کجھ ماڑی موٹی ادل بدل توں مگروں امریکہ دا بنایا ہویا پاکستانی سیاست دا پلان ٹھکانے بیہہ گیا ہے۔اہدے توں بے پرواہ کہ عدلیہ سنے چیف جسٹس افتخار محمد چودھری بحال ہووے یاں نہ ہووے ایہہ ظاہر ہو گیا ہے جو پاکستان پیپلز پارٹی مشرف دور نوں جاری ساری رکھن لئی جہاد کررہی ہے۔ مشرف دور دے پربندھ تے کئی طاقتاں دے اتحاد نوں وی قائم رکھن دیاں بھرویاں کوششاں کیتیاں جارہیاں ہین۔جنرل مشرف دے چہرے دی تھاں آصف علی زرداری دا اُبھرنا اُکا لیپا پوتی ہے تے ایہہ نظام کدوں تیکر چلدا رہوے گا جدوں تیکر اک ہور عوامی لہر اہدی تباہی نہیں بلا دیندی۔
کجھ خاص گلاں تے غور کرئیے تے اک طرحاں زرداری دے کول جنرل مشرف توں بوہتی طاقت ہووے گی۔ اوہ ایس لئی جو جنرل مشرف دے مقابلے وچ زرداری جیہڑی کنگز پارٹی دے آگو ہین اوہدیاں جڑاں لوکائی وچ کسے حد تیکر ہین۔ مسلم لیگ قاف وانگوں پیپلز پارٹی وی بھیڈاں دا اِجڑ ہووے گا جنہوں جیہڑے پاسے مرضی ہِک دتا جاوے۔ اوہ وی مسلم لیگ قاف تے جنرل مشرف دی ریت تے چلدیاں ہوئیاں زرداری دیاں ناجائز چاہواں تے مہر لاوندی رہوے گی۔ حقیقت ایہہ ہے جو زرداری دے ہتھاں وچ طاقت دے غلط ورتن لئی بوہتے موقعے ہین۔
مثال دے طور تے جے جنرل مشرف اسمبلیاںنوں توڑ دے سن تے اوہناں نوں ناں دی ہی سہی پر سپریم کورٹ توں اپنے فیصلے دی منظوری لینی پیندی سی۔پر جے زرداری نوں اوہی کجھ کرنا ہے تے اوہناں نے صرف اپنے تابعدار وزیر اعظم نوں اک فون کرنا ہے ۔ ایہدے تے کوئی آئینی اڑیچ نہیں کیوں جو وزیر اعظم نوں اسمبلی نوں کالعدم کرن دا آئینی حق ہے۔
جنرل مشرف وانگوں آصف علی زرداری نے وی اپنے آلے دوالے حکمران طبقے دے اوہناں لوکاں نوں کٹھا کیتا ہویا ہے جیہڑے چنے جاون دے قابل نہیں ہین۔ زرداری دی کچن کیبنٹ تے اوہناں دی میڈیا تے نمائندگی کرن والے بوہتے او لوک ہین جنہاں نے کدی اپنے محلے توں وی الیکشن نہیں لڑیا۔ اوہدے مقابلے وچ مسلم لیگ نون نوں ویکھو تے اوہناں دے پالیسی میکر تے میڈیا نمائندے چون ہو کے آئے ہین تے اوہناں دا لوکائی نال ڈوہنگا تعلق ہے۔
عدلیہ ولوں وی زرداری جنرل مشرف دے اصولاں تے چل رہے ہین۔ زرداری ہوراں اپنے چھیکڑلے بیان وچ جسٹس چودھری تے الزام لایا ہے جو اوہ بوہت سیاسی ہو گئے ہین۔ ایہہ فضول الزام ہے کیوں جو پبلک تے بار روم دے خطاباں وچ چیف جسٹس نے کدی وی قنونی تے آئینی دائرے توں نکل کے سیاسی گل بات نہیں کیتی ۔سوال ایہہ ہے جو ایس دے مگروں وی اوہناں تے سیاسی ہوون دا الزام کیوں لایا جارہیا ہے؟
بوہت سارے غیر جانبدارمبصر من دے ہین جو چیف جسٹس تے ایہہ الزام اوہناں دیاں تقریراں دے کارن نہیں لایا جارہیا سگوں اوہناں کاروائیاں دے کارن لایا جارہیا ہے جنہاں وچ اوہناں نے اپنے سر تے طاقت ور سرمایاداراں تے جاگیرداراں دے خلاف مقدمے بنا کے سزاواں دوائیاں۔ کیوں جو زرداری ہوریں اہناں طبقیاں دے نمائندے ہین ایس لئی اوہناں نوں چیف جسٹس سب توں وڈے سیاست دان لگن تے ایہدے وچ کسے نوں کوئی حیرانی نہیں ہوونی چاہی دی۔ جے اوہ جنرل مشرف وانگوں بے جا غیر قنونی چاہواں تے مہراں لاوندے رہندے تے پھیر ہی اوہ غیر سیاسی سمجھے جاندے۔
چیف جسٹس دے سیاسی ہوون دیاں کجھ مثالاں ویکھو۔ سٹیل انڈسٹری نوں کوڈیاں دے بھاء ویچن توں وکھ اوہناں نے وانی تے کاروکاری دے شکار مظلوماں دے مقدمے اپنے سر تے شروع کیتے۔ اہناں مقدمیاں وچ بوہتے بندے سندھ دے جاگیردار سن تے اوہناں وچوں بوہت سارے پیپلز پارٹی نال تعلق رکھدے سن۔ چیف جسٹس دی کوشش سی جو انج دے لوکاں نوں انصاف دے کٹہرے وچ کھلیاریا جاوے۔ ایہہ جاگیردار اشرافیہ نوں کسے طریقے قبول نہیں سی۔ آصف علی زرداری اصل وچ چیف جسٹس دے اہناں فیصلیاں نوں سیاسی ہوون دا ناں دے رہے ہین۔
آصف زرداری سندھ تے مغربی پنجاب دے ایس جاگیردار پوش دے نمائندے ہین جیہڑے اپنے اپنے علاقے تے بادشاہی چاہندے ہین، ایہدے وچ چیف جسٹس دی دخل اندازی بڑا وڈا جرم ہے۔ اُنج تے امیراں یاں غریباں تے انصاف دا ہر چالا سیاسی عمل ہی ہوندا ہے۔ پر سوال ایہہ ہے جو انصاف کیہدے حق وچ ورتیا جارہیا ہے ؟ جے صاحب اختیار طبقے قنون نوں اپنا آلہ بنائی رکھن تے وی سیاسی عمل ہے جیس تے زرداری ورگیاں نوں کوئی اعتراض نہیں ہے۔ پر جے کوئی چیف جسٹس افتخار چودھری وانگوں ایہہ انصاف غریباں دے حق وچ ورتنا شروع کر دیوے تے سیاست بازی اکھواندی ہے۔
ہن تیکر تے حکمران طبقے قتل تے لٹ مار کر کے وی محفوظ سن پر چیف جسٹس نے ایس تاریک دائرے نوں توڑن دی کوشش کیتی۔ اوہ ایس میدان وچ پہلے تے کلے مرد حق سن۔ تے ظاہر گل ہے جو اہنوں عدلیہ دی ناجائز کاروائی دا ناں دتا گیا۔ چیف جسٹس افتخار محمد چودھری صرف مشرف دے ساہمنے انکار کرکے ہیرو نہیں بنے سگوں اوہناں دی غریب نوازی نے اوہناں نوں طلسماتی ہیرو دا درجہ دتا۔
مسلم لیگ نون نوں جسٹس چودھری دا طلسم چھیتی سمجھ وچ آگیا تے ایہدے کارن اوہنے ٹٹی بھجی تنظیم دے نال وی چوناں وچ آس توں ودھ کامیابی پائی۔ بینظیر بھٹو شہید نوں وی ایس طلسم داگویڑ سی تے اوہناں نوں حقیقت توں جانکاری سی کہ تسیں انسان نال لڑ سکدے او اوہدے طلسم نال نہیں۔ ایس لئی اوہ اینے دبا دے مگروں وی چیف جسٹس دے گھر دے ساہمنے گئیاں تے اوہناں نوں جائز تے قنونی چیف جسٹس منیا۔
قبرستان اوہناں لوکاں نال بھرے ہوئے ہین جیہڑے ذوالفقار علی بھٹو نوں مٹاون دی کوشش کردے رہے ہین۔ زرداری وی اُس ہسپانوی '' جھلے '' ڈان کوئکزاٹ دی پیروی کر رہے ہین جیہڑا ہوائی چکیاں دے خلاف جنگ لڑدیاں لڑدیاں مکیا سی۔ اوہ لوکائی دے نمائندیاں دے نال جنگ نہیں لڑ سکدے۔ تے بدنصیبی نال اوہناں دے کول جنرل مشرف والے پرانے ہتھیار ہی ہین۔ جے جنرل مشرف اینی طاقت دے مگروں وی اپنا آپ قائم نہ رکھ سکے تے زرداری ایہہ کیویں کر لین گے؟
ایہہ گل چٹی ننگی ہے جو زرداری تخریبی راہ تے ٹر رہے ہین تے اوہناں دا اوہی انجام ہووے گا جیہڑا بھٹو دے طلسم دے نال لڑن والیاں دا ہویا۔
