نریندر مودی اتے زرداری دہشتگردی دے خلاف عالمی جنگ دے سپاہی
جسپال سنگھ
September 5th, 2008
دکھنی ایشیا وچ چوناں دا بازار گرم ہو رہیا ہے۔ حاکم میل دیاں پارٹیاں اتے اوہناں دے لیڈراں نے اک بار پھر ال جلل اتے جھوٹھ فریب دا سرکس تیز کر دتا ہے۔گجرات دے وزیر اعلٰی نریندر مودی اتے بی جے پی نے اعلان کیتا ہے کہ اوہ دہشتگردی دے خلاف عالمی جنگ نوں ساریاں نالوں ودھ اہم مُدا مندے ہن اتے نریندر مودی نے کیہا کہ اوہ دہشگردی دے خلاف جنگ نوں اک نویں پدھر تے لے جانا چاہوندا ہے اوسدا کہنا ہے کہ کانگرس اتے مرکز دی من موہن سنگھ دی سرکار دا رویہ دہشتگردی ول نرم ہے۔ ایہہ اوہی نریندر مودی ہے جس دی سرکار نے ہزاراں ہی مسلماناں دے قتل جتھے بند کیتے سی۔
دہشتگردی دے خلاف عالمی جنگ دا نعرہ لا کے ہندوستان چ مسلماناں دے خلاف فرقو نفرت بھڑکاؤن اتے سرکاری دہشتگردی نوں ہور تیز کرن دی سکیم بن رہی ہے۔ حاکم میل نوں لوکاں دی جدوجہد کچلن لئی اتے سرکاری دہشتگردی ہور ودھاؤن لئی اس دی لوڑ ہے۔اڑیسہ وچ ہزاراں ہی عیسائیاں دے گھراں اتے گرجیاں نوں اگ لا دتی گئی ہے اتے کئی درجن لوکاں نوں سرکاری دہشتگردی نے قتل کر دتا ہے۔فرقو نفرت اتے تشدد نال ایہہ لوکاں دے گھولاں نوں کراہے پاکے کچلنا چاہندے ہن۔
نریندر مودی اتے بی جے پی دہشتگردی دے خلاف عالمی جنگ دا نعرہ لا کے امریکی سامراج نوں وی ایہہ دسنا چاہندے ہن کہ اوہ اوہناں لئی دکھنی ایشیا وچ کانگرس نالو بہتا کم کرن گے۔ایٹمی سمجھوتے دی مخالفت تاں صرف اک سیاسی لوڑ سی۔ اوہ اصل وچ امریکہ دے نشانیاں دے بالکل وی خلاف نہیں۔اس لئی اوہناں نوں ہن سیوا دا موقع دینا چاہیدا ہے۔ کانگرس نے پنج سال پورے کر لئے ہن۔ ہن اوہناں دی واری ہے۔
پاکستان وچ وی زرداری پردھان دی چون لڑ رہیا ہے۔ عام لوکاں وچ اوس دی کوئی پرتیت نہیں ہے۔ عام لوک اوس نوں بے ایمان، ٹھگ اتے ہیرا پھیری والا کہندے ہن۔ اوس دی وعدہ خلافی بارے بہت ہی لطیفے وی بنے ہن۔ اوس توں اوہناں نوں کوئی آس نہیں۔ لوک ایہہ ہی کہندے ہن کہ ایہہ مشرف دا ہی راج ہے بناں مشرف توں۔دہشتگردی دے خلاف عالمی جنگ دا نعرہ اک تاں اوہ بلوچستان اتے ہورناں تھانواں تے لوکاں دے گھول نوں کچلن لئی لا رہیا ہے اتے دوجے پاسے اوہ امریکہ نوں وی یقین دواؤنا چاہوندا ہے کہ اوہناں نوں اوس تے پورا یقین تے بھروسہ کرنا چاہیدا ہے اتے اوہ مشرف وانگ ہی اوہناں لئی ہر بھیڑا کم لوکاں دے خلاف کرن نوں تیار ہے اتے کرے گا۔
ہندوستان اتے پاکستان وچ لوکاں نوں کُلی، گُلی، جُلی ، مکان، صحت، تعلیم وغیرہ دے گنبھیر مسئلیاں نے گھیریا ہویا ہے۔اوہ آپنے مسئلے حل کرن لئی گھول چلا رہے ہن۔ اوہناں نوں پتہ ہے کہ اوہناں دیاں لوڑاں اوہناں دے گھولاں راہیں ہی پوریاں ہو سکدیاں ہن۔ کانگرس جاں بی جے پی، مشرف جاں زرداری اوہناں دے مُڈھلے مسئلے حل نہیں کر سکدے اتے ناں ہی اوہناں دا ایہناں مسئلیاں نوں حل کرن وچ کوئی موہ ہے۔
ایہہ حالات لبرل ڈیموکریسی دے گلن اتے سڑن دی ہی جھلک ہن۔لبرل ڈیموکریسی وچ لوکاں دیاں لوڑاں اتے چوناں وچ کوئی سانگا نہیں رہیا۔ چوناں ویلے لیڈر ال جلل کہندے رہندے ہن۔ اوہناں دے نعریاں دا کوئی مطلب نہیں ہوندا۔اوہ کہندے کجھ نیں تے کردے کجھ نیں۔ لبرل ڈیموکریسی وچ لوکاں کول کوئی طریقہ نہیں ہوندا جس نال اوہ ایہناں لیڈراں نوں جوابدہ بنا سکن۔ نریندر مودی دے منہ توں دہشتگردی دے خلاف گل انج لگدی ہے جس طرحاں کوئی کنجری کنواری ہون دا دعوہ کر رہی ہووے۔ ایہو حال زرداری دا ہے۔ ایہہ اوہناں دی مجبوری ہے۔اس توں علاوہ اوہناں دے اتے لبرل ڈیموکریسی دے پلے کجھ ہور ہے وی نہیں۔
حالات اک نویں طرحاں دی جمہوریت دی منگ کر رہے ہن۔ اک ایسی جمہوریت جس وچ لوک آپ خود سارے فیصلے کسے پارٹی جاں ہور وچولے دے کرن۔ حاکم میل اتے سامراج نوں ایہہ گل راس نہیں آ رہی اتے ناں ہی راس آ سکدی ہے۔ ایہناں دا سارا دارومدار اس لبرل ڈیموکریسی تے ہے۔لبرل ڈیموکریسی ایہناں دا من پسند جھرل ہے۔ہور کسے طرحاں دی جمہوریت وچ ایہناں دا کم چل ہی نہیں سکدا۔ اس کرکے ایہہ بندک اتے جبر نال لبرل ڈیموکریسی لوکاں تے تھوپدے ہن۔ پر نریندر مودی، زرداری اتے ہورناں دی نعر ے بازی اتے وعدے ایہہ دسدے ہن کہ ایہہ لبرل ڈیموکریسی بالکل پھوکی ہے۔ اس وچ لوکاں لئی کوئی تت ست نہیں۔
