پاکستان دے ٹن پاٹ ڈکٹیٹر جنرل پرویز مشرف دا تاریخ نے اوہی حال کیتا ہے جیہڑا شہنشاہ ایران رضا شاہ پہلوی ، نکاراگوا دے سموز تے ویتنام دے لی ٹک تھودا کیتا سی۔ جنرل پرویز مشرف اکتوبر اُنی سو نڑینوے وچ نواز شریف دی جمہوری حکومت دا اک فوجی بغاوت راہیں تختہ الٹن دے اک سال مگروں جدوں ستمبر دوہزار وچ اقوام متحدہ وچ جنرل اسمبلی دے سالانہ اجلاس وچ رلت کرن آئے سن تے جنرل اسمبلی وچ رلتی ساری دنیا دے ملکی پردھاناں دے گروپ فوٹو سیشن وچ اوہ کیوبا دے فیڈل کاسٹرو تے زمبابوے دے رابرٹ موگابے توں وی پچھلی قطار وچ کھلوتے سن ۔ کوئی امریکی آگو اوہناں نال ہتھ ملاون لئی شاذو نادر ہی تیار نظر آوندا سی۔
جنرل مشرف افغانستان توں روسی فوج دے کڈھن تے سرد جنگ دے مُکا توں مگروں پاکستان دا اُنی سو نوے دی دہائی دا اک فوجی ڈکٹیٹر سی جنہوں میرے سنگی تے ناول لکھن والے محمد حنیف نے گارڈن ویرائٹی ڈکٹیٹر کہیا ہے پر امریکہ دے پاکستانی فوج نوں خبردار کرن دے مگروںوی جنرل مشرف نواز شریف حکومت دے خلاف فوجی بغاوت لے آئے سن تے انج کہندے ہین جو پاکستان دی تاریخ وچ پہلی فوجی بغاوت سی جیہڑی امریکہ تے لہندے دی حمیت توں بغیر ہوئی سی۔
جنرل مشرف دی فوجی بغاوت نوں امریکی تے لہندے دے میڈیا نے بڑا بھیڑا جانیا لک نال پستول بنھ کے تے بلھاں دی نکر نال دنداں وچ لئے سگریٹ ایہہ سی' ڈکٹیٹر مشرف دا مغرب وچ تصور۔
پر پاکستان وچ ممی ڈیڈی کلاس ٹائپ سول سوسائٹی بھاویں غریب لوکائی نے جنرل مشرف دے نواز شریف دے خلاف ملٹری بغاوت نوں بڑا سلاہیا سی ممی ڈیڈی کلاس ٹائپ سول سوسائٹی پاکستان تے پاکستان توں باہر اک لت تے کھلو کے نچ دی ہوندی سی۔ اوہ کہندے دو دو پیکینیز کتے اپنیاں دوہواں کچھاں وچ لے کے فوٹو کھچوان تے اسکاچ وہسکی دے شوقین جنرل پرویز مشرف اک انقلاب لیائے ہین کسے نے اوہناں نوں ترکی دے کمال اتاترک نال تے کسے نے اک انقلاب نال۔ پر اوہناں نوں جانن والے ایہہ وی بھل گئے جو خاندانی طور تے وہابی مسلک دے نیڑے تے پاکستان دے دکھنی علاقیاں وچ اقلیتی شیعہ فرقے دے لوکاں دے خلاف ملٹری آپریشن دے حکم دیون والے جنرل مشرف روشن خیالی نال فلرٹ کر رہے سن پھیر ستمبر گیاراں دو ہزار اک وچ جدوں امریکہ تے ات واد دے دھاڑے ہوئے تے اوہدے خلاف امریکہ تے لہندے دی ات واد دے خلاف جنگ وچ صدر مشرف اوہناں دے اک اہم اتحادی تے زبردست حمیتی دے طور تے ساہمنے اُگڑ کے آئے حالانکہ ایس توں پہلوں تے جنرل مشرف امریکہ دی اسامہ بن لادن نوں امریکہ دے حوالے کرن دی منگ تے اوہناں توں ثبوت منگ دے رہے سن۔
باراں ستمبر دو ہزار اک نوں وی امریکہ دا دورہ کرن والے آئی ایس آئی دے اودوں دے پردھان جنرل محمود احمد پینٹا گون وچ امریکی عملداراں نوں ملا عمر دی '' شرافت'' یاں چالیاں دے سرٹیفیکٹ ویچن دی اودوں تیکر کوشش کر رہے سن جدوں تیکر امریکی عملداراں نے اوہناں نوں جھاڑاں نہ پا دتیاں۔ افواہواں تے ایہہ وی ہین جو امریکہ وچ گیاراں ستمبر دے دھاڑیاں وچ جے پاکستان دی آئی ایس آئی دا ہتھ نہیں وی سی تے پھیر وی آئی ایس آئی داکسے نہ کسے طرحاں اہناں ویلیاں وچ گیاراں ستمبر دے دھاڑیاں وچ رلتی بندیاں دی کنڈھ تے ہتھ ضرور رہیا ہووے گا۔
مشرف اُس پاکستانی ڈکٹیٹر توں اُکا اڈ نہیں سی جیہدے خلاف لوک پاکستان وچ نعرے مار دے ہوندے سن '' امریکہ نے کتا پالا جنرل ضیاء وردی والا '' پر اوہناں نے اک ہور طرحاں دا نقاب چڑھایا ہویا سی۔ جنرل ضیاء اسٹائل اسلام دے الٹ اینلائٹنڈ ماڈریشن یاں اعتدال پسند روشن خیالی دا نقاب۔ ایہہ مسلمان فوجی ڈکٹیٹر جنوبی ایشیا دا حسنی مبارک تے نہ بن سکیا پر کیمپ ڈیوڈ وچ صدر بش نے اوہنوں بڑا سلاہیا کجھ لوک اوہناں نوں اپنے سیاسی تے ذاتی مخالفاں توں بدلے لین دے حوالے نال جنوبی ایشیا دا صدام حسین وی کہندے ہین۔ بڈھے قوم پرست آگو نواب اکبر بگٹی دے مگروں ہن بینظیر بھٹو دے قتل وچ وی پرویز مشرف دا ہتھ دسیا جارہیا ہے۔
مشرف دی اعتدال پسند روشن خیالی دا بھانڈا اودوں بھجن لگا سی جدوں اوہناں نے اپنے اقتدار نوں مضبوط کرن لئی دو ہزار دو دیاں چوناں وچ انتہا پسند ٹولیاں تے مذہبی سیاسی جماعتاں دے اتحاد نوں چوناں توں پہلوں دھاندلیاں راہیں ( مدرسیاں دیاں سنداں نوں گریجویشن یاں بی اے دے بروبر مننا) چنوایا۔ ایم ایم اے دے ایس اتحاد جنہوں اوہناں دے مخالف ملا ملٹری الائنس ہی کہندے ہین سرحد تے بلوچستان وچ حکومتاں دے بنن وچ آئی ایس آئی دی مدد دا مقصد لبرل پختون تے بلوچ قوم پرست پارٹیاں نوں پرے رکھنا سی۔
ایم ایم اے دی حکومت دے دناں وچ صوبہ سرحد وچ طالبان دے خلاف آپریشنز دی بجائے اوہناں نال صلح ناویں سائن کیتے گئے جیہدے نال سرحد پار امریکہ تے نیٹو فوجاں نوں بھاری جانی نقصان چکنا پئے۔ ایہو اوہ موڑ سی جتھوں امریکہ نے مشرف دی صاف نیت تے ارادیاں نوں پرکھنا شروع کیتا ۔
امریکہ توں بھاری فوجی تے غیر فوجی امداد تے ذاتی تے سیاسی حمیت دے مگروں وی مشرف پاکستانی فوج تے آئی ایس آئی دے وچ طالبان تے القاعدہ لئی ہمدردیاں رکھن والیاں دا نیٹ ورک نہیں توڑ سکے۔
حالیں وزیر اعظم یوسف رضا گیلانی دے امریکی دورے دے موقعے تے اخبار نیو یارک ٹائمز وچ آئی ایس آئی دے وچ طالبان تے شدت پسنداں دے نال رابطیاں دیاں تفصیلاں چھپن تے وزیر اعظم دے وفد وچ اک ہل چل جئی مچ گئی سی۔ افغانستان وچ اتحادی کمانڈراں، بینظیر بھٹو تے اوہناں دے سنگیاں یالا بسٹاں تے پینٹا گون دیاں خبردار کرن دیاں بھرویاں کوششاں دے مگروں وائٹ ہاوس راضی نظر آیا کہ مشرف صرف ڈبل رول تے ڈبل گیم ہی نہیں سی کر رہیا سگوں پاکستان وچ سیاسی لیڈر شپ تے حکومتاں ات واد نال بوہتے چنگے طریقے نال نبڑ سکدیاں ہین۔ ایہو کارن ہے جو مشرف پاکستان تے امریکہ وچ اپنی سیاسی حمیت ولوں ہتھ دھو بیٹھے تے ایہہ وی امریکہ نے محسوس کیتا جو پچھلے سٹھاں سالاں وچ پاکستان وچ فوجی ڈکٹیٹراں دی حمیت دی بجائے پاکستانی لوکائی نال سنگت امریکی پالیسی ہوونی چاہی دی سی۔ مینوں حکومت دا تے نہیں پر امریکی لوکاں دا ضرور پتہ ہے جو اوہ دوستی وچ خورے دنیا وچ نمبر ون لوک ہین۔ مشرف نے اپنی سنگت وچ امریکی لوکائی نال کھیڈ کھیڈیا۔ عظیم سندھی شاعر شاہ لطیف بھٹائی نے سسی دے روپ وچ کہیا سی۔
کدی تے میں ایہو جئی سی کہ پنوں میرے کپڑے دھوندا سی تے ہن ایہو جئی ہاں کہ جت ( اوٹھ والے) وی اپنے نال نہیں کھڑدے کدی اوہ مشرف سن کہ جنہاں دی کتاب دی پبلسٹی صدر بش نے وائٹ ہاؤس وچ کیتی سی ہن اوہی مشرف ہین جنہاں دا فون سنن دی صلاح صدر بش نوں اوہناں دے وائٹ ہاؤس دے مشیراں نے دتی ہوئی ہے۔
