نکے ہوندیاں توں سن دے آئے آں جو دوہواں بیڑیاں دے سوار کدی پار نہیں لگدے پر اوہ مداری جیہڑا کئی کئی گینداں فضا وچ گھمائی رکھدا ہے تے ڈگن نہیں دیندا۔۔۔۔ اعتزاز احسن نے وی کمال کرتب دا وکھالا کیتا جو تناں کشتیاں وچ سوار ہو کے دریا دے پار اترن دے جتناں وچ رجھے ہوئے ہین پر انج لگدا ہے جو اِکو ویلے وچ نون لیگ، پیپلز پارٹی تے وکیلاں دے نال یارانہ نبھاونا اوکھا ہووے گا تے فنکار نوں چھیتی کسے اک فن دے وکھالے تے رہنا ہووے گا۔ اعتزاز نوں چاہی دا جیہڑا وی فیصلہ کرنا ہووے چھیتی کر لین کیوں جو اہناں بیڑیاں وچ موریاں ہو گئیاں ہین تے موریاں نوں مگورے بن دیاں بوہتا چر نہیں لگدا۔
ڈاکٹر عبد القدیر خان:
ڈاکٹر عبدالقدیر خان دے دھیان وچ ایہہ گل رچی ہوئی ہے جو مشرف دی رخصتی دے نال ہی جدوں اگلے صدر دی تلاش شروع ہووے گی تے ' محسن پاکستان ' دی مانگ ڈالر تے یورو نوں وی پچھاںکردیوے گی تے اوہ سب سیاسی پارٹیاں دے سانجھے صدر دے طور تے پاکستان دے عبدالکلام بن جاون گے پر ایتھے کسے نے اوہناں نوں ایس قابل نہیں سمجھیا جو کجھ لمحیاں لئی اوہناں دے ناں تے غور ہی کر لیندے ایس لئی قدیر خان نوں سمجھ جانا چاہی دا جو اصل وچ ایہہ سیاست دان ہاتھی دے دند ہین۔۔۔۔۔ کھان دے ہور تے وکھان دے ہور۔ ایس لئی محسن پاکستان ہوراں نوں اگے توں ہر بیان سوچ سمجھ کے دینا چاہی دا کیوں جو جے ملک نہ سہی۔۔۔۔باہرلے ملک اوہناں دی '' مانگ '' ودھ گئی تے پاکستان دا بے وفا تے موقعے پرست سیاسی میٹرئیل اوہناں دے کسے کم نہ آوے گا ایس لئی چپ رہنا ہی چنگا ہووے گا۔
وزیر اعظم گیلانی:
اہناں نوں چاہی دا جو وزیر اعظم لگن دی کوشش کرن۔ بھاویں ایہہ کرن وچ تھوڑا جیا رسک وی ہے پر کیہہ کرئیے زندگی اُچیچا سیاست دے کھیڈ وچ لاون والے نوں ہی ملدا ہے۔ ''رسک '' تے '' ریوارڈ '' دا آپو وچ ڈوہنگا سانگا ہے جنہوں سمجھن لئی بوہتی عقل دی وی لوڑ نہیں۔
فلم انڈسٹری:
پاکستان کجھ ہور ہووے نہ ہووے سوادی ملک ضرور ہے جتھے جمہوریت کدی نہیں ہوندی پر جمہوری اکھواندا ہے۔۔۔۔ اسلام کِتے نہیں پر اسلامی اکھواندا ہے۔۔۔۔ بجلی ہے پر واپڈا موجود ہے۔۔۔۔ امن دا ناں نشان نہیں پر قنون نافذ کرن والے ادارے موجود ہین۔ ایہو حال فلم انڈسٹری دا ہے جو نہ ایہدے وچ فلم ہے نہ انڈسٹری پر پھیر وی اکھواندی '' فلم انڈسٹری '' ہے۔ ایس لئی اہنوں چاہی دا جو اپنا ناں بدلے یاں اپنے لچھن بدل لوے۔
طاہر القادری:
پاکستان اک آزاد ملک ہے ایہدا سب توں وڈا ثبوت ایہہ ہے جو ایتھے ہر کسے نوں ایس گل دی آزادی ہے جو چاہے اکھوائے مثال دے طور تے میرے ورگا اپنے ناں دے نال ' علامہ ' لکھنا شروع کر دیوے تے کوئی روک نہیں۔ پرویز مشرف جے اپنے ناں دے نال '' بانی جمہوریت '' یاں '' قائد انقلاب '' ودھا لین تے ایہہ وی چل جاوے گا تے جے شوکت عزیز آپنے آپ نوں '' بابائے معیشت '' اکھوانا چاہن تے وی کوئی پرابلم نہیں کہ پاکستان وچ انج دیاں آزادیاں دے ڈگ لگے ہین تے اوہناں نوں خریدن لئی کسے اتوار بازار نہیں جانا پیندا۔ ساڈے محترم طاہر القادری ڈاکٹر مولانا، علامہ قائد انقلاب وغیرہ ورگے لقباں دا سواد لین توں مگروں پروموٹ ہو کے '' شیخ الاسلام'' ہو چکے ہین تے اوہناں نوں چاہی دا ہے جو ہن ایسے تے فوکس قائم رکھن تے لوکائی نوں ہور کنفیوژ کرن توں ولاون۔
ماروی میمن:
نکے مونہہ نہیں نکی عمر وچ وڈیاں وڈیاں گلاں کرن والی ساڈی ابھردی ہوئی پارلیمنیٹیرین ماروی میمن نوں ایہہ کرنا چاہی دا جو کئی چینلاں تے اپنا '' ایکسپوژر '' چھیتی گھٹ کرن نہیں تاں کجھ مہنیاں وچ اوہ '' اسلم پرویز'' بن جاون گئیاں تے قوم نوں ہرکھ ہووے گا جو ایہہ غنچہ بن کھلے کیوں مرجھا گیا۔ ہوسکدا ہے اپنی گھٹ عمر دے کارن ماروی نوں '' اسلم پرویز ہرکھ '' دا پتہ نہ ہووے جو اسلم پرویز پنجاہ سٹھ دیاں دہائیاں دے وچکار ملک دے مشہور فلمسٹار سن۔ اوہناں تے اک ویلا انج دا آیا جو لہور دے ہر سینما گھر وچ اوہناں دی فلم چل رہی سی پر ۔۔۔۔ پھیر ہویا ایہہ جو اوور ایکسپوژر نے مروا دتا تے اپنے ویلے دا ایہہ چاکلیٹ ہیرو۔۔۔ ولن دے رولز کرن تے مجبور کردتا گیا۔
عمران خان:
کدی تے سیاست وی شروع کرے ایہدے ورگے بندے دا اپنا میرٹ ہی مان نہیں تے دوجیاں دے ڈی میرٹ تے مغز ماری کرن دی کیہہ لوڑ ۔'' تینوں پرائی کیہہ پئی اپنی نبیڑ توں''
تے اُنج وی انج دے کم صرف انج دے سیاست داناں نوں زیب دیندے ہین جیہڑے '' فراڈ'' یاں '' فلوک '' دی پیداوار ہوون۔
پرویز مشرف:
گیت سنن، سوئمنگ کرن گالف کھیڈن برج کھیڈن، باہرلے ملک لیکچراں دی تیاری کرن تیل تے اوہدی دھار ویکھن۔ آپنے آپ نوں ہر اعتبار نال فٹ سگوں سپر فٹ رکھن کیوں کہ اوہ ویلا دور نہیں جدوں لوکائی نوں اوہناں دی یاد اینا ستاوے گی جو لوک سفنیاں وچ وی گاون لگ پین گے '' تیری یاد آئی۔۔۔۔ تیرے جانے کے بعد'' چاہن تے اگلا راؤنڈ وی شروع کر سکن گے۔
میاںمنظور وٹو:
اک زمانہ سی جدوں '' بمار قیدی'' میاں منظور وٹو ہسپتال وچ داخل سی تے فون کر کے کہندے ہوندے سی'' ملن آؤ طبیعت بوہت اداس ہے ''تے میں اک قیدی دا دل رکھن لئی چلا جاندا سی کہ حکمراناں نوں تے کدی جتی دی نوک تے نہیں لکھیا۔ پھیر وٹو ہوریں رہا ہو گئے تے سچ ایہہ ہے جو میں اوہناں دی شکل ہی بھل گیا پر کجھ دیہاڑ پہلوں اوہناںنوں ٹی وی تے ویکھ کے طبیعت خوش ہو گئی۔ اوہ اپنے مخصوص سٹائل وچ قوم نوں ایس گل تے قائل کر رہے سن جو اوہ (پیپلز پارٹی ) پنجاب حکومت نوں ایس لئی وکھ نہیں ہورہے جو اوہناں دے انج کرن نال پنجاب حکومت ڈگ جاوے گی۔
دیوار خستگی ہوں مجھے ہاتھ مت لگا میں گر پڑوں '' گی '' دیکھ سہارا نہ دے مجھے
چھری خربوزے دے اُتے ہووے یاں تھلے۔۔۔کٹنا خربوزے نے ہی ہوندا ہے ایس لئی چھڈن نہ چھڈن دا نتیجہ تے اک جیا ہی ہوندا ہے پر خیر ہے۔ میاں منظور جو کررہے ہین اوہ کردے رہن
