پرانے ویلے وچ جدوں مزدور لیڈر توں انتظامیہ تنگ ہوندی سی تے اُس نوں افسراں دے گریڈ وچ ترقی دے دتی جاندی سی۔ جے مزدور لیڈر ایہہ گل سن لیندا تاں انتظامیہ وی خُوش ہو جاندی اتے لیڈر دی موجاں وی ہو جاندیاں۔ ایس نوں آکھدے نیں نہ سَپ مرے نہ سوٹی ٹُٹے۔ مفاہمتاں دی سیاست کھوبے وچ ہے۔
نواز شریف آپوں تے چپ نیں پر اوہناں دے ہرکارے بڑھکاں مار رہے نیں۔ صدارتاں دے مسئلہ تے وی اتے وڈے جج دی بحالی تے وی۔ ویکھو ایہہ جھیڑا کس بنے لاوندا ہے ملکی سیاستاں نوں۔ ویسے جے بہتی سیانپ وکھائی جاوے تے سودا ایہہ وی ماڑا نہیں کہ میاں ہوری مرکز وچ قائد حزب اختلاف بن جاون اتے قاسم ضیا پنجاب وچ حزب اختلاف دی قیادتاں سنبھال لے۔ نالے 88 دے برخلاف ایہہ طے کر لین کہ تسیں سانوں پنجاب وچ نہ چھیڑو اسی تہانوں مرکز وچ کم کرن دواں گے۔ ایس طرحاں مفاہمت وی جاری رہے گی اتے ججاں دے مسئلہ تے اپنا اپنا موقف وی برقرار رہے گا۔ پَر جہناں مرکز دیاں وزارتاں سنبھالنیاں نیں انہاں دا کانڈھ بچہ کوہلو ہو جاسی۔
ن لیگ دے ایم این اے بنن والیاں نوں ایس وچ کجھ نہیں لبھے گا پر شہباز شریف نوں ضرور فیدے نیں۔ جے ایہہ گل وارا نہیں کھاندی تاں وڈے جج صاحب نوں پروموٹ کر دیو اتے 58 ٹو۔بی سنے سبھے اختیار وزیراعظم نوں واپس موڑ دیو۔ پر ایس وچ ڈر ایہہ ہے کہ کِتے گیلانی ہوری سچی مچی دے وزیراعظم نہ سمجھن لگ پین اپنے آپ نوں۔ ایس دا توڑ وی ہے کہ فیر پی پی پی دی سنٹرل کمیٹی نوں تگڑا کرو اتے اداریاں دی مضبوطی نوں ٹیچا متھو۔ پر شائد حالے پاکستان وچ اجہیا ویلا نہیں آیا۔
بس ایہو گلاں اَج کل اسلام آباد دے ڈرائنگ روماں توں لے کے لہور دے چاء دے کھوکھیاں تیک ہو رہیاں نیں۔ الطاف بھائی وَلّوں زرداری جی نوں صدارت دا آکھنا تے سمجھ آوندا ہے کیونجے اوہ تے ہمیشہ توں ظل الٰہی تے چیخے رہے نیں اتے ہن وی ایہو آساں لائی بیٹھے نیں۔ زرداری جی نیں جے صدارتی محل نوں تگڑا کرنا ہے تاں اوہ صدر بن جاون اتے جے اوہناں دا ارادہ پارلیمنٹ نوں اس دے کھوئے ہوئے حق دوانے نیں تے فیر رفیق تارڑ بنن دا کیہہ فیدہ۔
زنانی نوں صدر پاکستان بناونا وی چنگی سوچ ہے۔ آپاں تے آکھدے ہاں آئین وچ ترمیم کر چھڈو کہ صدر پاکستان یاں تے زنانی ہو سکدی ہے یا فیر اقلیتاں دا نمائندہ۔ جھنڈے وچ موجود چٹے رنگ دی کجھ تے لاج رکھنی چاہیدی ہے۔ کجھ آکھدے نیں کہ فیصلہ دو پٹھاناں تے چھڈ دتا گیا ہے، رب خیر کرے! ویسے فضل الرحمن پٹھان نیں، ایس بارے کجھ بہتا پتہ نہیں۔ سنیا ہے مفتی ہوری تے گھر وچ پنجابی سرائیکی ہی بولدے سن۔
فیر جے پرویز مشرف نے الطاف بھائی نوں خُوش کیتی رکھیا سی تے آصف + نواز اسفند یار نوں خُوش رکھن۔ پر مولانا دا جواب نہیں، اوہناں نوں تے پہلی سرکار نیں وی سر متھے بٹھایا سی اتے جمہوری سرکار وی اوہناں نوں وڈیاندی ہے۔ ایہہ مولانا دی سمجھداری ہے یا پاک افغان جھیڑیاں دی دین، ایس بارے مورخ تے گل چھڈنے آں۔ پر کھوجی آکھدا ہے کہ جے مسئلہ حل کرنا ہے تاں دو وڈے ٹی وی چینلاں دے انقلابی اینکراں وچوں اک نوں چیف جسٹس بنا دیو اتے دوجے نوں صدر پاکستان، فیر ویکھو کہ تہاڈی مخالفت کرن والا کوئی نہ رہ سی۔ سبھے اخبار، چینل، ریڈوے اتحادی جمہوری حکومت دی حمد و ثنا وچ مست ہو جاون گے۔
