پاکستان وچ جیہڑا حشر جنرل پرویز مشرف دا ہویا اوہی پاکستان دا حال پیکنگ اولمپکس وچ ہویا۔ یعنی ' بڑے بے آبرو ہو کر تیرے کوچے سے ہم نکلے' ۔ ہور ایہہ کہ پیکنگ اولمپکس وچ پاکستان دیاں ٹیماں دا اوہی حال سی جیہڑا پاکستان دا سٹھاں سالاں توں ہے۔
انج دے مشاہدے نال میرے اندر اچوائی ہوون لگدی ہے تے میرا دل انوکھی قسم دے انڈکس بناون نوں چاہندا ہے جیویں کہ میری چاہ سی جو پاکستان وچ ودھدیاں ہوئیاں خود کشیاں تے سٹاک مارکیٹ دیاں بلندیاں دا اک سانجھا چارٹ بنایا جاوے۔ ہن میرا دل چاہندا ہے جو پاکستان دے شماریات دے ماہر تے کھیڈاں دے شیدائی اک انج دا انڈکس بناون جیس وچ اولمپکس دے تمغے تے صنعتی ترقی دا آپو وچ ڈوہنگا سانگا وکھایا جاوے کیوں جو تمغے صرف صنعت وچ ترقی یافتہ ملکاں دے حصے وچ ہی آوندے ہین۔
اولمپکس وچ چین تمغے جتن والیاں وچ تھوڑا جیا امریکہ توں پچھے ہے۔ کنا سوہنا اتفاق ہے جو چین صنعتی پیداوار وچ وی امریکہ توں صرف اک فیصد پچھے ہے؟ اگلے سال صنعتی ترقی وچ چین امریکہ نوں پچھے چھڈ جاوے گا تے کیہہ ایس گل تے کسے نوں حیرانی ہووے گی جو اگلی لندن وچ ہوون والی اولمپکس وچ چین تمغے جتن وچ وی پہلے نمبر تے ہووے گا۔
انج روس تے یورپی ملکاں نے وی بوہت سارے تمغے جتے ہین۔ دوہزار پنج وچ پورے یورپ دی کل آبادی ست سو اٹھائی ملین بندیاں دی سی جیہڑی کہ ہندوستان توں بوہت گھٹ ہے تے پاکستان توں صرف پنج گناودھ ہے۔ پرہندوستان نے صرف اک تے پاکستان نے کوئی تمغہ نہیں جتیا۔
ایہدے خلاف دلیل دتی جاسکدی ہے جے انج ہے تے پھیر افریقی ملکاں دے کھڈاری کیویں نکیاں وڈیاں دوڑاں جت لیندے ہین۔ اوہ انج دے دوجے مقابلیاں وچ وی تمغے جت دے رہے ہین جیویں افریقی نسل دے جمیکا دے کھڈاریاں دو تن تمغے جتے ہین۔ اوہناں ولوں ایہو کہیا جاسکدا ہے جو افریقی نسل دے لوکاں وچ کجھ مخصوص جسمانی طاقت ہے۔ اوہناں دیاں لتاں اوہناں نوں دوجیاں دے مقابلے وچ تیز دوڑا سکدیاں ہین کوریاواں ولوں کیہہ آکھیا جاوے جنہاں نوں برصغیر دے لوک مدرے تے لسے سمجھدے ہین پر تمغے جتن وچ شمالی تے جنوبی کوریا دے کھڈاری وی جسمانی طور تے صحت مند یورپی ملکاں توں کسے طرحاں پچھے نہیں رہے ہین۔
میری بوہت ہی عام تے سادہ جئی دلیل تے تنقید کرن والے کہن گے روسی تے صنعتی میدان وچ بوہت ترقی یافتہ نہیں ہین تے پھیر وی اوہ اینے تمغے کیوں جت لیندے ہین۔ انج مشرقی یورپی ملک کیویں اولمپکس وچ اپنا ناں اُچا کر لیندے ہین؟ ایتھوں تیکر کہ وسط ایشیا دے ملکاں نے وی برصغیر توں چنگی کارکردگی وکھائی ہے۔
سانوں ایہہ نہیں بھلنا چاہی دا جو روس ٹیکنالوجی وچ بوہت ترقی یافتہ ملک ہے۔ روسی امریکہ دے ہتھیاراں دی ٹیکنالوجی وچ بروبر دا مقابلہ کر رہے سن۔ اوہناں دی ناکامی اوہناں دے مخصوص معاشی ڈھانچے دا تت سی۔ اوہ ہر صنعتی شے بنا سکدے سن تے بنا رہے سن پر ایس وچ منڈی والی دلکشی نہیں پیدا کرسکدے سن۔ ایہو اوہناں دی ناکامی سی۔
ہور ایہہ کہ ایہہ وی تاریخی حقیقت ہے جو سوویت یونین وچ شہریاں دی صحت تے بوہت خرچا کیتا جاندا سی۔ رہندے سوشلسٹ ملکاں وانگوں روس وچ وی تعلیم تے دوجیاں سوکھتاں مفت سی۔ ایہو کارن ہے جو ہر سوشلسٹ ملک وچ سو فیصد لوک پڑھے لکھے ہوندے ہین تے اوہناں نوں مڈھلیاں سوکھتاں ملدیاں ہین۔ ایس دا فیض مشرقی یورپ تے وسط ایشیا دے ملکاں تیکر وی اپڑیا۔ ایہہ اک وکھری بحث ہے جو سویت نظام سیاسی تے سماجی گھٹن دا شکار ہے۔
ظاہر وچ ایہہ لگدا ہے جو برصغیر دیاں قوماں نے نہ ہی صنعتی بنیاداں مضبوط کیتیاں ہین تے نہ ہی نواں کلچر اپنایا ہے۔ اوہ اپنے شہریاں نوں مڈھلیاں سوکھتاں وی نہیں دے سکے۔ ہندوستان دا ابھردی ہوئی معاشی طاقت دے طور تے بوہت رولا پایا گیا پر اولمپکس وچ اوہدا پول کھل گیا ہے۔ عالمی کھیڈاں وچ بوہت بھیڑی کارکردگی نال ایہہ ثابت ہوگیا ہے جو ہندوستان دی معاشی ترقی مخصوص علاقیاں تے صنعتاں تیکر محدود ہے۔ اوہ عالمی میدان وچ کِتے وی کھلوتا نظر نہیں آوندا۔سگوں ایہہ کہنا وی بجا ہووے گا جو ایس وچ سوشلسٹ تے سرمایا داری نظام وانگوں ہر طرحاں دی برائی موجود ہے تے دوہواں نظاماں وچوں کسے اک دی وی خوبی موجود نہیں ہے۔
پاکستان دا حال ہندوستان توں وی بھیڑا ہے۔ پاکستان حالی تیکر جاگیرداری ڈھانچے وچ پھسیا ہویا ہے یاں گھٹو گھٹ ملک وچ جاگیرداری کلچر دی پکڑ بوہت مضبوط ہے۔ کجھ ننگیاں بانہواں والیاں کڑیاں دے ٹی وی تے بل بورڈاں تے آون نال کلچر نہیں بدل جاندا۔ حقیقت ایہہ ہے جو اشراقیہ نے اپنی لوکائی نوں پچھے سٹیاہویا ہے تے ساری ملکی دولت اپنے لئی سمیٹ کے رکھی لئی ہے۔
ایس توں وکھ ملک وچ طوائف الملوکی دا سماں ہے، کسے تھاں وی حکومت دی رٹ موجود نہیں ہے۔ بے گھر لوکاں دے نال نال قبضے گروپاں نے سرکاری زمیناں تے قبضہ کیتا ہویا ہے۔ نیانیاں دے شوقیہ تے پیشہ ور بنن دے چاہوند کھڈاریاں لئی کوئی تھاں ویہلی نہیں ہے اوہناں کول تے افریقہ دے صحرا تے جنگل وی نہیں جیس وچ اوہ دوڑ دی مشق کر سکن۔ ایس پچھوکڑ وچ ویکھیے تے پاکستان دا اولمپکس وچ ویہلے ہتھ رہنا کوئی حیرانی والی گل نہیں ہے۔
