اوبامہ، زرداری اتے راہول گاندھی: تبدیلی دے ناں ہیٹھ تبدیلی نوں ڈھاء
جسپال سنگھ
August 25th, 2008
اج کل ہر سیاسی لیڈر تبدیلی دا نعرہ لا رہیا ہے۔ امریکہ، ہندوستان، پاکستان اتے ہورناں مُلکاں وچ ہریک پارٹی دے لیڈر تبدیلی دا نعرہ لا رہے ہن۔ اس دی وجہ ہے کہ لوک اجوکے حالات، اقتدار اتے پربندھ توں نجات چاہوندے ہن اتے آپنے مسئلیاں نوں حل کرنا چاہوندے ہن۔ حالات تبدیلی منگ رہے ہن۔تبدیلی دی لوڑ لوکاں دے دلاں وچ صرف اک تانگھ ہی نہیں رہی سگوں لوک تبدیلی لئی لام بند ہو رہے ہن۔
امریکہ وچ اوبامہ اتے مکین دونویں ہی لوکاں نوں کہہ رہے ہن کہ اوہ اوس تبدیلی دے جھنڈا چُک ہن جو لوک چاہوندے ہن اتے جے اوہ پردھان بن گیا تے لوکاں لئی اک وڈھی تبدیلی لیاندی جاوے گی۔ پر سچی گل تاں ایہہ ہے کہ ناں ہی اوبامہ اتے ناں ہی مکین کوئی تبدیلی لیا سکدا ہے۔ ایہہ تبدیلی دا نعرہ تاں لوکاں دی تبدیلی لئی تانگھ اتے لہر نوں تبدیلی دے خلاف ورتن لئی ہی کر رہے ہن۔ جارج بُش نے سن ٢٠٠٠ وچ اتے اوس توں پہلاں بل کلنٹن نے وی تبدیلی دا ہی نعرہ لایا سی۔
اصلیت تاں ایہہ ہے کہ لبرل ڈیموکریسی وچ سرکار اتے اقتدار دو وکھرے ادارے ہُندے ہن۔سرکار تاں بدلدی رہندی ہے پر اقتدار جیہڑا کہ حاکم میل دا پکھ پُوردا ہے کدی وی نہیں بدلدا۔ایہہ اُنج ہی ہُندا ہے کہ جس طرحاں کسے کمپنی وچ منیجر اتے ہور عملہ تاں بدلدے رہندے ہن پر کمپنی دے ٹیچے اتے مالک نہیں بدلدے۔ایہی وجہ ہے کہ اوبامہ دے پردھان بنن نال ناں ہی امریکہ دا وطیرہ دوجے مُلکاں اتے لوکاں ول بدلے گا اتے ناں ہی امریکہ دے کسے وی مسئلے دا حل کیتا جاوے گا۔مثال دے طور امریکہ دے لوک دوجے مُلکاں نال امن اتے سکون نال رہنا چاہوندے ہن۔ اوہ کسے وی مُلک تے فوجاں نہیں چاڑھنا چاہوندے۔ پر اوبامہ دے پردھان بنن نال لوکاں دی ایہہ منگ پوری نہیں ہووے گی کیونکہ اقتدار اتے حاکم میل نوں ایہہ منظور نہیں اتے ناں ہی ایہہ گل ایہناں نوں منظور ہو سکدی ہے۔حاکم میل اقتدار نوں آپنے مُنافعے ودھاؤن لئی اتے آپنے ہتاں لئی ورتدا ہے۔ جنگ اتے دوجے مُلکاں دی لُٹ کھسُٹ توں حاکم میل اتے ایہناں دیاں کمپنیاں نوں ارباں کھرباں ڈالراں دا منافع ہُندا ہے۔اوبامہ اس گل تے کنتو وی نہیں کر سکدا۔اقتدار کمپنیاں دی دہشتگردی اتے من مرضی نوں ہی ترجیح دیندا ہے ناں کہ لوکاں دیاں لوڑاں اتے سدھراں نوں۔
پاکستان وچ زرداری جمہویت دے وڈے دمگجے لا رہیا ہے تے ایہہ بھلیکھا پا رہیا ہے کہ جنہاں نشانیاں لئی لوک جدوجہد کر رہے ہن اتے قربانیاں دے رہے ہن اوناں نشانیاں نال اوس نوں ہمدردی ہے اتے اوس دے پردھان بنن نال لوکاں دے اوہ نشانے پورے ہو سکدے ہن۔اوہ وی اس گل تے پردہ پا رہیا ہے کہ اوس دے جاں کسے ہور دے پردھان بن جان نال اقتدار وچ کوئی تبدیلی نہیں آوے گی اتے لوکاں دے مسئلے حل نہیں ہو سکدے۔کیونکہ مُشرف دے جان نال پاکستان دے اقتدار وچ کوئی وی تبدیلی نہیں ہوئی ہے اتے زرداری دے پردھان بنن نال ناں ہی اس وچ کوئی تبدیلی آ سکدی ہے۔حاکم میل نے لوکاں دی جدوجہد دے دباء ہیٹھ صرف آپنے منیجر ہی بدلے ہن۔حاکم میل ہُن ایہہ آس کر رہے ہن کہ منیجر بدلن نال لوک ایہہ سمجھن گے کہ جنہاں نشانیاں لئی اوہناں نے قربانیاں کیتیاں سن اوہ نشانے پورے ہو گئے ہن اتے نویں منیجر لوکاں دا پکھ پورن گے۔ پر لوک منیجر نہیں حالات بدلنا چاہوندے ہن اتے اوہناں دی جدوجہد جاری رہے گی جناں چر ایہہ حالات بدلدے نہیں اتے لوکاں دیاں لوڑاں پوریاں نہیں ہُندیاں۔ زرداری جاں ہور کوئی دوجا نواں منیجر ایہہ کر ہی نہیں سکدا۔
ہندوستان وچ راہول گاندھی نے عام آدمی دیاں لوڑاں پوریاں کرن واسطے تبدیلی دا جھنڈا چُکیا ہے۔ اوہ کہندا ہے کہ سرکار اتے کانگرس پارٹی وچ رشوت خور بندے وڑ گئے ہن اتے اس لئی لوکاں دیاں لوڑاں پوریاں نہیں ہو رہیاں ہن۔اوس نے اعلان کیتا ہے کہ اوہ اتے اوس دی نوجواناں دی جتھے بندی یُتھ کانگرس پورے مُلک وچ ایمان دار نوجواناں نوں بھرتی کرے گی جس نال لوکاں دیاں معاشی اتے سماجی لوڑاں پوریاں ہو سکدیاں ہن۔اوس نے کیہا ہے کہ ایہہ ایمان دار نوجوان عام آدمی کے سپاہی کہے جان گے اتے عام لوکاں دی لوڑاں پوریاں کرن لئی اوہناں دی اگوائی کرن گے۔اگست ٩ نوں بڑی دھُوم دھام نال ایہہ مُہم راہول گاندھی نے شروع کیتی ہے تے کیہا کہ اس نال ہندوستان دا کایا قلم کیتا جاوے گا۔
اج حالات ایہناں سارے ہی منیجراں دیاں تقریراں، وعدیاں اتے ڈرامے بازیاں توں اگے لنگھ چُکے ہن۔حالات منگ کر رہے ہن کہ اقتدار اتے طاقت حالات نوں تبدیل کرے اتے جے ایہہ اقتدار اتے طاقت حالات نہیں بدلدے تاں اقتدار اتے طاقت توں کھیروں کھیروں کرکے نویں اقتدار اتے طاقت قائم کیتی جاوے جیہڑی حالات نوں تبدیل کرے۔ تبدیلی نویں حالات دی منگ کر رہی ہے نویں منیجراں دی نہیں۔لبرل ڈیموکریسی صرف منیجر بدل کے پُرانے حالات برقرار رکھ سکدی ہے حالات نوں بدل نہیں سکدی جو کہ ویلے دی لوڑ ہے۔تاریخ لبرل ڈیموکریسی نوں پچھے چھڈ گئی ہے اتے نویں اقتدار اتے نویں اُساری دی منگ کر رہی ہے۔
