آصف زرداری دے خلاف اُٹھی واج صرف ممتاز بھٹو دی سی۔ اوہنے چُپ وٹن توں انکار کردِتا سی۔
اج سوموار دی شامیں میں کراچی وچ ممتاز بھٹو دے گھر بیٹھی ہاں۔ اوہ بھٹو قبیلے دا اِکلا سردار ہے جیہدے ست لکھ قبائلی مرید ہین۔ اوہدا ڈیرہ نوڈیرو توں صرف تِن میلاں دے پینڈے تے ہے۔ ایہنوں میر پور بھٹو آہندے ہین۔ ٹی وی چینلاں تے نواز شریف دے حکومتی اتحاد توں وَکھ ہون دیاں بریکنگ نیوز چل رہیاں ہین۔ ممتاز بھٹو اس خبر تے بہوں خوش اے کیونجے صرف تِن مہینیاں پہلاں اوس نے نواز شریف نوں زرداری دے خلاف اپوزیشن وچ بیہن دا کہیا سی۔
"صرف اِنج اِی جمہوریت بچ سکدی ہے" بھٹو قبیلے دے سردار دا آکھنا سی۔" سانوں پارلیمنٹ وچ تگڑی اپوزیشن دی لوڑ ہے۔"
حکمران جماعت تے اوس دے آگو بارے کھُل کے بے دھڑک بولن والا چوہتر ورہیاں ممتاز علی بھٹو اپوزیشن چوں بولن والی اِکلی واج سی۔ جدوں میں آکھیا امین فہیم وی تے باغی ہویا سی ،ممتاز بھٹو نے کھسیانا جیہا ہاسا ہسدیاں ہولی جہیا کہیا ہالہ دا مخدوم زرداری دے دباء ہیٹھ آکے "چُڑمُڑ" ہوگیا اے۔
ممتاز بھٹو دی غصے بھری ناراضگی دا پچھوکڑ وی اے۔ اوہ پی پی پی دے موڈھی ممبراں چوں سی۔ ذوالفقار علی بھٹو نے 1971 ء وچ قوم نال پی ٹی وی تے اِکلی تقریر وچ اوہنوں اپنا " با صلاحیت کزن" جو آکسفورڈ تو پڑھیا اے، آکھ کے مشہور کردِتا سی۔ اوس نے پہلاں اوہنوں گورنر تے مگروں سندھ دا وزیراعلٰی لایا۔ 1984ء آیا تے ذوالفقار علی بھٹو دی دھی نے اوہنوں کڈھ دِتا۔
ممتاز بھٹو دا ایس بارے آکھنا سی " اوہ خطرہ محسوس کردی سی۔ بینظیرحکومت دی بھُکھی سی تے اپنے پیو دے قاتلاں، موقع پرستاں تے منافقاں نال سمجھوتہ کرلیا سی۔ جدوں میں اعتراض کیتا اوہنے مینوں پارٹی چھڈ دین دا کہیا۔"
اپنے اٹھاراں مہینیاں دے دیس نکالے وارے ممتاز بھٹو نے سندھ بلوچ پختون فرنٹ بنایا " ساڈا صرف اک نقطی ایجنڈا سی پئی پاکستان مَتے مطابق اک کنفیڈریشن بنائی جاوے۔" افسوس نال فرنٹ ماٹھا پے گیا تے بینظیر پاکستان ہیروئن بن کے پرتی۔
ممتاز بھٹو اجکل صفائیاں دے رہیا اے" ایہہ رب دی لاٹھی ہے بینظیر نے جو اپنے پیو دی جماعت نال کیتا۔ آصف زرداری اوہدی جماعت نال کر رہیا اے۔" بینظیر نے مرحوم میر افضل خان نوں کہیا سی پئی پی پی پی دے موڈھی (ممتاز بھٹو، مصطفٰی کھر، مصطفٰی جتوئی، شیخ رشید تے مبشر حسن) اوس توں بوہتے مشہور ہین ایس لئی ایہناں "انکلز" توں جان چھڑانی ہووے گی۔ زرداری اپنی تِیویں دے نیڑلیاں نوں ہٹا کے اج اوہی کررہیا اے۔"
ممتاز بھٹو دا پردادا تے بھٹو دا دادا آپس وچ بھرا سن۔ " میں بھٹو دا چاچا ہاں پر اسیں چچیر سمجھے جانے آں۔"
جیہڑے کمرے وچ اسیں بیٹھے ساں اوہ ذوالفقار علی بھٹو دیاں پچھلیاں یادگیریاں نال بھریا سی۔ اک کندھ تے زیب تے نصرت بھٹو مہان چینی آگو ماؤ نال جوان ممتاز دا تعارف کراؤندیاں دی ،آئل پینٹگ سی۔ سٹینڈ تے بینظیر تے زیب دے پورٹریٹ ٹنگے سن۔ مینوں مرتضٰی بھٹو کتے نہیں دسیا جدکہ ممتاز دا آکھنا سی اوہ ذوالفقار علی بھٹو دے بہوں نیڑے سی۔
" میں نومبر 1996 ء وچ بینظیر دی حکومت مُکن تے سندھ دا نگران وزیراعلٰی بنیا تاں میں پہلا کم مرتضٰی بھٹو کیس نوں مُڑ کھولن دا چارہ کیتا۔ اودوں تیک ایہہ گڈمڈ کردِتا گیا تے ساریاں شہادتاں مٹا دِتیاں گئیاں سن۔"
اوہنوں جاپدا اے پی پی پی بھٹوواں نال اے ناں کہ زرداری نال۔ اوہ بی بی دی موت دی تعزیت واسطے اوہدے بندے کول گیا " ساڈی رسم مطابق تعزیت بندے نال ہوندی ہے اوس دے بھرا یاں پیو نال نہیں۔" پر ممتاز زرداری توں پرانہہ رہن وچ کامیاب رہیا۔ وڈے بھٹو ہمیشاں زرداری ول اپنی پچھاڑی رکھی میری مجبوری سی جیکر اسیں مُڑ آہمنے ساہمنے آئے تاں کیویں دا سبھاء کراں گے۔"
ایس توں وکھ اوہنے صنم بھٹو نال دو لمیاں بیٹھکاں کیتیاں۔ ممتاز بھٹو نے کہیا کہ " میں اوہنوں زیب دی اِکلی بچی اولاد ہون پاروں پاکستان پرتن دی منت کیتی۔اوہدا ترلا پایا پئی پی پی پی دِیاں واگاں پھڑ کے، حویلی تے لاڑکانے دوالے اپنی جائیداد سنبھالے۔" پر صنم نے ناں منظور کیتا تے اپنی بہن دِیاں نوڈیرو اخیرلیاں رسماں کرن مگروں، واپس لندن چلی گئی تے اوتھے "چھوٹے جیہے فلیٹ وچ رہن نوں ترجیح دِتی۔
اوہدا خیال ہے پئی فاطمہ بھٹو تے سسی نوں بھٹو دی سیاسی وراثت چوں اپنا حصہ منگن تے کافی چر اے۔ سسی کراچی وچ ہے۔ اوہ اپنے پیو شاہنواز دی قبر تے گئی سی تے اجکل جائیداد وچ اپنے حصے دا دعوٰی کررہی ہے۔ "ایہہ ساری سانجھی جائیداد اے" ممتاز بھٹو نے کہیا۔
اوہناں دے نوڈیرو وچ خاندانی حویلی کدی زیب دی پہلی تیویں دی ملکیت سی۔ اوس دا پیو احمد ایس شاندار جائیداد دا مالک سی پر مگروں بینظیر دے بوہتے زور سے اوہدے ناں کردِتی گئی۔ اپنی جائیداد نوں دین دے بعد امیر بیگم بے گھر ہوگئیاں سن۔ اوہ فیر ساڈے کول رہیاں۔"
اجکل جائیداد زرداری دے بندیاں دے قبضے وچ ہے " ایہنوں وزیراعظم دے دوجے گھر دا ناں دین دا اعلان کیتا گیا اے تے سارے خرچے حکومت چُک رہی جے۔" ممتاز بھٹو مطابق ایتھے گوشت تے سبزیاں دا ہفتہ واری خرچہ پنجاہ ہزار اے۔
کیہہ ممتاز بھٹو امین فہیم تے مصطفٰی جتوئی نال رل کے فارورڈ بلاک بنارہیا اے؟ " نہیں نہیں! امین فہیم زرداری کیمپ وچ پرت گیا اے۔ اوہ پارٹی دباء دا مقابلہ کرن وچ بہوں کمزور اے۔"
فیر اگانہہ کیہہ اے؟ میں پُچھیا " ہور ہفڑاتفڑی" اوس دے جواب تے تاڑی وَجی۔
" امریکہ نے مسلسل مداخلت تے حکومت نوں کنڑول کر کے ساڈے سیاسی نظام نوں جان بُجھ کے ماڑا کیتا اے۔ اوہدا ٹیچا سیاستداناں نوں اِیناں کُو بے اعتبارا کرنا ہے پئی پاکستانی لوکائی اوہناں دے مکراں توں اَک فوج نوں مُڑ سَدن۔ جدوں امریکہ دے ہتھ دا جرنیل حکومت سانبھ لوے گا تاں لوکی ایس تبدیلی تے راضی ہون گے اِنج امریکہ ساڈے تے اپنا ایجنڈا چلاوے گا تے اسیں امریکی ہدایتاں دے ٹٹو بن جاواں گے۔"
آصف زرداری کے اکلے جِیتو بن کے نِکلن نال بھٹو دی وراثت دی جنگ نِمی پے گئی اے ۔ پر اُڈیکو اودوں تیک جد بلاول، بختاور تے آصفہ اپنے کزنز فاطمہ، ذوالفقار علی بھٹو تے سسی دے ساہمنے آون گے تے کتھا اگانہہ نوں تُرے گی۔ پاکستان دے مشہور ٹبر دی رپھڑاں بھری داستان اجے مُکی نہیں اے۔
