ایہہ ویلا وی آونا سی جدوں وعدے تے معاہدے توڑن تے آصف علی زرداری تے ہر پاسیوں یلغار ہورہی سی تے ایہہ ظاہر کیتا جارہیا سی جو پاکستان دی سیاسی تاریخ وچ ایہدے توں وڈا ہرکھ والا واقعہ پہلوں کدی نہیں ہویا، قاضی حسین احمد پیپلز پارٹی دے شرمسار لیڈراں تے کارکناں دی مدد نوں آئے تے ٹیلی ویژن سکرین تے آکے چیتا کروایا جو میاں نواز شریف نے دو واری اے پی ڈی ایم دے نال الیکشن دے بائیکاٹ دا اعلان کیتا سی پر مگروں اپنی سیاسی حکمت عملی بدل لئی۔
سیاست کدی کوئی اٹل حقیقت نہیں ہوندی۔ اوہ اپنیاں منگاں موجب راہ بدلدی تے نویاں شکلاں پھڑ دی رہندی ہے۔ سوادی اتفاق ویکھو جو کل تیکر زرداری ہوریں مسلم لیگ قاف نوں '' قاتل لیگ '' کہندے رہے تے مسلم لیگ نون والیاں دا حال ایہہ سی جو اوہناں دے مونہوں کدی بے دھیانی وچ چودھری برادران دا ناں نکل جاوے تے اوہ اوسے ویلے کرولی کرنا فرض سمجھدے سن۔ اک خبر موجب اج اک پاسے جاوید ہاشمی نے فون تے چودھری شجاعت توں مدد منگی ہے دوجے پاسے نون لیگ نے چودھری نثار تے اسحاق ڈار نوں پنجاب وچ نواں اتحاد بناون تے اپنے صدارتی امیدوار دی حمیت لین دی خاطر قاف لیگ نال رابطے دا اختیار دے دتا ہے۔ تیجے پاسے پیپلز پارٹی والے جھولی کھلار کے چودھریاں دے بوہے کھڑکا رہے ہین۔ پیپلز پارٹی دا مسئلہ صدارتی چون نہیں، پنجاب ہے، چوداں مئی دو ہزار چھ نوں میثاق جمہوریت دے سنیہا توں بی بی بینظیر بھٹو تے میاں نواز شریف نے جمہوریت دا اک کوڈ آف کنڈکٹ جاری کیتا سی۔ ججاں دی بحالی دے پاڑ نے اہنوں گئے وقتاں دا قصہ بنا چھڈیا ہے۔
پیپلز پارٹی تے مسلم لیگ نون دا اتحاد ٹٹن دا ڈراپ سین اک اعتبار نال بڑا اسرار والا سی۔ زرداری ہوراں نے اسفند یار ولی تے مولانا فضل الرحمن نوں وچ پا کے پیر نوں ججاں دی بحالی دی قراداد اسمبلی وچ لیاون تے بدھ تیکر منظور کروان دا ارادہ دسیا سی۔ میاں نواز شریف نے پیر دی شام تیکر ججاں دی بحالی تے زور دتا۔ منگل نوں آصف زرداری نے صدارت لئی اپنے کاغذات نامزدگی داخل کرنے سن۔ کیہہ کوئی دس سکدا ہے اہناں دوہواں معاملیاں دا آپو وچ کیہہ تعلق سی؟
اسیں مشرف ہوراں دے ساڈھے اٹھ سال ایس آس وچ لنگھائے جو بی بی بینظیر ( ستائی دسمبر توں مگروں آصف زرداری) تے میاں نواز شریف رل کے ملک نوں جمہوریت دی راہ تے لیاون گے تے اسیں ہمیش لئی آمریت دے خطریاں توں آزاد ہو جاواں گے۔ ایتھے خوشی تے خوشحالی آوے گی پر کنے ہرکھ دی گل ہے جو ملک اچن چیتی اُنی سو اٹھاسی وچ پرت گیا تے اُنی سو نڑینوے ول ٹر پیا ہے۔ لگدا ہے جو ایس وار سفر دی رفتار پہلوں توں بوہتی تیز ہووے گی۔
میاں صاحب تے زرداری ہوراں وچ اخیرلی وار پاڑ صدارتی چون تے ہویا۔ دوہواں نے معاہدہ کیتاسی جو اٹھونجاہ ٹوبی مک گئی تے صدارت پیپلز پارٹی نوں ملے گی۔ دوجی صورت وچ کسے غیر جانبدار ہستی توں چنیا جاوے گا۔ پھیر متحدہ قومی موومنٹ دے آگو الطاف حسین نے اچن چیتی آصف علی زرداری نوں امیدوار دے طور تے چنیا۔ پیپلز پارٹی نے حمیت کیتی تے زرداری نے نامزدگی قبول کر لئی۔ ایہدے توں وکھ ججاں دی بحالی وی اگے پا دتی گئی۔جواب وچ میاں نواز شریف نے اتحاد توڑن دا اعلان کیتا تے ریٹائرڈ چیف جسٹس سعیدالزماں صدیقی نوں اپنا صدارتی امیدوار نامزد کر دتا۔ نمبر گیم دے اعتبار نال ایہہ کوئی اوکھا مقابلہ نہیں۔ پیپلز پارٹی تے اوہدے اتحادی زرداری ہوراں نوں سوکھیاں ہی چون کروا لین گے۔
کہیا جاندا ہے جو ملک دی سب توں وڈی پارٹی دے لیڈر ہوون دے مگروں وی آصف علی زرداری بوہت متنازعہ ہین۔آؤ میاں نواز شریف ہوراںدے غیر جانبدار تے غیر متنازعہ صدارتی امیدوار تے نظر پاونے آں۔ اوہناں دی نامزدگی دا سن کے مینوں اپنے تے اپنے سنگی لکھن والیاں دے اوہ نوحے چیتے آگئے۔ جیہڑے اک گئے دور وچ تقریباََ ہر اخبار وچ چیف جسٹس (ر) سجاد علی شاہ لئی چھپے سن۔ ایہہ قصہ اینا پرانا نہیں جو لوکاں دے ذہن وچوں نکل گیا ہووے۔ سجاد علی شاہ نوں بی بی نے دو سینئر ججاں تے ترجیح دے کے سپریم کورٹ دا چیف جسٹس لایا سی مگروں اوہ اُس ویلے دے صدر فاروق لغاری نال رل کے بی بی دے خلاف ہو گئے۔ بینظیرحکومت ٹٹی، نویاں چوناں ہوئیاں تے میاں نواز شریف وزیر اعظم بن گئے۔ میاں صاحب نے فیصل آباد وچ کجھ بیوروکریٹس نوں ہتھکڑیاں لوایاں۔ سجاد علی شاہ نے آپوں نوٹس لیا۔ چیف جسٹس تے وزیر اعظم وچ پاڑ ہو گیا تے پھیر سجاد علی شاہ نے خصوصی عدالتاں بناون دی مخالفت کیتی۔ اوہناں دی گل نہیں سنی گئی۔ پاڑ ہور ودھیا۔ لغاری ہوریں اپنے اختیار کھسن دے کارن ناراض سن۔
چیف جسٹس ہوریں ایس لڑائی وچ پارٹی بنے تے حکومت نوں کھجل کرن دے پچھے ہو گئے۔ پھیر رفیق تارڈ ہوریں اک اُچیچے طیارے راہیں کوئٹہ گئے۔ اوتھے سجاد علی شاہ دے مخالف جج ارشاد حسن خان دی قیادت وچ اک ڈویژن بنچ موجود سی۔ اک درخواست دائر ہوئی تے کوئٹہ بنچ نے سپریم کورٹ دے پروسیجر نوں نظر انداز کردیاں ہوئیاں اپنے چیف جسٹس نوں کم کرن توں روک دتا۔ کجھ دناں مگروں سعید الزماں صدیقی ہوراں دی پردھانی وچ اک وڈے بنچ نے سجاد علی شاہ نوں چیف جسٹس دے عہدے توں لا دتا۔
ایہہ خورے دنیا وچ عدلیہ دی تاریخ وچ اپنے ورگا پہلا ہی واقعہ سی ججاں نے ٹولا بنا کے اپنے چیف جسٹس نوں اوہدے عہدے توں ہٹا دتا۔ سجاد علی شاہ نے آئین ہیٹھ فوج کولوں مدد منگی۔ اوہ تے نہیں آئی پر لہور توں مسلم لیگ نون دے لیڈراں تے کارکناں دا اک جلوس سپریم کورٹ تے چڑھ دوڑیا تے چیف جسٹس نوں اپنی جان بچاون لئی عدالتوں نسنا پیا۔ ایس نموشی والے کھیڈے دے مرکزی کردار سعید الزماں صدیقی سن۔ اوہ اجمل میاں دے مگروں چیف جسٹس بنے تے پھیر جنرل مشرف دے ہتھوں اپنے انجام نوں اپڑے۔
ایہہ واقعہ میں صرف ایس لئی لکھیا ہے جو میرے سارے پیٹی بند بھراواں نوں اپنیاں لکھتاں چیتے آجاون جیہڑیاں اوہناں نے سجاد علی شای دی غیر آئینی برطرفی دے خلاف لکھیاں سن۔ ہو سکدا ہے ایس حوالے نال اوہناں نوں اپنے جذبے وی چیتے آجاون جیہڑے اُس ویلے اوہناں دے دل نوں چیر رہے سن۔
سعید الزماں صدیقی ہوریں اج وی ساڈے ہیرو ہین۔ بدلتا ہے رنگ آسماں کیسے کیسے
ٹردیاں ٹردیاں پیپلز پارٹی تے مسلم لیگ نون دے لیڈراں نوں اک سوال ہن چودھری برادران تے اوہناں دے سنگیاں دی کرپشن دا حساب کون لوے گا؟
