وسعت اللہ خان: آصف زرداری دا دور کنا اک بھیڑا ہووے گا؟
وسعت اللہ خان
September 4th, 2008
فرض کرو صدر آصف زرداری دا دور جے بوہت ای بھیڑا ہویا تے آخر کنا اک بھیڑا ہووے گا؟
کیہ گورنر جنرل غلام محمد توں وی ودھ بھیڑا ہووے گا جیہدے فالج مارے حکماں نوں اوہدی انگریز سیکریٹری توں اڈ کوئی وی نہیں سی سمجھ سکدا۔ کیہ سکندر مرزا دے دور توں وی ودھ برا ہووے گا جیہنے آپنا ای آئین توڑ دے مارشل لاء لا دتا۔ کیہ ایوب خان توں وی بھیڑا ہووے گا جیہنے دھاندلی تے دھونس نال صدارتی چون جتیا تے اپنے ای آئین نوں توڑدیاں اقتدار سپیکر دے حوالے کرن دی تھاں کمانڈر ان چیف نوں دے کے چلا گیا۔ کیہ یحییٰ خان توں وی بھیڑا ہووے گا جیہنے وہسکی وچ ملک ڈوب دے کڈھیا تے اوہ گیلے پاپے وانگوں دو ٹوٹے ہو گیا۔
کیہ بھٹو دے دور توں وی بھیڑا ہووے گا جیہنے سارا ویلا مڈھلے حقاں دی معطلی اتے اپوزیشن دی سنگھی نپن دے جتناں وچ گنوا دتا۔ کیہ ضیاء الحق توں وی بھیڑا ہووے گا جیہنے سیاسی کامیاں دا علاج کوڑیاں تے پھانسیاں نال کرن دا جتن کیتا تے ملک نوں کلاشنکوف اتے پوڈر دے چتا تے رکھ دتا۔ کیہ غلام اسحاق خان توں وی بھیڑا ہووے گا جیہنے سیاسی حکومتاں نوں پتلی تماشا بنا کے رکھ دتا۔
کیہ احسان بھلن والے فاروق لغاری، نمانے تے تابعدار رفیق تارڑ یاں پاکستانیاں نوں ویچ کے پیسے وٹن والے دو واری وردی وچ صدر پرویز مشرف توں وی بھیڑا ہووے گا آصف زرداری دا دور؟
جدوں ایہہ قوم ڈنڈے والے صدراں نوں کئی کئی ورھے سارے مارُو کرتوتاں سنے جھل سکدی ہے تے اوہناں دے ست خون معاف کر سکدی ہے تے ووٹ نال چنیا زرداری ایس قوم نوں ودھ توں ودھ کنا گھاٹا پا سکدا اے۔ بوہتا وی گھاٹا پیا تے ایہو ہووے گا ناں کہ چھ مہینیاں مگروں ٹرکاں دے پچھے 'تیری یاد آئی تیرے جانے کے بعد' مشرف دی فوٹو دے اُتے لکھیا ہووے گا۔
