا چاہیدا ہے۔
پر جد کسے اک بندے کول زرداری جنی طاقت آجاوے اوس نوں تاریخ دا لکھیا دسدا نہیں۔ اوہ سمجھدا ہے اوہ تاریخ بنا رہیا ہے۔ ایہو بھلیکھا بھٹو نوں پے گیا سی تے ایہو بھلیکھا اوہناں دی جان لے گیا سی۔ زرداری ایہہ گل سمجھ لین تے چنگا ہے پر اینی طاقت والے بندے کدی سمجھے نہیں۔
