صدر جنرل پرویز مشرف دا استعفیٰ بھاویں جمہوری طاقتاں دی فتح ہے پر نال نال اک نویں امتحان دا دور وی شروع ہو گیا ہے تے ہن جمہوری طاقتاں نوں ایہہ ثابت کرنا پوے گا جو اوہ آمرانہ نظام توں چنگا ملکی نظام چلا سکدے ہین۔ ساری دنیا وچ تے جمہوری طاقتاں نے آمراں نالوں چنگے ملک چلائے ہین ہن پاکستانی سیاست داناں نے تے اُچیچا نواز شریف تے آصف زرداری نے ایہہ ثابت کرنا ہے جو اوہ وی ساری دنیا دے سیاست داناں وانگوں اینے ہی سیانے ہی جو اپنے اپنے پاڑاں تے تحفظاں نوں دل وچ رکھدیاں ہوئیاں فیدے دے معاملیاں تے قوم نوں اگے ودھاون گے تے پاڑ والے معاملے میز تے بیہہ کے طے کرن گے۔
صدر مشرف دے استعفے دی خبر جیو ٹی وی تے نیویارک وچ ویکھی تے سنی۔ نیو یارک وچ فتح دے جشن وی ویکھے۔ تاریخی نقظے نظر نال ایتھے ایس گل ضرور ریکارڈ تے لیاونا چاہناں' پاکستان وچ جمہوریت دی بحالی دی تحریک دا مڈھ نیو یارک دے سیاسی کارکناں نے رکھیا سی۔ نیو یارک وچ پیپلز پارٹی تے مسلم لیگ نون دے سیاسی کارکناں نے ہی رل کے جلسے جلوس کڈھنے شروع کیتے سن۔ پاکستان وچ اُس ویلے سیاسی حبس سی جدوں ایتھوں دیاں آزاد فضاواں وچ ایہہ جتن شروع ہوئے سن۔ پاکستان دے سیاسی منظر نامے دے وڈے وڈے ڈرامائی منظراں وچ کل نوں خورے کسے نوں نیو یارک دے سیاسی کارکناں دی جدوجہد چیتے وی نہ ہووے پر پہلا پتھر ایتھوں ہی ماریا گیا سی تے ایسے سنگ باری نے اخیر جنرل مشرف دے اقتدار چھڈن دی راہ پدھری کیتی۔ جمہوری طاقتاں دی پاکستان وچ فتح لئی اوورسیز پاکستانیاں دی ملک لئی محبت تے ہر تھاں جمہوریت لئی آواز چکن نوں وی اہم حیثیت رہی ہے۔
جمہوری طاقتاں لئی سب توں وڈا تے پہلا امتحان عدلیہ دی بحالی ہے عدلیہ دی بحالی کنج تے کیویں ہووے۔ آئینی پیکیج آئے یاں ایگریکٹو آرڈر آئے ایہہ گل ایکے نال طے ہونی چاہی دی ہے تے ایس تے کالھی نال عمل ہوونا چاہی دا معاملیاں نوں اگے پاون نال کجھ حاصل نہیں ہووے گا تے اُکا راہ کھوٹا ہووے گا۔ میری ایس حوالے نال صلاح ایہو ہے جو عدلیہ دی بحالی لئی حکومت تے سیاسی اگوائی، وکیلاں دی قیادت، ججاں دے نال نیو کنٹریکٹ تے سدھے ساہویں مذاکرات کرے تے ایس گل نوں یقینی بنایا جاوے جو ججاں دی بحالی دے مگروں حکومت تے عدلیہ وچ جھیڑے روکن لئی کیہہ کیہہ کیتا جاسکدا ہے۔پکیاں خبراں نیں جو عدلیہ دی بحالی دے حوالے نال پیپلز پارٹی جسٹس افتخار محمد چودھری توں وکھ سارے ججاں نوں بحال کرنا چاہندی ہے۔ پیپلز پارٹی نے اپنی اتحادی جماعت نوں ایہہ صلاح دتی ہے جو اوہ جسٹس ڈوگر نوں وی چیف جسٹس دے عہدے توں ہٹاون لئی تیار ہین تے ایہہ وی کہ جسٹس افتخار دے مگروں پی سی او ہیٹھ حلف نہ چکن والے سینئر جج جسٹس سردار رضا نوں چیف جسٹس بناون تے تیار ہین۔ پیپلز پارٹی دی صلاح ایہہ ہے جو افتخار چودھری تے جسٹس ڈوگر رضا کارانہ طور تے ایس دوڑ وچوں نکل جاون تے انج پرانی تے نویں عدلیہ دا اک نواں ڈھانچہ بنایا جاوے پیپلز پارٹی دی چاہ ایہہ وی ہے جو جسٹس رمدے نوں وی پھیر حلف نہ دیون کیوں جو اوہناں دے خیال وچ اوہ وی پھڈے والے جج ہین، دوجے پاسے مسلم لیگ نون وکیلاں دی تحریک دی ایس منگ توں پچھے ہٹن لئی تیار نہیں ہین جو جسٹس افتخار چودھری سنے سارے جج بحال ہوون۔ آصف زرداری دی سجی بانہہ ڈاکٹر سومرو نے پچھلے دناں وچ ایہہ گل کھولی سی جو اتحادی قیادت وچ ایس گل تے پہلوں توں ایکا ہے جو جسٹس افتخار چودھری توں سوا سارے جج بحال ہوون گے۔ مسلم لیگ نون حالی تیکر اپنی گل تے اڑی ہوئی ہے۔ پر اک گل بہر حال طے ہے جو ملک نوں چلاون لئی دوہواں پاسیوں لچک دا وکھالا ہوونا چاہی دا جے دوہویں اڑیاں رہیاں تے ہنے ہی جمہوری اتحاد ٹٹ جاوے گا۔
آون والے دناں وچ کجھ دن ملک لئی بڑے اہم ہین۔ عدلیہ دے مستقبل تے نویں صدر دے چون دے حوالے نال وڈے فیصلے ہوونے ہین۔ پاکستانی قوم دی چاہ ہے جو پاکستان اگوائی ایس امتحان توں کامیاب ہو کے نکلے تے انج دے فیصلے ہوون جنہاں نال ملک وچ خوشحالی آوے، جمہوری نظام مضبوط ہووے تے پاکستان اِکیویں صدی دیاں منگاں موجب ہووے۔ ہن ویلا آگیا ہے جو جمہوری اگوائی فیصلے کرے جے ہن انج نہ ہویا تے پاکستان وچ لوک جمہوریت توں بے امید ہوون گے تے انج دے ڈوہنگے پرچھاویں چھا جاون گے جیہڑے چھیتی نہیں ہٹ سکن گے۔
