کوئی اک مہینہ پہلوں ھانگ گانگ توں ایشین ہیومن رائٹس کمیشن نے اک پریس ریلیز جاری کیتا جیہدے وچ کہیا گیا جو بلوچستان دے ضلع نصیر آباد دے اک پنڈ باباکوٹ وچ عمرانی قبیلے دی میٹرک تے انٹرمیڈیٹ دیاں تناں پڑھیاراں نے پسند دا ویاہ کرن لئی عدالت نال رابطہ کیتا۔
پریس ریلیز موجب ایس معاملے دی بھنک جدوں پیپلز پارٹی دے رکن صوبائی اسمبلی تے بلوچستان دے وزیر ہاؤسنگ تے تعمیرات صادق عمرانی دے بھرا عبدالستار عمرانی دے کن وچ پئی تے اہناں تناں کڑیاں نوں دو بڈھیاں زنانیاں دے نال سرکاری نمبر پلیٹ دی لینڈ کروز وچ پایا گیا تے نیڑلے علاقے وچ اک ویران تھاں تے تناں پڑھیار کڑیاں نوں گولی ماری گئی تے اوہناں نوں گھٹو گھٹ چھ مسلح بندیاں نے بوہت پھٹڑ حالت وچ ٹویے وچ پا دتا۔ رولا پاون تے دوہواں بڈھیاں زنانیاں نوں وی ایسے ٹوئے وچ پا دتا گیا تے پھیر زمین اِکو جیہی کر دتی گئی۔
ایس رپورٹ نوں ویکھدیاں ہوئیاں بی بی سی نے صوبائی وزیر صادق عمرانی نوں پچھیا تے اوہناں دسیا تناں زنانیاں نوں مار کے نپن دا واقعہ تے اوہناں نوں پتہ لگیا ہے۔ پر ایس واقعے وچ اپنے بھرا نوں شامل کرن تے اوہ ایشین ہیومن رائٹس کمیشن دے خلاف قنونی چارہ جوئی دا حق محفوظ رکھدے ہین۔
پرایس واقعہ نوں اک مہینے توں ودھ لنگھن توں مگروں وی نہ تے صادق عمرانی نے ہیومن رائٹس کمیشن دے خلاف قنونی چارہ جوئی کیتی ہے۔نہ ہی ایس واقعے دی مقامی پلس نے رپورٹ درج کیتی ہے۔ بس وفاقی مشیر داخلہ، وزیر اطلاعات تے سینیٹ وچ قائد ایوان نے کہیا ہے جو ایس معاملے دی پن چھان کیتی جارہی ہے جدوں کہ بلوچستان اسمبلی ایس معاملے تے اُکا چپ ہے۔ حکمران اتحاد دی کسے جماعت نے ہن تیکر اک لفظ نہیں کہیا تے نہ ہی مسلم لیگ نواز نوں ایہہ معاملہ بوہتا سنجیدہ لگ رہیا ہے۔
سینیٹ وچ پر مسلم لیگ ق دی سینیٹر یاسمین شال تے کامل علی آغا نے ایس واقعے نوں چکن دی کوشش کیتی۔ سینیٹ دے ڈپٹی چیئر مین جان محمد جمالی نے کہیا کہ اوہ ایس واقعے تے کوئی تبصرہ نہیں کرن گے کیوں جو عمرانی قبیلہ اوہناں دے قبیلے دا گوانڈھی ہے۔ پر بلوچستان دے اک سینیٹر میر اسرار زہری نے کھل کے کہیا انج دیاں زنیاں نوں دفن کرنا بلوچ ریتاں دا حصہ ہے تے ریتاں توں مکریا نہیں جاسکدا۔ پر پنجاب نال تعلق رکھن والے اک بلوچ سینٹر جمال لغاری دا کہنا ہے جو بلوچ وسیب وچ انج دی کوئی ریت نہیں ہے۔
ایس وچکار میڈیا نے سینیٹر اسرار زہری دے لتے لینے شروع کر دتے ہین۔ حالانکہ پاکستان دی ہر وڈی جماعت وچ اسرار زہری وانگوں سوچن والے لوک چنگی بھلی گنتی وچ ہین پر اوہ اسرار زہری وانگوں بڑبولے نہیں سگوں اپنے خیالاں نوں منافقت دی چادر دے کے رکھدے ہین۔
ایہدا ثبوت ایہہ ہے جو نو ورہے پہلوں جدوں اک پختون کڑی صائمہ سرور نوں پسند دے ویاہ دے مسئلے تے دن دھاڑے انسانی حقاں دی سر کڈھویں کارکن حنا جیلانی دے لہور دفتر وچ قتل کیتا گیا تے سینٹ دے سو وچوں چار رکناں نے قراداد مذمت دی حمیت کیتی۔باقی یاں تے غیر حاضر رہے، یاں مخالفت کیتی یاں واک آؤٹ کیتا۔
جمہوریت تے انسانی حقاں دا دم بھرن والیاں جماعتاں دے کئی پارلیمان دے رکن انج دے جرگیاں دی صدارت وی کردے ہین جتھے ریتاں توں بغاوت کرن والیاں زنانیاں دی زندگی موت دے فیصلے ہوندے ہین۔
پچھلے گھٹو گھٹ چار عام چوناں وچ تے اِک ٹک ہو رہیا ہے کہ کئی علاقیاں وچ سیکولر تے مذہبی جماعتاں مقامی طور تے گٹھ جوڑ کر کے زنانیاں نوں ووٹ پاون توں روکدیاں ہین۔ ایس مڈھ تے الیکشن کمیشن آف پاکستان نے اج تیکر کوئی چوناں دا نتیجہ منسوخ نہیں کیتا۔
