مشرف دا استعفیٰ: کئی مہینیاں توں جاری ڈرامے دا ڈراپ سین
احمد وقاص ریاض
August 22nd, 2008
صدر پرویز مشرف دے استعفیٰ دیندیاں ہی ڈرامے دا ڈراپ سین ہو گیا جو پچھلے کئی مہینیاں تیکر جاری سی۔ استعفے دا اعلان ہوندیاں ہی ملک وچ ہر پاسے خوشی دی لہر دوڑ گئی تے لوکاں نے اک دوجے نوں ودھائیاں دینا شروع کر دتیاں۔ صدر جنرل پرویز مشرف نے صدر دی پکھ توں اپنی چھیکڑلی تقریر وچ وی ہمیش وانگوں اپنے دور حکومت دے کارنامے گنواندیاں ہوئیاں اجوکے حکمران جُٹ دی بڑی نکھیدی کیتی۔ گذریل صدر نے اپنی صدارت دے دور وچ ملک وچ ہوون والی معاشی ترقی دا ذکر کردیاں ہوئیاں کہیا جدوں توں اجوکی جمہوری حکومت آئی ہے ساڈی کریڈٹ ریٹنگ گھٹ گئی ہے، زرمبادلہ دے ذخیرے مکدے جا رہے ہین، پاکستانی روپئے دی قدر گھٹ ہوئی ہے، سٹاک مارکیٹ انڈیکس ڈگ گیا ہے تے سرمایے دی باہرلے ملک منتقلی وچ کالھی آئی ہے۔ ایہدے توں وکھ صدر مشرف نے بجلی دے بحران، مہنگائی، امن امان دی بھیڑی حالت تے معاشی وخت دا ذمے وار وی اجوکی حکومت نوں آکھ دتا۔
صدر پرویز مشرف نے اپنی تقریر وچ جو کجھ کہیا اوہنوں حقیقت پسندی نال ویکھیا جاوے تے اوہناں دے سارے الزام جھوٹھاں دی پنڈھ لگدی ہے۔ پاکستان تے باہرلے ملک رہن والے سیانے پاکستانیاں نوں ایس گل دا چنگی طرحاں پتہ ہے جو صدر مشرف نے پاکستان دے آئین نوں رولیا، اپنے اقتدار نوں مضبوط کرن لئی چیف جسٹس آف پاکستان سنے وڈی عدالت دے ججاں نوں اوہناں دے گھر دیاں سنے پھڑ کے اوہناں دے گھراں تے قید کیتا تے پھیر اوہناں لئی آواز چکن تے وکیلاں تے میڈیا دے لوکاں نوں مارا ماری دا نشانہ بنایا۔
اپنی ریٹائرمنٹ دے مگروں وی وردی نہ لاہون والے جنرل مشرف نوں ملک دی لوکائی، فوج، سیاست داناں تے باہرلے ملکاں دے پریشر دے کارن جدوں وردی لاہونی پئی تے اصل وچ اوسے دیہاڑ صدر مشرف دے پیر اکھڑن لگے۔ نتارویاں چوناں کروان تے جمہوریت نوں بحال کرن دا کریڈٹ لین والے صدر مشرف نوں ایس گل دا گویڑ نہیں سی جو نویں آرمی چیف جنرل کیانی ملٹری انٹیلی جنس تے آئی ایس آئی دا ملکی سیاست تے الیکشناں تے اثر پاون والے رول نوں مکاون گے جیس دے نتیجے وچ صدر مشرف دے حواریاں دا صفایا ہو جاوے گا۔
جانکاری رکھن والے لوکاں نوں ایس گل دا چنگی طرحاں پتہ ہے جو چوناں دا رزلٹ صرف مسلم لیگ ق سگوں صدر مشرف لئی وی حیرانی تے ہرکھ دا کارن سی۔ چوناں وچ ہار( جیہدی اوہناں نوں آس نہیں سی) توں مگروں صدر مشرف تے اوہناں دے حواری مسلسل ایس کوشش وچ لگے رہے جو لوکائی دے مینڈیٹ نال اقتدار وچ آون والی مخلوط حکومت مضبوط نہ ہووے جیس کارن ملک وچ بے یقینی دی فضا قائم ہوئی تے تے معاشی وخت بنیا۔ عالمی منڈیاں وچ تیل دیاں بوہتیاں قیمتاں توں وکھ ملک دیاں تیل دیاں کمپنیاں نوں پچھلے کئی سالاں توں سبسڈی دیاں رقماں نہ دیون دا بھار وی اجوکی حکومت نوں جھلنا پیا جیس نال پٹرول تے ڈیزل دیاں قیمتاں ودھیاں سگوں مہنگائی وی ودھی۔ ہن جدوں کہ عالمی منڈیاں وچ تیل دیاں قیمتاں گھٹ ہوئیاں پاکستان وچ وی پیٹرول تے ڈیزل دیاں قیمتاں گھٹ ہوون دی آس ہے۔
جتھوں تیکر تعلق ہے بجلی دی تھوڑ تے لوڈ شیڈنگ دا تے ایہہ گل سب تے ظاہر ہے جو پچھلے گیاراں سالاں وچ پاور جنریشن دا کوئی وڈا منصوبہ پورا نہیں ہویا سوائے کجھ سو میگا واٹ دے دو تن کرائے دے پاور جنریشن یونٹ دے، کالا باغ ڈیم دا منصوبہ جے سکریپ کرنا سی تے وٹاندرے دے ڈیم تے فوری کم شروع ہو جانا چاہی دا سی پر معاملے حالی مڈھلے مرحلیاں تے ہین۔ دو تن نکے ڈیم دا منگلا ڈیم دا لیول اُچا کر کے ملک دی ودھدی ہوئی توانائی دیاں لوڑاں نوں پورا نہیں کیتا جا سکدا۔ملک وچ سڑکاں دا جال کھلارن دا دعویٰ کرن والے صدر مشرف دی اطلاع لئی عرض ہے جو ست سو کلومیٹر توں لمی کوسٹل ہائی وے دا وڈا حصہ پانی وچ رُڑھ گیا ہے تے اوہنوں پھیر بنایا جا رہیا ہے جدوں کہ لہور فیصل آباد موٹر وے تے اسلام آباد مری ایکسپریس وے میاں نواز شریف دے دور حکومت وچ منظور ہوئی سی۔ گوادر دی بندرگاہ تے تجارتی سرگرمیاں تے حالی شروع نہیں ہوئیاں پر لوکائی دے ارباں روپئے اوتھے پلاٹاں دی انویسٹمنٹ وچ ڈب گئے۔ ہن سنیا ہے اوتھوں دا کلا پی سی ہوٹل وی بند ہو رہیا ہے۔
مڈل کلاس گھرانے نال تعلق رکھن دا دعویٰ کرن والا پرویز مشرف جیہڑا مہنگیاں گھڑیاں، فرانسیسی ڈیزائنر دے بنائے سوٹ تے اٹالین جتیاں پاون دا شوقین ہووے، جیہڑا کیوبا دے سگار تے بلیو لیبل ورگی مہنگی شراب تے سی فوڈ ورگے مہنگے کھانیاں دا شوقین ہووے اوہدے مونہہ وچوں لوکائی دے دکھ، اوکڑاں سمجھنا تے اوہناں دا احساس کرنا ورگے لفظ چنگے نہیں لگدے۔
