سال اُنی سو بانوے وچ جدوں اودوں دے وزیر اعظم نواز شریف نے اپنے کراچی دے دورے وچکار سندھ دے گورنر ہاؤس وچ شہریاں تے پلس وچکار جرماں دے مُکا لئی بنائی گئی رابطہ تنظیم '' سٹیزن پولیس لیز ان کمیٹی'' یاں سی پی ایل سی دے اودوں دے صدر جمیل یوسف نوں پچھیا سی جو کراچی وچ کاراں دی چوری دیاں وارداتاں روز ودھ کیوں رہیاں ہین تے ایہہ کاراں کتھے جا رہیاں ہین تے جمیل یوسف نے دسیا سی کہ کراچی توں کھوہیاں ہوئیاں کجھ کاراں ایوان صدر اسلام آباد وچ وی کھلوتیاں ہوئیاں ہین۔ اہناں دناں وچ سندھ وچ مشیر داخلہ اودوں دے صدر غلام اسحاق خان دا جگ تے بدنام جوائی عرفان مروت سی تے کراچی توں چوری کیتیاں ہوئیاں یاں کھوہیاں ہوئیاں جنہاں کاراں دا ذکر جمیل یوسف نے کیتا سی اوہ کراچی توں فرید مروت ناں دے بندے نے ایوان صدر اسلام آباد لئی بک کر کے گھلیاں سن۔
ایہہ گل مینوں اجکل ملک دی صدارت لئی امیدوار آصف علی زرداری دے چوناں لڑن تے اعتراضاں تے نکتہ چینی تے چیتے آئی۔ اصل وچ ایوان صدر وچ سکندر مرزا توں لے کے جنرل مشرف تیکر جنے وی صدر آئے اوہ سارے ( سوائے چودھری فضل الٰہی دے) شہریاں دے جان مال تے اُتے تے خیر آئینی تے سیاسی حقاں تے ڈاکے ماردے ہی رہے۔ چودھری فضل الٰہی وچارے دے اوہ ذوالفقار علی بھٹو ورگے پاکستانی تاریخ دے سب توں بوہتے طاقتور وزیر اعظم دے ہیٹھ ایوان صدر دیاں بے اختیار دیاں کندھاں تے ایہہ نعرہ لکھیا سی صدر چودھری فضل الٰہی نوں آزاد کرو۔ کل وچارے سرائیکی وسیب دے وزیر اعظم یوسف رضا گیلانی کہہ رہے سن آصف علی زرداری رسمی صدر ہوون گے۔ سارے اختیار میرے کول ہوون گے۔ جے حقی انج ہووے گا تے ایہدا مطلب ہن وی ایہہ ہویا جو پاکستان دیاں کندھاں تے لکھیا ہویا ایہہ نعرہ کیہہ کدی پرانا نہیں ہووے گا '' ضمیر دے قیدی آصف علی زرداری نوں رہا کرو۔''
پاکستان پیپلز پارٹی دے ایس موروثی شریک چیئر پرسن نوں جدوں ایہہ پچھیا گیا جو اوہ اک پارٹی دے پردھان ہوندیاں ہوئیاں ایوان صدر وچ بیہہ کے ریاستی پردھان دا کردار کیویں نبھاون گے تے اوہناں نے ذوالفقار علی بھٹو دی مثال دتی سی جو اوہ وی تے پاکستان پیپلز پارٹی دے چیئرمین ہوون دے مگروں وی صدر بنے سن۔ ایہہ وی اوہناں دی اک غلط مثال ہی ہے۔
ذوالفقار علی بھٹو نال پاکستان دے بوہتے لوکاں دی محبت اپنی تھاں پر اوہ وی تے ناجائز تے سویلین آمرانہ صدر ہی بن کے آئے سن۔ پاکستانی فوج دے ہتھوں بنگال دے مگروں ٹٹے پھٹے رہندے کھوندے پاکستان وچ ہزیمت یافتہ فوجی جرنیلاں نے اپنا گند اوہناں دے ہتھوں صاف کروان لئی بھٹو نوں سویلین چیف مارشل لاء ایڈمنسٹریٹر تے صدر لایا سی۔ سب توں پہلا کم جیہڑا قائد عوام نے کیتا اوہ ایہہ کہ اپنی ہی پارٹی دے جیالے تے جمہوریت پسند کارکن تے سنگی لائلپور دے مختار رانا تے اوہناں دی مارشل لاء جاری رکھن دی مخالفت پاروں فوجی عدالت توں سزا دوائی۔ مختار رانا سزا کٹن توں مگروں جیویں ہی ملکوں برطانیہ دیس نکالے وچ گئے پھیر اوہناں دی کوئی خورے ہی خبر آئی۔
بھٹو نے عبوری آئین بنوا کے اپنے مخالفاں نوں سبق سکھاون دا کم شروع اپنی ہی اختلانی پارٹی سنگیاں توں کیتا اوہناں تے اوہناں دی انتقام پسندی دا کجھ پھل حاکم علی زرداری نے وی چکھیا جدوں کئی وار ذوالفقار علی بھٹو نے حاکم علی زرداری نوں اپنی اُچیچی لغت تے خطاباں یعنی سرعام گالھاں کڈھیاں سن۔ کدی کدی میں سوچنا واں کِتے انج تے نہیں کہ زرداری پاکستان پیپلز پارٹی تے بھٹو خاندان توں ذوالفقار علی بھٹو دے سیاسی انتقام دا ہی بدلہ لین تے تلے ہوئے ہین۔ ذوالفقار علی بھٹو دے سیاسی انتقام دا ہی بدلہ لین تے تلے ہوئے ہین۔ ذوالفقار علی بھٹو نے نیپ دے لیڈراں تے کارکناں دے نال سندھ وچ ایم این اے میر علی بخش تالپور جیہڑا کہ فریال تالپور دا سوہرا سی نوں وی جیل گھلیا سی۔ میر علی بخش تالپور اپنی آزادی دے کجھ دیہاڑ مگروں ہی چلانا گر گئے سن۔ اوہ سندھ دے لوکاں دے من پسند بندے سن۔
بھٹو توں پہلوں یحییٰ خان ورگے رنگیلے جنرل اپنے ایس ٹولے سنے ایوان صدر توں پاکستان تے اوہدی لوکائی دے خلاف قیامتاں برپا کردے رہے جنہاں نوں اوہناں دے جاون دے مگروں سپریم کورٹ نوں اوہناں نوں غاصباں دا ٹولہ آکھن دا چیتا آیا۔ ایوب خان لوکائی دے شہری تے بنیادی حقاں تے اقتدار اعلیٰ تے شبخون مارن والے بدنام زمانہ ڈاکو سن۔ اوہ تے نواب کالا باغ تاریخی طور تے محمد خان ڈاکو توں وڈے ڈاکو سن۔ ایوب خان ہی سن جنہاں نے ملک وچ وکھیویں دا بیہہ رکھیا ۔ اوہناں نوں بنگالی لوکائی تے پاکستان دیاں ہور نکیاں قوماں دے نال ویر تے بوہت نفرت سی۔ اوہناں دے ہی زمانے وچ قوم پرست سیاست وچ '' پنجابی پٹھان مہاجر مستقل مفاد '' دی اصطلاح جی ایم سید نے ساہمنے لیاندی۔ جے ملک ٹٹن دا مڈھ ون یونٹ سی تے مارشل لاواں ملک دے مُکا ول مڈھلے اجلاس سن۔
ایوب ہووے کہ یحییٰ ضیاء الحق یاں پرویز مشرف، ایہہ ملک دے صدر پاکستانی آئین دے باغی سب توں وڈھے جرم ملک نال غداری دے گناہی تے لوکائی دے حقاں دے ڈاکو ہی سن جنہاں دا پھیر شریفانہ تے ترمیم شدہ ایڈیشنز کینہ پرور ظالم بیوروکریٹ غلام اسحاق خان، رفیق تارڈ ورگے لطیف تارڈ ورگے تبلیغی تے تہجد گزار محسن مار سردار فاروق لغاری سن۔
جے طالبان دا کوئی نواز شریف ورزن ہے تے اوہ رفیق تارڈ ہی سن جنہاں دا انگریزی وچ کئی امریکن تلفظ '' ٹیرر '' ادا کرن گے۔ ضیاء الحق دے دناں وچ ایہورفیق تارڈ سن جنہاں نے ملک دی پہلوں ہی ظلم سہن والی اقلیت احمدی دے خلاف لہور ہائیکورٹ وچ ججمینٹ دے کے ضیاء الحق دے زمانے وچ اوہناں نوں قصائی دے تختے تے رکھ دتا سی۔ نواز شریف نے اک تبلیغی جج نوں ملک دا صدر تے دوجے تبلیغی جنرل ناصر نوں آئی ایس آئی دا پردھان بنوایا۔ ہن ایہہ بلی ست چوہے کھا کے ست حج کر کے واپس آئی ہے۔
جے پاکستانی آئین دے باغی تے لوکائی دے شہری تے آئینی حقاں دے ڈاکو صدر پاکستان بن سکدے ہین تے زرداری کیوں نہیں بن سکدے ؟ اخیر اوہ وی تے آئین دے انکاری ہین جیہڑے چیف جسٹس افتخار محمد چودھری دی وی بحالی دی منگ کردا ہے۔ زرداری نوں وی لُٹے پُٹے پاکستان نوں ہور لُٹن دا موقع ملنا چاہی دا۔کیوں جو سندھی کہندے ہین جو مراثی تے عضو تناسل دا ڈھڈ کدی نہیں بھردا۔ برصغیر وچ کدی ایسٹ انڈیا کمپنی دی حکومت سی تے ہن زرداری اینڈ کمپنی دے مستقل یاں اسپیشل فیدیاں دی حکومت ہے۔
جے حالات یاں پاکستان دی ملٹری انٹیلی جنس اوہناں نوں بینظیر بھٹو ورگی زنانی نوں خاوند تے پیپلز پارٹی دا موروثی شریک چیئر پرسن بنا سکدے ہین تے صدر وی بنوا دیون گے کیوں کہ پاکستان دے جنرل یاں فوجی اسٹبلشمنٹ ملک نوں ایہدے انجام دے کنڈھے تیکر اپڑا کے ہن ایہدا الزام اپنے فور سٹار موڈھیاں تے نہیں آون دینا چاہندے ہوون گے۔
