ایہہ طاقت دی سیاست ہے، سبھے اصولاں توں وڈا اصول کرسی تے قبضہ ہے۔ فیر اصولاں تے رولا پاؤن دی کیہہ لوڑ ہے۔ جے ن لیگ نے وی ق لیگ ہی دی پدھر تیک آنا سی تاں رولا کس بات دا۔ اَج ایہہ سوال ہر بندہ پچھ رہیا ہے۔
ن لیگ نے پچھلے 5 مہینیاں وچ ایہہ پروپیگنڈہ کیتا کہ اوہ تے اصولاں تے کھلوتی ہے پر پی پی پی والے بے اصولی کریندے پئے نیں۔ عمران، قاضی توں لے کے وکیلاں دے آگو وی اہناں دی گل منیندے رہے۔ پر جدوں ق لیگ دی ہیلپ نال کرسی نظر آئی تے اصول موندھے ہوگئے، موڑھے پٹھے کر دتے گئے تے دکان توں ایہہ بورڈ ہٹا دتا گیا ''ایتھے کُتیاں تے ق لیگیاں دا داخلہ بند ہے''۔ ایس توں ایہہ گل ثابت ہو گئی کہ میاں ہوری وڈے جج دے مسئلہ نوں وی وڈی کرسی لئی ورتدے پئے نیں۔
47 توں پہلاں کانگرس دی سیاست وچ 5 چہرے سن۔ مسلماناں نوں کھجل کرن لئی آزاد، ہندو اَت گرداں نوں نال رلاون لئی پٹیل، بھُکی ننگی لوکائی نوں جھاکا دین لئی گاندھی، سوشلسٹاں تے کمیونسٹاں نوں ٹرک دی بتی دے مگر لاون لئی کرشنا مینن تے پی سی جوشی اتے مغربی تعلیم وچ ڈبے ہویاں لئی نہرو۔ جتھے لوڑ پیندی، انج دے چہرے دا ماسک کانگرس تے ڈنگ ٹپاون لئی چڑھا دتا جاندا۔ پر اصلوں کانگرس سیٹھاں تے مال داراں دے مفاداں نوں اگے رکھدی سی۔
ایہو وجہ سی جدوں ہندوستان نوں اک رکھن اتے سیٹھاں دے مفاداں وچوں اک دی چون کرنی سی تاں اُس نے کمزور مرکز دا حمایتی کابینہ پلان کوڑ آکھیا اتے ٹٹیا ہویا پر مضبوط مرکز والا بھارت سیٹھاں نوں پیش کیتا۔ انج جاپدا ہے کہ میاں ہوراں وی نیڑے نیڑے اپڑ رہے نیں۔ پاکستان دا کابینہ مشن تے جمہوری میثاق ہی ہے جس توں میاں ہوری کیوں پرانہہ ہو رہے نیں ایہہ سب جاندے نیں۔ کرسی لئی جے میاں ہوری ق لیگ نال جپھی پاون گے تاں ججاں دے مسئلہ نوں اوہی ہوسی جیہڑا سبھاش چندر بوس نال ہویا سی۔ اَج کل میاں جی ایسے دوراہے تے آلتی پالتی مارے بیٹھے نیں۔ میاں ہوراں دے سجن بھانت بھانت دی بولیاں بول رہے نیں۔ کوئی اپنے آپ تے ''نثار'' ہویا جاندا ہے، کوئی ''رفیق'' لبھن دی دوڑ وچ ہے، کوئی منصورہ برانڈ ''احسن'' رستیاں دی تلاش وچ ہے، کوئی پنجاب دی چوٹی دا ''شہباز'' ہے، کوئی ''جھگڑے'' نوں متھی بیٹھا ہے۔ پَر میاں ہوراں نیں ایہہ ناں ہون دِتا، کیوں؟
ہور تے ہور ایم کیو ایم دے خلاف لندن اے پی سی وچ رولا پاون والے وی ''چورنگی'' تے آن کھلوتے نیں۔ جے ایہہ کم پی پی پی کرے تے اوہ چور، لوکائی دی ویری اَتے غدار، تے جے ن لیگ کرے تاں اوہ سعد۔ پی سی او ججاں نوں دبئی وچ منن توں لے کے 29 ججاں دی تجویز دین تے منظوری کروان وچ گوڈے گوڈے شامل ن لیگ مٹھا مٹھا ہپ ہپ کریندی نظر آوندی ہے۔ سیاست وچ وکیل وی کیہہ کرن؟ جانوں تے اوہ بہوں نیں پر جے ن لیگ تے وی دھوکہ دین دے الزام لگا دین تاں فیر اوہناں دی تڑیاں لاون دی طاقت بہوں گھٹ جاندی ہے۔ بس ایسے ڈر توں اوہناں میاں جی نوں فی الحال ''مافی'' دتی ہوئی ہے۔
ہن اڈیک ایس خبر دی ہے کہ (ق) لیگ نوں کیہڑا رام کریندا ہے۔ ویسے ن لیگ والے ق لیگ نال رابطیاں توں اُسے طرحاں انکاری نیں جس طرح اوہ مشرف دور وچ ''شہباز دیاں نیاز مندیاں'' نوں ذاتی رابطے آکھدے سن۔ جے آصف + نواز بینظیر دی گل تے عمل کر کے جمہوری میثاق نوں من لیندے اتے سارے پی سی او ججاں نوں فارغ کردیندے تاں ایہہ مسئلے کدی پیدا نہ ہوندے۔ سامنے کرسی ویکھ کے منہ وچ پانی آ ہی جاندا ہے۔ جو بولے سو نہال
Comment: مینوں تے سمجھ نہیں آؤندی ایہہ عامر صاب خورے ساری دنیا نوں انھا سمجھدے نیں۔ ہر بندھ جیہنوں بھورا وی عقل ہے زرداری صاب دے کرتوت ویکھ رہیا ہے تے عامر صاب انھے واہ اوہناں دی حمیت وچ لکھی جا رہے نیں۔ عامر صاب وچار تے اج شاہین صہبائی دی لکھت پڑھو تہاڈیاں اکھاں کھلن تے تہاڈیاں اکھاں توں پٹی لتھے۔ کسے پارٹی دا ہمدرد ہونا چنگی گل ہے پر گل اوہ کرو جیہدے نال لوکاں دا وی بھلا ہووے۔ اک بندے دے بھیڑے کارے لکاؤن لئی دوجیاں تے گند سُٹی جانا وی کوئی سیانف نہیں ہوندی۔ باقی اگلی واری سہی
