ایہہ جمہوریت وی انوکھی شے ہے جیہدے وچ کدی ہندوستان دی پھولن دیوی پارلیمان دی رکن بن جاندی ہے تے کدی پاکستان وچ آصف علی زرداری ملک دے صدر دے امیدوار۔پر ایہدے توں وی انوکھے پاکستان دے حالات ہین جنہاں وچ آصف علی زرداری تے نواز شریف کدی اک دوجے دے جانی دشمن بن جاندے ہین تے کدی اتحادی، بیلی، تے اوہناں موجب اک دوجے دے نکے وڈے بھرا بن جاندے ہین۔
پاکستان دی تاریخ دا جبر کہو یاں ظلم جو آصف علی زرداری جنہوں پنجاب تے سندھ دی پلس نے اودوں دے وزیر اعظم نواز شریف دے چمچے تے سندھ وچ آئی جی پلس رانا مقبول مشہور رانا بولا دی پردھانی وچ کراچی دے سول لائنز تھانے وچ مارا مار کر کے زبان وڈھن دی کوشش کیتی سی ایسے آصف علی زرداری نے ہی شریف برادران دے بھیڑے دناں وچ اوہناں ول دوستی دا ہتھ ودھایا سی۔
شریف برادران جنہاں دے ابا جی نوں وی بینظیر بھٹو دے پچھلے دور حکومت وچ پھڑیا گیا سی تے کہندے ہین آصف علی زردای پی پی پی دی پچھلی حکومت وچ بینظیر بھٹو نوں ایہہ دسن وچ کامیاب ہو گئے سن جے ایس ملک وچ سیاست کرنی ہے تے سانوں شریف خاندان نالوں ودھ امیر بننا پوے گا( پھیر تسیں ویکھیا اوہ دولت وچ شریف خاندان نوں بوہت پچھے چھڈ گئے۔)
ہن شریف برادران جنرل پرویز مشرف تے اوہدی فوج دے قیدی سن۔ نواز شریف کراچی وچ ایسے جیل وچ سن جتھے آصف علی زرداری قید سن، سزائے موت یاں عمر قید سنائے جاون دے خطرے دی تلوار کچے دھاگے وچ بنھی اوہناں دے سر تے لمک رہی سی۔ پاکستانی فوجی اسٹیبلشمنٹ دے لاڈلے بن کے رہن والے نواز شریف لئی جیل واقعی بوہت بھاری پئی سی کہ نارملی شریف خاندان دے گھر تے خورے ہی پلس والا وی کدی آیا سی۔ آصف علی زرداری دا جے پرائم منسٹر اک تے جیل دوجا گھر سی۔ اہناں حالاں وچ آصف علی زرداری نے اپنی سالگرہ دے موقعے تے نواز شریف نوں کیک گھلیا سی تے انج شریف خاندان دی بھٹو ناں توں کئی ورہیاں توں دشمنی گھلن لگ پئی سی۔
جدوں نواز شریف تے کراچی انسداد دہشتگردی دی عدالت وچ ہائی جیکنگ دے الزام وچ مقدمہ چلن لگا تے نواز شریف دے دفاع دے اک وکیل نوں کراچی وچ قتل کر دتا گیا تے دوجے فوجداری وکیل لہور توں آوندیاں گھابر دے سن تے انج دے اوکھے ویلے وچ آصف علی زرداری نے اپنے وکیل بیرسٹر عزیز اللہ شیخ دا ناں نواز شریف نوں اوہناں دی وکالت لئی دسیا سی۔
بیرسٹر عزیز اللہ شیخ سندھ وچ کیہہ پاکستان وچ کرمنل کیساں دے اک بوہت وڈے وکیل سن ۔ اوہ کدی سندھ وچ ولی خان دی نیشنل عوامی پارٹی دے صوبائی صدر سن تے بھٹو دے بدنام زمانہ حیدر آباد کیس وچ ولی خان سنے پختون تے بلوچ قوم پرستاں دی وکالت کرن تے آپوں وی جیل سٹ دتے گئے سن۔
آصف علی زرداری دے ایہہ وکیل بیرسٹر عزیز اللہ شیخ نواز شریف دے وی وکیل بن گئے۔ فیصلہ تے اصل ججاں نوں نہیں جی ایچ نوں ہی کرنا سی پر ایہہ نارسائی اگر اپنی تقدیر تھی، تیری الفت تو اپنی ہی تدبیر تھی' والی گل سی۔عزیز اللہ شیخ نے اپنے ولوں نواز شریف دے دفاع وچ کوئی کسر نہ چھڈی۔ نہیں تاں نواز شریف دی زرداری دشمنی دا ایہہ وی سن دے جاؤ جدوں مئی اُنی سو اٹھانوے وچ نواز شریف حکومت وچ کراچی تربت فضائی روٹ تے پی آئی اے دا طیارہ اغوا یاں اغوا دا ڈرامہ ہویا سی تے اہنوں جدوں اک ڈرامائی آپریشن راہیں حیدر آباد سندھ دے ہوائی اڈے تے لاہیا گیا سی تے نواز شریف حکومت نے اک وڈے پلس افسر نوں ایس ہائی جیکنگ دا کیس اُس ویلے جیل وچ قید آصف علی زرداری دے خلاف قائم کرن دا کہیا سی جیس تے سندھ پلس دے ایس افسر نے انج کرن توں انکار کر دتا سی۔
نواز شریف نوں عمر قید دی سزا تے ہوئی پر سعودی انٹیلی جنس تے سعودی حکمران نال خصوصی تعلقاں دی بناء تے اوہناں دی مداخلت توں پرویز مشرف نوں اوہناں نوں معافی دینی پئی تے شریف خاندان سعودی عرب جاندا رہیا۔ ایہہ اُس ویلے ہویا جدوں اوہناں لئی لہور تے کراچی دیاں سڑکاں تے مسلم لیگ سنے حزب مخالف دے کارکن پلس دے ہتھوں مار کھا رہے سی۔ سعودی بادشاہ تے سعودی انٹیلی جنس دے شریف خاندان نال خاص تعلق رہے ہین۔ اک ویلے وچ جدوں بینظیر بھٹو حکومت نے اوہناں لئی واہوا کاروباری اوکڑاں پیدا کر دتیاں سن تے الفیصل بنک نے شریف خاندان نوں واہوا قرضے دتے سن۔
پر اودوں تیکر بینظیر بھٹو تے آصف علی زرداری وی سیاست وچ ایہہ اصول وی سکھ چکے سن کہ ' کہو اک چیز تے کرو دوجی چیز ''۔ آصف علی زرداری دے نال ایس ویلے وی آئی ایس آئی دے اودوں دے ڈائریکٹر جنرل اشفاق پرویز کیانی ہور ثالثاں راہیں رابطے رکھے ہوئے سن تے اوہناں نوں کجھ چر مگروں پہلوں پمز اسلام آباد وچ داخلہ تے پھیر رہائی ہوئی جنہوں ایس ویلے آصف تے پیپلز پارٹی نے '' باضمیر ججاں '' دی کرنی آکھ دتا سی۔
آصف دی جیل توں رہائی توں مگروں بینظیر بھٹو تے آصف علی زرداری عمرے لئی سعودی عرب گئے سن تے سرور محل وچ نواز شریف نال ملنی کیتی سی۔ ایہہ بینظیر بھٹو تے زرداری دی مدتاں مگروں نواز شریف نال اک تھاں پہلی وار ملنی سی۔
ایس ویلے وی بینظیر بھٹو نال پاکستان دے فوجی آمر جنرل پرویز مشرف تے آئی ایس آئی دے جنرل اشفاق کیانی راہیں رابطے جاری سن جدوں لندن وچ اپریل دو ہزار چھ نوں نواز شریف تے اوہناں وچکار چارٹر آف ڈیموکریسی تے پہلے مذاکرات تے پھیر دستخط ہو رہے سن۔
دوستی دی پہل ہمیش خورے پاکستان پیپلز پارٹی ولوں تے وعدہ خلافیاں وی اوہناں ولوں ہی ہوئیاں ہین جیہدے نتیجے وچ ہن اوہ حکمران اتحاد ٹٹ چکیا ہے جیس دے سکہ رائج الوقت دے اک پاسے زرداری دی شکل تے دوجے پاسے نواز شریف دی مورت سی۔ ایہہ خورے پاکستان دی کٹر پنجابی اسٹیبلشمنٹ تے فوجی تانہ شاہی نوں ایہو منظور سی یاں پھیر پاکستان دی روز دی زندگی وچ نویں اکھان بن چکی ہے ' وہ وعدہ ہی کیا جوزرداری وفا کرے''۔
پر سیاسی بیوفائیاں دی تیز رفتار ٹرین توں جے کوئی ڈگ رہیا ہے تے اوہ ہے پاکستان دی لوکائی۔
