سمجھ نہیں آوندا آصف علی زرداری لکھئیے یا آصف علی مشرف یا مشرف جونئیر لکھیئے؟ جتھوں تیکر آون والے دناں دی گل ہے اوہ تے لگدا ہے جو پاکستان دی ریاست جنرل مشرف دی چلائی ہوئی گڈی وانگ ہی چلدی رہوے گی۔ پہلاں ڈرائیور دی سیٹ تے اک جرنیل بیٹھا سی ہن سول وردی وچ اوہناں دا جانشین آصف بیٹھے گا۔ پہلاں وی ساری طاقت دا دُھرا صدارتی محل سی تے ہن وی اوہو رہوے گا۔ پہلے وی وزیر اعظم کاغذی یا پہلوانی اکھاڑے دا اک پٹھا سی تے ہن وی اوہو ہووے گا۔
آصف علی زرداری نے صدارتی الیکشن لڑن دا فیصلہ کروا کے، ججاں دی بحالی توں منکر ہو کے تے باہر دیاں طاقتاں دے دبا دے ناں تے صدر محل تے قبضہ کرن دا فیصلہ کر لیا ہے۔ ہن جد کوئی ریاستی عہدہ نہ ہوندیاں وی اوہو ہی ریاست نوں چلا رہے ہین تے صدر محل وچ بیٹھے زرداری کولوں آئین ساریاں طاقتاں کھوہ وی لوے تے اوہناں نوں کیہہ فرق پیندا ہے؟ پہلاں تے ڈکٹیٹر صدر نوں اسمبلی توڑن لئی اٹھونجا ٹو بی ورتنی پیندی سی تے سپریم کورٹ وچوں اوس دی منظوری لینی پیندی سی ہن تے آصف زرداری نے صرف گیلانی نوں فون ہی کرنا ہے ناں ! اسمبلی وی ٹٹ جاوے گی تے سپریم کورٹ دی کِل کِل وی نہیں پوے گی۔
آصف زرداری دی اپنے سینئیر جنرل مشرف نال اک ہور وی سانجھ ہے۔ مشرف نے وی اپنے صلاح کار ایہو جیہے بندے رکھے ہوئے سن جنہاں کدی جمہوری سیاست نہیں کیتی۔ طارق عزیز توں لے کے شوکت عزیز تک نے کدی اپنے محلے دا وی الیکشن نہیں لڑیا تے جے لڑدے وی تے کدی جتدے نہ۔ ایس توں وکھ اوہناں دے صلاح کار جرنیل کرنیل سن۔ لوکاں نوں وکھاون لئی اک سیاستداناں دی جعلی پارٹی مسلم لیگ (ق) رکھی ہوئی سی پر اوہ تے سب درشنی پہلوان سن، ہندا تے سب کجھ غیر سیاسی صلاح کاراں دے مشورے نال سی۔
زرداری دی وی کچن کیبنٹ ویکھ لوو یا بیڈ کیبنٹ۔ سارے دے سارے بندے زنانیاں اوہ ہین جنہاں کدی لوکاں وچ جا کے آپ الیکشن نہیں لڑیا، سیاستداناں دے کندھاڑے چڑھ کے قومی اسمبلی یا سینٹ وچ بہہ گئے ہین پر اوہ وی اپنے محلے یا گلی دا الیکشن نہ کدی جتے ہین تے نہ جت سکدے ہین۔ ایس لئی اوہناں نوں وی نہیں پتہ عوام ناں دا جانور دو لتاں والا ہوندا یا چار لتاں والا۔ اوس نوں روز بھکھ لگدی ہے یا کجھ جنگلی جانوراں طرحاں عید دی عید اپنا کوٹہ بھر کے سارا سال بھکھ کٹ سکدے ہین۔
آصف علی زرداری دے بہتے صلاح کار ہور تے ہور وی گئے گذرے ہین۔ اوہ تے انگلش مارکہ ممی ڈیڈی کلاس وچوں ہین جنہاں نوں ساڈے دوست خالد حسن ہوریں کرنٹے یا کرنٹیاں کہندے ہین۔ اہناں وچوں جو کرنٹے کرنٹیاں نہیں ہین اوہناں وی اہناں دا ہی بہروپ بھریا ہویا ہے۔ اہناں کرنٹے کرنٹیاں کولوں جنہاں دا لوکاں نال کوئی واہ واسطہ نہیں کیہہ آس لائی جا سکدی ہے؟ ایہہ تے اپنے باس لئی ڈرائنگ روماں وچ بہہ کے سیاست دی جمع تفریق ہی کر سکدے ہین سو اوہ کر رہے ہین۔
باقی رہی مشرف دی باہرلیاں طاقتاں دی غلامی تے اوہ وی آصف زرداری نے سانبھ لئی ہے۔ مولانا فضل الرحمن نے کل ہی بیان دتا ہے جو آصف زرداری ہوریں کہندے ہین جو جنہاں طاقتاں مشرف کولوں استعفٰی دوایا ہے اوہناں دے دبا پاروں اوہ ججاں نوں چھیتی بحال نہیں کر سکدے۔ باہرلیاں طاقتاں دا سب جاندے ہین تے ایہہ وی جاندے ہین جو اوہ افتخار چوہدری نوں بحال کیوں نہیں کرنا چاہندے۔
سو گل ایہہ ہے جو امریکی صدر مشرف دی ملھم پٹی کرکے اوہنوں کھلیار تے نہ سکے پر اوہ اوہناں دا جونئیر تخت تے بٹھاون وچ کامیاب ضرور ہو گئے ہین۔
