اک امریکی اخبار ' بفیلو ٹائمز ' نے خبر دتی ہے جو نیو یارک دے نیڑے اک اسلامی مدرسے دی اِکی سالاں دی پڑھیار کڑی نال جنسی سانگے بناون تے مدرسے دے پرنسپل نوں استعفیٰ دینا پیا۔ اخبار موجب پہلوں توں ویاہے ورے تے ستاں نیانیاں دے پیو پرنسپل ابراہیم میمن نے اپنی اِکی سالاں دی پڑھیار نال انج دے سانگیاں نوں عین اسلامی تے اپنا دوجا ویاہ کہیا۔
بھاویں امریکی قنوناں موجب اک ویلے اک توں ودھ ویاہ بوہت وڈا جرم ہے۔امریکی میڈیا وچ کڑی دے ماپے سگوں مولانا میمن دے مدرسے نوں گھلے جاون والے نیانیاں دے ماپے، تے اک مشہور مسلم ستھ ' مسلم پبلک افیئرز کاؤنسل ' نے وی مدرسے دے پرنسپل دے ایس کم تے بوہت ہرکھ تے غصے دا وکھالا کیتا ہے۔
ماں پیو نے اپنا اولاد ورگا سرمایا مولوی ابراہیم ورگے لوکاں نوں امانت کرکے دتا تے اوہناں امانت وچ خیانت کیتی، مسلم پبلک افیئرز کاؤنسل مقامی آگو ڈاکٹر خالد قاضی دا کہنا سی۔کڑی دے پیو نے کہیا ' اسیں اپنی اولاد نوں مدرسیاں وچ اسلامی پڑھائی لئی گھلیا پر اہناں مدرسیاں وچ نہ امریکہ دا تے نہ کوئی ہور قنون چلدا ہے سگوں اوہناں دا اپنا قنون ہے '۔
مولوی ابراہیم دے خلاف مدرسے دی ڈسپلینری کمیٹی نے ایکشن کیتا تے اک کاروائی دے نتیجے وچ اوہناں نوں پرنسپل دے عہدے توں ہٹ جانا پیا سگوں ہن اوہ کڑیاں نوں کدی نہیں پڑھاون گے۔ ہن منڈیاں دا خدا اوہناں دی عصمت تے عافیت برقرار رکھے ! پر مولوی دا ہوگیا مواخذہ!
جیہڑی امام دی نیت سی اوہ کہندے ہین جو کڑی دی اپنی نیت نہیں سی تے ایس توں پہلوں وی کئی کڑیاں نوں مولوی انج '' دین دی دعوت ' دے چکیا سی۔ اخبار بفیلو نیوز ' لکھدا ہے کڑی موجب مولوی نال اوہدی (کڑی دی ) پہلی گجی ملنی مدرسے دے بیسمینٹ وچ مققل ہیٹنگ روم وچ ہوئی جتھے اوہنے کڑی دے جسم تے ہتھ پھیریا۔ جدوں کڑی نے ایہدے تے اعتراض کیتا تے پھیراوہنے کہیا اوہ عین اسلام موجب اوہدے نال ویاہ کرنا چاہندا ہے۔ انج دے ککڑاں ورگے زانی مولویاں دے انج دے اعمال نوں سندھ وچ لوک (طنزاََ) ' دین دی دعوت کہندے ہین۔۔۔
تے اے ایمان والیو! کیہہ ایہہ وی یہود و نصار دی سازش ہے !
