پاکستان دی سیاستداں وچ پنجاب دے کردار توں اسی سارے جانوں ہاں۔ صدارتی چوناں نوں پنجاب مخالفاں نیں دو منہ والے ہتھیار وانگ ورتن دا آہر کیتا۔ اے تاثر دتا گیا پئی پنجاب زرداری دے خلاف ہے اتے زرداری ہوری غیر پنجابیاں دی طاقت نال صدر بنے نیں۔ ایس تاثر دا حقیقت نال کڈھا تعلق ہے ایس لئی تسی صدارتی چوناں دے رزلٹ تے جھای مار سکدے ہو۔
سینٹ تے قومی اسمبلی دی کل 442 ووٹاں وچوں 426 ووٹ پئے نیں۔ پارلیمنٹ،س ینٹ تے قومی اسمبلی وچ پنجاب دے 200 توں ودھ ووٹ نیں۔ جے زرداری ہوراں نوں پنجابی دا اک ووٹ وی نہ لبھدا تاں انہاں نوں 281 ووٹ نہیں مل سکدے سن۔ جے تسی پنجاب ول جھات مارو تاں صدارتی چوناں وچ زرداری ہوراں نوں ن لیگ دے مقابلے وچ 14 ووٹ گھٹ ملے نیں۔ ن لیگ نوں 65 وچوں نرے 35 ووٹ ملے۔ جس دا مطلب ایہہ ہے کہ نپجاب وچ نوں لیگ پوری چھائی ہوئی نہیں۔ پر زرداری ہوراں دی ٹیم وچ موجود پنجاب مخالفاں نیں ایہہ تاثر دین وچ کسر نہ چھڈی کہ پنجاب زرداری دے خلاف ہے اتے زرداری پنجاب توں ویر رکھدا ہے۔
ایس وچ ہمیشہ توں زرداری ہوراں دے اردو بولن والے سجن پیش پیش سن۔ جے یقین نہ ہوئے تے فوزیہ وہاب تے اصفہانی دی پوتی سمیت بہوں ہرکاریاں دے مضمون یا بیان پڑھ چھڈو۔ اصفہانی دی گھروں تے کدی خیر دی واج نہیں آئی۔ اصہفانی اوہی بندہ ہے جس قائداعظم دے خلاف 1938ء وچ پمفلٹ لکھیا سی جدوں قائداعظم نے پنجاب دے وزیراعظم نال رلتی ہوکے جناح سکندر پیکٹ کیتا سی۔
چیتے رہوے، ایس پیکٹ دے خلاف بنے میاں تے اصفہانی نیں پمفلٹ لکھے سن۔ پچھلے مہینے جدوں میں تسنیم صدیقی ہوراں دا انٹرویو ''ڈویلپمنٹ ویژن'' لئی کیتا تے انہاں دسیا اصفہانی تے اوہ بندہ سی جیہڑہ غلام محمد دے آکھن تے وزیراعصظم محمد علی بوگرہ نوں گن پوائنٹ تے واپسی پاکستان لے کے آیا سی۔ ایہہ اوہی ویلا سی جدوں بوگرے نیں اسمبلی توڑن دا اختیار گورنر جنرل کولوں واپس لیا سی۔ ہن حسین حقانی دی زنانی اتے اصفہانی دی پوتی ایہہ آکھ رہی ہے کہ زرداری پنجاب توں بچے۔
ترے تے اک صوبے دی ونڈ کرن والے اصل وچ اوہی نیں جیہڑے مرکزنوں بچانا چاہندے نیں۔ پاکستان دی لوکائی نوں انپے حقاں توں دور رکھن لئی ہمیش توں مضبوط مرکز، اردو تے اک پکھی اسلام دا رولا پایا گیا ہے۔ جدوں وی مرکز نوں اپنی طاقتاں کمزور ہوندیاں لگدیاں نیں تے اوہ کسی نہ کسی صوبے ول ہوا دا رخ موڑ دیندا ہے۔
18 فروری دی چوناں وچ ماڑے حالات ہون دے باوجود پی پی پی نوں وڈی گنتری وچ ووٹ لبھے سن۔ بھٹو ہوراں نوں تے ووٹ ہی پنجاب نے پائے سن اتے 1970ء وچ اوہ مرکز تیک صرف پنجاب پاروں آپڑے سن۔
پر اردو بولن والے جیہڑا کم الطاف حسین کولوں نہیں لے سکے اوہ زرداری کولوں لین دا پروگرام بنائی بیٹھے نیں۔ اک تیر وچ دو شکار والی پالیسی دا انہاں نوں دو پاسی فیدہ ہے۔ صدارتی چوناں وچ فتح توں بعد زرداری ہوری کیہہ سوچدے نیں ایس دا نتارا چھیتی نال ہو جاسی۔ شہباز شریف دی سرکار دی نندیا کرنا ایس دا پہلا امتحان ہے۔
جے ن لیگ نوں دیوار نال لاون دا آہرکیتا گیا تاں ایہہ جمہوری میثاق دے وی خلاف ہوئے گا اتے پی پی پی دے خلاف وی۔ صدارتی چوناں توں بعد گیند ہن زرداری دے کورٹ وچ ہے۔ صدارتی چوناں وچ سب توں بہتا سواد اس ویلے آیا جدوں زرداری نوں بدعنوان آکھن والیاں نیں پھس پھسے دل نال اس نوں ووٹ پایا۔ ایس وچ ایم کیو ایم تے فضل الرحمن پیش پیش سن۔ زرداری اپنے ویریاں کولوں جس طرح ووٹ لیتے نیں ایہہ پی پی پی دی فتح ہے۔
زرداری دے خلاف اس دیہاڑ توں کم چک دتا گیا سی جدوں اس دے ویاہ دی خبرآئی سی۔ 20 سالاں دے پروپیگنڈے دے بعد جس دل نال انہاں ''ویریاں'' نیں بھیا جی نوں ووٹ دتے ہون گے اوہ پاکستانی تریخ دا وکھرا باب ہے۔ اج تے نجی میڈیا وی پی پی پی مخالفتاں توں پرے جا کھولتا ہے۔ پر ایہہ سب چھریاں تیز کریندے پئے نیں تانے بلی دا حج ہو جائے۔
