پاکستان دے امکانی صدر آصف علی زرداری معزول ججاں دی بحالی ولوں بھوربن تے اسلام آباد دے معاہدیاں ولوں آکھ چکے ہین جو وعدے یاں معاہدے قرآن تے حدیث نہیں ہوندے جنہاں وچ بدلیاں نہیں ہوسکدیاں۔ آصف علی زرداری توں دو ہزار سال پہلوں سیاست تے حکمرانی دے گُراں دے ماہر چانکیہ ارتھ شاستر وچ ہور قریباََ پنج سو ورہے پہلوں عظیم سیاسی چتر میکیاولی ایہو گل ' دی پرنس ' وچ کہہ چکیا ہے جو کامیابی لئی ضروری ہے جو اقتدار دی بساط تے وعدے تے اصول دی اوقات اک چالے توں ودھ نہیں ہوونی چاہی دی۔
ایہو سیاسی اخلاقیات ہے۔ جیہڑا ایہہ نہیں کرسکدا اوہدے لئی چنگا ہے اوہ تخت تے تاج دے سفنے ویکھن دی بجائے صوفی یاں رشی بنن دی کوشش کرے۔
سیاسی بقا دی ایس آزمائی ہوئی تشریح دے چانن وچ سانوں ساریاں نوں اپنے اپنے ہیرو بدل لینے چاہی دے ہین۔ ایس تشریح نوں معیار من کے میں معافی منگناں گورنر شال امیر معاویہ توں جنہاں دے لشکر نے جنگ صفین وچ چوتھے خلیفہ حضرت علی دی فوج توں ہارن دے امکان ویکھ کے قرآن نیزیاں تے چک دتے تے مصالحت لئی ثالثی دی صلاح دتی۔
حضرت علی ولوں ابوموسی اشعری تے امیر معاویہ ولوں عمرو بن العاص ثالث چنے گئے تے دوہویں ایس نتیجے تے اپڑے جو خون خرابے توں بچن لئی خلیفہ تے گورنر نوں معزول کر دتا جاوے۔ جدوں دوہویں ثالث خیمے توں باہر نکلے تے ابوموسیٰ اشعری نے متھے معاہدے موجب اعلان کیتا جو میں علی دی معزولی دا اعلان کرناں۔
اوہناں دے مگروں عمرو بن العاص نے اعلان کیتا میں ایس فیصلے دی حمیت کرنا پر امیر معاویہ نوں برقرار رکھن دا اعلان کرناں۔ ایس بد عہدی دے کارن انتقام تے فساد دا اوہ سلسلہ شروع ہویا جیہڑا اج تیکر کسے نہ کسے شکل وچ ظاہر ہوندا رہندا ہے پر چھیتی فیدا ایہہ ہویا جو امیر معاویہ نے پنجھی ورہے خلیفہ بن کے حکومت کیتی۔
جے پاکستان ول ویکھیا جاوے تے مینوں نموشی ہے یحییٰ خان دے خلاف بد گمانی رکھن تے۔ حالانکہ اوہناں نے صرف ایہہ کیتا سی جو چوناں دے مگروں اقتدار منتقل کرن دے وعدے توں پھر گئے سن کیوں جو اوہناں دا وی خورے ایہو خیال سی جو وعدہ پورا ہوون لئی تھوڑا ہی ہوندا ہے۔
میں شرمندہ واں جنرل ضیاء الحق توں۔ جنہاں ولوں میں ہن تیکر بھیڑا سوچدا رہیا کیوں جو اوہناں نے نوے دن وچ چوناں دے وعدے نوں دس ورہیاں تیکر لمکا دتا۔ میں اوہناں دی مخالفت وچ ایہہ نہیں سمجھ سکیا جو وعدہ قرآن تے حدیث نہیں ہوندا۔ تے صرف میں ہی کیہہ ایس زمانے دی پیپلز پارٹی وی ضیاء الحق دی ایہہ مجبوری نہ سمجھ سکی۔
مینوں بوہت شرمندگی ہے جنرل پرویز مشرف توں جو ایس لئی چنگے نہیں لگدے سن جو اوہناں نے حقیقی جمہوریت دا وعدہ کیتا پر طفیلی جمہوریت ساہمنے لیاندی۔ وردی لاون دا وعدہ کیتا پر مکر گئے۔ خورے بی بی بینظیر بھٹو سیاسی مفاہمت لئی صدر مشرف دی وردی لاون تے کیوں اڑیاں رہیاں تے جنرل مشرف ایہہ کیوں نہ کہہ سکے بی بی وعدے قرآن تے حدیث تے نہیں ہوندے۔
کاش ذوالفقار علی بھٹو ایس اکھان تے عمل کر کے جنرل ضیاء نال سمجھوتہ کر لیندے تے اج ساڈے وچ ہوندے۔ تے مینوں ترس آرہیا ہے محمد علی جناح تے جیہڑے متحدہ ہندوستان دی وزارت عظمیٰ نوں لت مار کے پاکستان لین تے اڑگئے۔ حالانکہ اوہ ایہہ کہہ کے چالی کروڑ ہندوستانیاں دے وزیر بن سکدے سن جو حالات بدل گئے ہین تے سیاست وچ کوئی گل حرف آخر نہیں ہوندی۔
کاش ماؤنٹ بیٹن ایہہ کہندے ہوئے ہندوستان دی ونڈھ توں پھر جاندے جو میں خون دیاں نہراں وگدیاں نہیں ویکھ سکدا۔یاں گاندھی جی ایس گل تے نہ اڑے رہندے جو پاکستان دے حصے وچ آون والا اثاثہ جدوں تیکر نہیں گھلیا جاندا میں نہ روٹی کھاواں گا نہ پانی پیواں گا۔ حالانکہ اوہ ایہہ کہہ کے کسے وی ویلے برت توڑ سکدے سن میں پاکستان نوں اثاثے دلوان دا ٹھیکہ تے نہیں لیا ہویا۔
اہنوں ویکھدیاں ہوئیاں چھ ستمبر دے مگروں اتحاد، تنظیم، یقین محکم دا نعرہ بوہت ہی پھٹیچر لگے گا۔ نواں نعرہ ہوونا چاہی دا اتحاد تنظیم تے مکر۔
