مُک گئی گل۔ مشرف گیا، ختم ہوگیا، ٹُٹ بھج گیا،کہانی مُک گئی۔۔۔۔ہُن نہیں رہیا ۔۔۔تاریخ ہوگیا۔ناٹک مُک گیا۔ پردہ ہیٹھاں ہوچکیا اے۔(آڈیوس جنرلیسمو)
قوم اک وار فیر اوویں اِی جشن منا رہی اے۔ کمانڈو جیہنے لوکائی نال دھوکہ کیتا، مُلک نوں لٹن والا اک ہور کارگل ہار گیا۔ ببر شیر جیہڑا اِک چُنویں حکومت دا دھڑن تختہ کرن تے گرجیا سی (جدکہ اوہ وی اک آمر ہار سی یاد کرو جدوں اخیرلی واری مٹھیائیاں ونڈیاں گئیاں سن؟) ہُن مینہ وچ گِلی بِلی وانگوں، چیتے دی کھَل بِناں ڈری سہمی بھیڈ ہار جاپدا سی۔
پرانے آمر نال کسے نوں کوئی ہمدردی نہیں سی۔وہائٹ ہاوس توں کوئی ہمدردی دا فون نہیں آیا، کوئی اپیل وی نہیں کیتی گئی، کسے نے وی اوس نوں اپنیاں ہتھاں توں اپنے واسطے کھودے ٹوبے چوں کڈھن لئی ہتھ نہیں ودھایا، کوئی موڈھے تے سِر رکھ کے نہیں رویا، کسے بیلی نے اتھرو نہیں پونجھے۔۔۔۔اوہنوں ہرکھ ہویا تے ایس توں سبق لیا پئی اپنے چاء مگر لگ کے حکومت غصب کیتی تے ایہنوں مند ا بھلا کہیا۔
ایہہ کیویں ہویا؟ کیہنے اپنے لالچ تے سدھر مگر لگے اک آمر دے ہتھاں وچ مُلک دِیاں واگاں پھڑاون دا منصوبہ بنایا سی؟ اوہدے ہٹائے جان تے کوئی نمانا جیہا رولا وی کیوں ناں پیا؟ کیہنوں پورے کم وِچ اک بُلبلےوی ناں اُٹھن دیون تے قوم نوں آون والے خطریاں وچ پین توں بچاون اُتے تھاپڑی ملنی چاہیدی اے۔ اسیں مشرف نوں ہٹاون وِچ ڈھکواں پاتر ادا کرن والے دا ویروا کردے ہاں جو ایس دا حقدار وی ہے۔
نواز شریف دِیاں اُچیاں بڑھکاں انتقام نال بھریاں سن جیکر چنگی طرحاں سمجھیا جاوے تاں جمہوریت دی بیڑی نال چمبڑ کے ماریاں گئیاں سن۔ اوہنے سوکھت نال اوہناں طاقتاں نوں اکھوں پروکھے رکھیا جیہڑیاں لمے چر توں اندر باہر کھیڈ کھیڈ رہیاں سن صرف لوکائی دی اِکلی منگ نوں اپنے بوجھے پاون دی کوشش کیتی۔ اوہنے حکومت اتے اپوزیشن دا انگ رہ کے چنگا کردار نبھایا ہے۔ اوہنے مشرف دے حکومت رہن یاں ناں رہن دوہاں صورتاں وچ لابھ چکیا ہے۔گلاں باتاں توں وکھ اوہنے کدی وی مشرف حکومت دے اختیارات نوں تڑھی نہیں لائی۔ پارلیمنٹ وچ اوہدے ممبراں دی گنتری دا حصہ اوناں اِی اہم سی جِناں اتحاد دے دوجے شریکاں دا۔کیہہ اوہ ایہہ آ پ نہیں کرسکدا سی؟ سدھا پدھرا جواب نہیں۔سو میاں صاحب تہاڈے لئی کوئی بِلا نہیں ہے۔
فیر اوہ سن جیہناں پریس وچ دھڑلے نال بیانات دِتے تے اپنے مُٹھ جِنے ممبراں نوں ریلیاں وچ لیائے۔ بے شک اوہناں نے پریس و چ اپنا نمانا کردار ادا کردیاں ہویالوکائی سدھراں دی گل کیتی، پر ایہہ ایناں اِی اے۔ پر ساڈی یاداشت اوہناں بارے ہور اِی کہانی سناوندی اے اوس ویلے جدوں اوہ پارلیمانی پھٹیاں تے بیٹھے سن۔ اوہ چوکھیاں کھیڈاں دی قطار وچ لگے سن۔ معطل ججاں دی بحالی دی لہر بلاشبہ مینہ دی پہلی کَنی سی جومگروں ہڑھ بنیا۔ چوہدری اعتزاز احسن نوں ایس وچ اپنے اگوائی کردار تے ثابت قدمی دا پورا حق ہے۔اوہدی رَلت کارن اِی جیالیاں دی چوکھی گنتی مارچاں دا انگ بنی۔ وکیل چوہدری اعتزاز احسن سیاستدان دی پکی پیڈھی اگوائی توں وَکھ لہر دا رنگ نہیں بھر سکے۔ اوہدیاں بھرویاں تقریراں، اوہدے ان تھکویں مارچاں دی اگوائی، اوس دی سیاسی اوکڑ نوں چنگی طرحاں سنبھالنا جو زرداری نال ملاقات مگروں اک تباہی بن سکدی سی، ایہناں سبھ گلاں تے چوہدری صاحب تہانوں تھاپڑی ۔سانوں تہاڈے تے مان ہے۔
میڈیا، الیکڑانک اتے پرنٹ میڈیا نے مشرف حکومت دے اخیرلے دِن آون دیاں رپورٹاں چلانیاں شروع کردتیاں سن۔ رپورٹراں، کالم نگاراں،تبصرہ نگاراں دی کن پھوسیاں ہولی ہولی گرج وچ بدل گئیاں۔ میڈیا نوں صرف ریاست دا چھوتھا تھم سمجھیا جاندا اے۔ ایس ساہ گھوٹُودکھانت بھرے کھیڈ وچ میڈیا نوں بِلا ملیا۔ سلام اوہناں ماڑیاں تنخواہاں والے ورکراں نوں جیہناں ہر پیر تے حوصلہ وِکھایا شاباشی اوہناں باساں نوں جیہناں ایہنوں سچ کرن لئی اپنے کاروبار داء تے لا دِتے۔
ساڈی سیاسی تاریخ اک مندی صورت دا وِکھالا اے۔ ملٹری دی مداخلت ایتھے اونی پرانی جِنی چیتے ہیگی اے۔ چنگے بھلیاں تے چوکھا ووٹ بینک رکھن والیاں سیاسی پارٹیاں جو اجکل وِکھالی دیندیاں ہن کسے مارشل لاء ایڈمنسٹریٹر نے بنائی یاں فیر اوس توں فائدہ چُکدیاں رہیاں ہین۔ ایہناں چوں اِکلی پیپلز پارٹی اِی وکھری ہے۔ ایہہ ایوب خلاف دے آمرانہ حکومت خلاف اک بغاوت دے روپ وچ بنی۔ ایہنے اک دوجے شرابی یحییٰ خان جیہدی عقل اپنی پینٹ وچ سی، نوں چلتا کیتا۔ ایہہ ضیاء الحق دے ظلم تے چلتر چلاکیاں خلاف بہادری نال لڑی۔ پی پی پی نے ایہہ مُڑ کر وِکھایا اے۔۔۔۔۔۔ طاقتورر،زورآوراں نال نجھٹنا تے ہر غیر مناسب حالات وچ فتح مند ہونا ایہدی سچائی اے۔
بی بی دی دُکھانت بھری تے نظر آون والی شہادت مگروں آصف علی زرداری دا پی پی پی دیاں واگاں پھڑن تے بتھیریاں نوں اوس دی قابلیت تے شک سی۔ پنڈتاں نے جماعت دے مُک جاون دی پیشین گوئی کیتی جو نمانے تے روادار سماج لئی موڈھا جوڑدی سی۔ پر اوس نے سارے صوبائی کھڈاریاں نوں ہتھاں وچ کرن تے سبھ لوکاں نوں حیران کردِتا۔ایہناں چوں کوئی اینے جوگا نہیں سی پئی اپنے صوبیاں وچ پئیاں گھُمن گھیریاں چوں نکلن کے اپنی صوبائی حکومت اِی بنا سکدا۔ پر اوہ پی پی پی جیس دی چونہاں صوبیاں تے پارلیمنٹ وچ چوکھی اکثریت سی ، نال رَل دا موقع سی۔
بیشک آصف زرداری نے اوہناں اگے ون سونیاں فرمائشاں دھریاں۔ ایہہ فرمائش صرف ملکی جمہوری سوہنے مُکھ توں آمر دا بسورا بوتھڑا لاہن واسطے سن۔ اوہنے ایہہ کم حوصلے سمجھداری نال کیتا ناں کہ کالھی نال۔ اوہنے بھوئیں حقیقتاں نوں پچھان کے اپنے ٹیچے تیک اپڑن دا رستہ اُلیکیا۔ کئی وار تاں ایویں لگا پئی اوہ بھمبل بھوسے وچ پیا کالھیاں مار رہیا اے تے اوس نوں خبر اِی نہیں ہوری پئی ایس نابالغاں ہار دے وِکھالے دی کوشش کیہڑا کر رہیا اے۔ اوس نے اک سٹیٹس مین وانگوں کم کیتا ناں باقیاں ہوڑ مت سیاستداناں وانگوں جیہڑے قوم نوں نتیجیاں دے رحم وکرم تے چھڈ دیندے ہین۔ اوہنے سَٹ مارن توں پہلاں لوہے نوں چنگا گرم کیتا۔ بیوقوفا! ایہہ صرف ویلے دی اُڈیک سی۔
مشن پورا کرن تے زرداری نوں پورے دے پورے نمبر۔ کانسی دا بِلا چوہدری اعتزاز احسن تے اوس دی ٹیم نوں، میڈیا نوں چاندی دا بِلا تے آصف زرادی نوں سیاسی کھیڈاں وچ سونے دے بِلے دے حقدار ہین۔
