نوجوان دی روندی ہوئی آواز سی، اوہ پنجاب دے کسے دور دے علاقے توں فون کر رہیا سی تے اوہدا لہجہ پینڈو جیا سی اوہ کہندا '' سر تسیں لوک ساڈے مجرم او،اسیں کجھ مہینیاں مگروں سارے میڈیا دا گریبان پھڑاں گے'' میں پچھیا '' پتر اسیں کیہہ جرم کیتا' اسیں کیہہ قصور کیتا' اوہ بولیا '' تسیں سارے پرویز مشرف دے پچھے ہتھ دھو کے پئے سی ' تسی اوہنوں آمر ،غاصب، قاتل کہندے سی۔ تسیں کہندے سی صدر پرویز مشرف سیاسی نظام نوں چلن نہیں دے رہیا، اوہ ججاں دی بحالی دی راہ وچ رکاوٹ ہے تے اوہدی وجہ توں ملک وچ ات واد ہے ''۔
اوہ ساہ لین لئی رکیا تے میں چھیتی نال کہیا '' کیہہ اسیں غلط کہندے سی '' اوہ چھیتی نال بولیا اٹھاراں اگست دو ہزار اٹھ نوں جدوں صدر پرویز مشرف نے استعفیٰ دتا تے اوس ویلے تیکر میں وی تہاڈا حمیتی سی پر جیویں ہی صدر نے استعفیٰ دتا تے حکمران اتحاد اک دوجے دے سر ہو گیا تے میری رائے وچ پہلی لیک آئی، چویہہ گھنٹے لنگھے تے پاکستان پیپلز پارٹی نے جج بحال نہ کیتے تے میرے خیالاں وچ دوجی لیک آئی، پاکستان پیپلز پارٹی تے پاکستان مسلم لیگ نون دے وچکار پاڑ آئے تے ایہہ پاڑ مکاون لئی اسفند یار ولی تے مولانا فضل الرحمن دی کمیٹی بنی تے میری رائے وچ تیجی لیک آگئی، ایس کمیٹی نے جدوں جھیڑے مکان لئی بہتر گھنٹے منگے تے چوتھی لکیر آئی، بہتر گھنٹے دے مگروں جدوں معاملہ پارلیمنٹ وچ جاون لگا تے پنجویں لکیر آگئی ایسے وچکار آصف علی زرداری صدارت دے امیدوار بنے تے میرے یقین وچ اٹھ دس لیکاں کٹھیاں آگئیاں تے جدوں ایہہ بیان دتا گیا جو معاہدے قرآن حدیث نہیں ہوندے تے میرا اعتماد ٹٹ گیا تے میں اج ایہہ وچارن تے مجبور ہو گیا واں جو صدر پرویز مشرف تے موجودہ حکمراناں وچ کیہہ فرق ہے ؟
میں اج ایہہ سوچن تے مجبور ہو گیا جے صدر پرویز مشرف ایہہ کہندا سی میں پچھوکڑ دے سیاسی لیڈراں نوں پاکستان نہیں آون دیواں گا تے اوہ غلط نہیں سی کہندا تے جدوں اوہ ایہہ کہندا سی جو ایہہ لوک مفاد پرستاں دا ٹولہ ہین تے وی اوہ غلط نہیں کہندا سی'' ۔ میں چپ کیتیاں اوہدیاں گلاں سن دا رہیا تے اوہ بولیا '' مینوں دسو جو عدلیہ نے ایس لئی مار کھادی تے وکیل تے سول سوسائٹی نے ایس لئی تحریکاں چلائیاں سن جو اخیر وچ اقتدار دے دستر خوان تے روٹیاں تے بوٹیاں ونڈھ لیأاں جاون کیہہ ایہہ اوہ سویرا سی جیہدی خبر تسیں سانوں سناوندے رہے سی کیہہ ایہہ اوہ سفنے سن جنہاں دی تعبیر توں موجودہ صورت حال برآمد ہوونا سی جے ایہو اوہ سفنے، ایہو اوہ چاہ تے ایہو اوہ تعبیر سی تے صدر پرویز مشرف وچ کیہہ خامی سی' اوہ وی تے ایہو کر رہیا سی، اوہنے وی عدلیہ نوں معطل کیتا ہویا سی اوہ وی تے اعتدال پسندی تے روشن خیالی دے پھریرے لہرا رہیا سی، اوہنے وی تے ات واد دے خلاف جنگ شروع کیتی ہوئی سی اوہ وی تے معاہدیاں تے وعدیاں دا پاس نہیں کردا سی اوہ وی تے امریکہ نوں خوش رکھدا سی۔
ایس لئی صدر مشرف تے اہناں وچ کیہہ فرق ہے۔ میں آکھیا پتر اوہ آمر سی، فوجی ڈکٹیٹر سی تے سولائزڈ وسیباں وچ ڈکٹیٹر شپ دی گنجائش نہیں ہوندی، ڈکٹیٹر انسانی حقاں دے قاتل ہوندے ہین، اوہ زور نال ہسیا تے اُچا بولیا '' انسانی حق واہ کیہڑے انسانی حق جیہڑے ڈالر نوں 76 روپئے کر دیون' اوہ انسانی حق جیہڑے پیٹرول نوں 86 روپئے لیٹر کر دیون، جیہدے وچ لوکاں نوں آٹا نہ ملے، جیہدے وچ اغوا برائے تاوان دھندا بن جاوے۔ جیس وچ ملک دی تن چوتھائی آبادی بھکاری بن جاوے جیہدے وچ لوک بدلہ لین لئی خود کش جیکٹس لبھ رہے ہوون جیہدے وچ صوبہ سرحد وچ حکومتی رٹ مک جاوے تے جیہدے وچ بلٹ پروف گڈی دے بغیر کوئی سیاست دان باہر نہ نکل سکے، ایہہ اوہ انسانی حق سن جیہڑے صدر پرویز مشرف نے غصب کیتے ہوئے سن تے میں تہانوں دس دیواں تناں مہینیاں بعد، صرف تناں مہینیاں مگروں تسیں لوک ایس ملک دے سب توں وڈے مجرم ہوو گے تے اسیں تہاڈا گریبان پھڑاں گے' جوان نے اینا کہیا تے غصے وچ فون بند کر دتا۔
صدر پرویز مشرف دے حق وچ پہلی آواز سی تے ایس آواز نے مینوں روح دیاں اخیرلیاں حداں تیکر ہلا کے رکھ دتا، میں صدر پرویز مشرف دا مخالف سی جنرل پرویز مشرف نے باراں اکتوبر اُنی سو نڑینوے نوں جمہوریت تے شب خون ماریا تے میں تیراں اکتوبر نوں اوہدے خلاف لکھنا شروع کر دتا تے اج تیکر ایس محاذ تے ڈٹیا ہویاں پر ایس نوجوان دی گل بات دے مگروں مینوں پہلی وار محسوس ہویا صدر پرویز مشرف بوہتے غلط نہیں سن، ایہہ ٹھیک ہے اوہ آمر تے غاصب سی، اوہنے اقتدار وچ بےشمار غلط فیصلے کیتے سن تے اہناں فیصلیاں دے نتیجے وچ ایہہ ملک ہن اصلاح دے قابل نہیں رہیا۔
اسیں ہتھ وچ اگ لے کے بارود دے ڈِھگ تے بیٹھے ہوئے آں تے بس اک چنگیاری ہتھوں نکلن دی دیر ہے تے ایہہ سارا سسٹم اُڈ جاوے گا پر سوال ایہہ ہے صدر پرویز مشرف دے مگروں اسیں کتھے آ گئے ہاں ؟ کیہہ ایہہ اوہ جمہوریت سی جیہدے سفنے اسیں نواں سالاں توں ویکھدے رہے؟ کیہہ ایس جدوجہد دا ایہہ نتیجہ نکلنا سی جو اسیں دوہواں ورہیاں توں ایس ملک دیاں سڑکاں تے بیج رہے آں ؟ کیہہ ساڈیاں اکھاں نے ایس فصل لئی کنڈیاں وچ اپنی بینائی پروئی سی تے کیہہ ایہہ اوہ اعتماد تے یقین سی جو نواں ورہیاں تیکر فوجی بوٹاں ہیٹھ لیا جارہیا سی۔
اج ساڈے حکمراناں نے ثابت کر دتا چیف جسٹس افتخار چودھری اک مورکھ بندہ سی' اوہ زمینی حقیقتاں توں جانوں نہیں سی تے اوہنوں نو مارچ دو ہزار ست نوں صدر پرویز مشرف دیاں ساریاں منگاں من لینیاں چاہی دیاں سن اوہنوںگھروں غائب 610 لوکاں دی پٹیشن ردی دی ٹوکری وچ سٹ دینی چاہی دی سی اوہنوںسٹیل مل چپ کیتیاں کوڈیاں دے بھاء وکن دینی چاہی دی سی تے اوہنوں سوموٹو ایکشن راہیں لوکائی نوں انصاف تے ریلیف دیون توں ولاونا چاہی دا سی اوہنوں وزیر اعظم شوکت عزیز توں چک شہزاد وچ تریہہ پینتی کروڑ روپئے دا فارم ہاؤس لیناچاہی دا سی تے دو ہزار تیراں تیکر اختیار تے اقتدار توں سواد لینا چاہی دا سی، اوہ مورکھ بندہ سی جنہے اصولاں دی خاطر اپنے نیانے بھکھے مروا دتے، ساڈے حکمراناں نے ثابت کر دتا دو نومبر دو ہزارست نوں پی سی اوہ تے حلف نہ چکن والے سٹھ جج وی مورکھ سن اوہناں لوکاں نے ناحق اپنیاں نوکریاں ، سوکھتاں تے اختیاراں دی قربانی دتی، اوہناں نوں چاہی دا سی جو اوہ زمینی حقیقتاں نوں سمجھ دے تے چپ کیتیاں صدر مشرف دی عدلیہ دا حصہ بن جاندے' اٹھاراں فروری نوں پاکستان مسلم لیگ ق نوں رد کرن والی لوکائی وی مورکھ سی اوہناں نوں چاہی دا سی جو اوہ مسلم لیگ ق دے دو سو سٹھ رکناں نوں ووٹ پاوندے تے زندگی آرام نال لنگھا دیندے۔
حکمراناں نے ثابت کر دتا نو مارچ ، باراں مئی تے ست اگست دے وعدیاں تے یقین کرن والے لوک وی مورکھ سن اہناں نوں زمینی حقیقتاں من لینیاں چاہی دیاں سن اوہناں نوں من لینا چاہی دا سی جو سیاست سیاست ہوندی ہے، اوہدے سینے وچ دل ہوندا ہے، ایمان تے نہ ہی اصول تے وعدے تے معاہدے توڑن لئی کیتے جاندے ہین نبھاون لئی نہیں تے حکمراناں ثابت کر دتا اج وی جیہڑے لوک بدلی، اصول تے جمہوریت دے سفنے ویکھ رہے ہین او سارے مورکھ تے نادان ہین تے اہناں نوں چک کے بحیرہ عرب وچ سٹ دینا چاہی دا۔ اوہناں ثابت کر دتا ایس ملک وچ اصول، ایمان تے یقین دی کوئی لوڑ نہیں، ایس ملک وچ سفنے تے چاہ پالن والیاں دی کوئی لوڑ نہیں۔
مینوں انج لگدا ہے جو ساڈے حکمراناں دیاں ایہہ کاروائیاں جاری رہیاں تے کجھ مہینیاں وچ صدر پرویز مشرف ورگے غاصب تے آمر ہیرو بن جاون گے اسیں لوکائی توں شرمندہ شرمندہ پھراں گے۔
