بناء کسے شک شبہے تے ڈر خطرے دے ایہہ کہیا جاسکدا ہے جو گذریل صدر جنرل ریٹائرڈ پرویز مشرف نے اپنے توں پہلے دے فوجی آمراں وانگوں ناجائز، غیر قنونی ، غیر آئینی تے غیراخلاقی سگوں غیر انسانی طور تے بناء کسے معقول جواز دے اپنے ملک دے سیاسی اقتدار تے قبضہ کیتا تے ایس غاصبانہ قبضے نوں اکتوبر اُنی سو نڑینوے توں اٹھاراں اگست دو ہزار اٹھ تیکر زبردستی جاری رکھن تے ایس مقصد لئی ملک دے وچ خانہ جنگی توں وی بھیڑے حالات پیدا کرن دے گناہی ہوئے تے بی بی بینظیر بھٹو دی زندگی دی حفاظت کرن وچ ناکام رہے جیہڑیاں کہ پاکستان دے جمہوری مستقبل دی سب توں چنگی ضامن ہو سکدیاں سن پر پرویز مشرف ایہہ کہن وچ وی حق تے سن تے جے چاہندے تے قوم نال اپنے چھیکڑلے خطاب وچ کہہ وی سکدے سن :
کودا کوئی دیوار سے یوں دھم سے نہ ہو گا جو کام ہوا ہم سے کبھی تم سے نہ ہو گا
ایہدے وچ کوئی شک نہیں جے نو سال پہلوں قومی حالات دا سرسری جائزہ وی لوو تے پتہ لگے گا جو پرویز مشرف شوکت عزیز، شجاعت حسین اینڈ کمپنی نے اپنے ملک نوں امریکی ملٹی نیشنل کمپنی بناون توں وکھ اپنے چیف ایگزیکٹو دی ہدایت وچ ان گنت خرابیاں تے غلطیاں دا گناہ کیتا ہووے گا جیہدے بے شمار گھاٹے ساڈیاں اگلیاں نسلاں وی جھلدیاں رہن گئیاں پر اہناں خرابیاں تے غلطیاں وچکار یاں اوہناں کارن یاں اوہناںدے مگروں وی کجھ چنگے کم وی ہو گئے ہین جنہاں کارن ملک تے قوم نوں بوہت نقصان اپڑ سکدا سی۔
اک سنگی چیتا کرواندے ہین جو نو سال پہلوں اُنی سو نڑینوے وچ پاکستان دے آئین وچ پندرھویں ترمیم دیاں ساریاں تیاریاں ہو چکیاں سن تے صرف نویں صدی دے تیجے مہینے مارچ دو ہزار دو نوں اُڈیکیا جار ہیا سی جدوں پاکستان سینٹ دی وڈی گنتی آئین دی پندرہویں ترمیم نوں منظور کردیاں ہوئیاں ملک دی جمہوری سیاست تے جمہوری نظام نوں اُکا بدل کے خلافت دے نظام وچ بدل دیوے گی تے حکومت دا سربراہ وزیر اعظم دی بجائے '' امیرالمومنین '' بن جاوے گا جیہدے توں مگروں کسے چیف جسٹس کسے سجاد علی شاہ تے سپریم کورٹ تے دھاڑا کرن دی لوڑ تے قیمے والے پراٹھے خرچ کرن دی لوڑ نہیں رہوے گی۔
سنگی دسدے ہین جے انج ہو جاندا تے اج ملک دی وکیل برادری این جی اوز جمہوریت پسند عناصر، انسانی حقاں دے پاسدار، آزادی تحریر تے تقریر دے علمبردار سول سوسائٹی دیاں زنانیاں مرد تے گذریل فوجیاں دے جمہوریت نواز رکن صدر پرویز مشرف دی بجائے آپوں بنے '' امیرالمومنین '' توں استعفیٰ منگ رہے ہوندے جدوں کہ ملک دے نویں نظام خلافت وچ استعفے دا کوئی تصور ہی نہ ہوندا۔ معزول چیف جسٹس مسٹر افتخار چودھری تے اوہناں دے سنگیاں دی بحالی دی بجائے ملک دے گذریل متروکہ عدالتی نظام دی بحالی دی تحریک جاری ہوندی تے کجھ گویڑ نہیں جو ایس تحریک وچ خلافت دے جلاداں دیاں تلواراں وچ آون والیاں کنیاں دھوناں کٹ چکیاں ہوندیاں کنے خون ہو گئے ہوندے کنیاں انسانی زندگیاں جاندیاں رہندیاں کنے پھٹڑ اپنے پھٹاں تے مرہم تے کنے معذور اپنے وڈھے ہوئے ہتھاں پیراں لئی مصنوعی انسانی انگ اُڈیک رہے ہوندے۔
ساڈے سنگی کہندے ہین اوہناں نے جنرل پرویز مشرف دے چیف ایگزیکٹو بن جاون نوں نہ چاہندیاں ہوئیاں سلاہیا سی تے ایہدی وی ایہو وجہ سی جو اوہناں نوں پک سی کہ نویں صدی تے نویں ملینیم دے تیجے مہینے وچ ساڈی بدنصیب تاریخ سب توں وڈے مینڈیٹ والے حکمران اپنے آپ نوں امیر المومنین بناون دی اڑی پوری کرن گے ( کلی دا بھاویں ککھ نہ رہوے) تے انج ملک تے قوم تے آمریت توں وی بھاری آمریت لددتی جاوے گی جیس دے نتیجے توں کسے نوں چوں چراں کرن دی اجازت وی نہیں ہووے گی تے خلاف ورزی دی جرات کرن والے مارے جاون گے تے ایہہ سزا سرعام دتی جاوے گی۔ دوجے لفظاں وچ ساڈے سنگی اپنی دھون دی سلامتی دے فیدیاں وچ جنرل پرویز مشرف دے مارچ دو ہزار توں پہلوں پاکستان دے اقتدار تے قبضہ کرن نوں سلاہ رہے سن تے اوہناں دی کتے دے بچیاں دے نال تصویر ویکھ کے تے ایس تصویر وچ اوہناں دی ماں نوں ساڑھی وچ ویکھ کے خوش ہوئے سن جو جنرل پرویز مشرف پاکستان دے قائد اعظم ثانی دی بجائے اتاترک ثانی بنن دی کوشش کرن گے۔
ساڈے ایس سنگی دا ایہہ وی کہنا ہے جو بھاویں پرویز مشرف تے اوہناں دے وزیر اعظم نے پاکستان دی سیاست تے معیشت دے نال کوئی چنگا ورتاء نہیں کیتا پر شاعر نے کہیا ہے کہ
رہا کھٹکا نہ چوری کا دعا دیتا ہوں رہزن کو
یعنی پرویز مشرف دی حکومت نے کسے آپوں بنے '' امیر المومنین '' دے غاصبانہ قبضے دے خطرے نوں ٹال دتا ہے پر کجھ سنگیاں دا کہنا ہے جے نیو یارک دے ٹوئن ٹاور تے دھاڑا نہ ہوندا تے ایس دھاڑے دے کارن پرویز مشرف '' یوٹرن '' سگوں '' ڈبلیو ٹرن '' تے مجبور نہ ہوندے تے اوہ وی آئین وچ پندرہویں ترمیم لیاون دیاں راہواں تے چل رہے سن تے بڑی آسانی نال محمد علی درانی تے شیخ رشید دی مدد نال اپنے آپ نوں '' امیرالمومنین '' بنا سکدے سن پر قدرت نوں ایہہ منظور ہی نہیں سی کیوں جو
سکوں محال ہے قدرت کے کارخانے میں ثبات اک تغیر کو ہے زمانے میں
ہر ویلے بدلن والے حالات دی قدرت توں وکھ کسے وی شے یاں کم نوں کوئی ثبات نہیں ہے تے ایہو قدرت دے کارخانے دی سب توں وڈی خوبی ہے سگوں ایہو خوبی قدرت اکھواندی ہے۔
