پاکستان بنن توں لے کے ہن تیکر اسیں ایہہ سن دے آئے سی کہ کیویں ساڈے فوجی ڈکٹیٹر سیاست داناں دے خلاف سازشاں کردے آئے ہین تے اگے ودھ کے اقتدار تے قبضہ کر لیندے ہین۔ پر ہن ایہہ پتہ لگیا ہے جو اسٹیبلشمنٹ دے ہتھوں سازشاں دا شکار ہوون والے سیاستداناں نوں جدوں وی موقع ملدا ہے تے اوہ لوکائی دے خلاف سازش کردے ہین۔ جیویں معزول چیف جسٹس افتخار محمد چودھری نوں اہناں سیاست داناں نے پہلوں سر تے بہا کے اوہناں دے جلسے جلوساں وچ شرکت کر کے تے ہن اخیر وچ اوہناں نوں ایہہ کہہ کے کلیاں کر دتا جو اوہ متنازعہ ہو چکے سن، ایہدے توں ایہہ گویڑ لایا جا سکدا ہے جو ساڈے سیاست دان کیویں دیاں سازشاں کرن دے قابل ہو چکے ہین۔
افتخار چودھری دے خلاف سازشاں دا مڈھ تے پچھلے سال لندن توں ہی رکھیا گیا سی جدوں نواز شریف دے فلیٹ تے بیہہ کے بینظیر بھٹو نے سانوں صحافیاں نوں ایہہ دسیا سی جو افتخار چودھری دے حق وچ چلن والی تحریک نال سیاسی پارٹیاں دا کوئی تعلق نہیں بن دا سی ہاں جے وکیل درخواست کرن گے تے سیاسی جماعتاں اوہناں دا ساتھ دیون گئیاں۔ مطلب بڑا صاف وی جو ایہہ سیاسی جماعتاں چیف جسٹس دی بغاوت تے مقبولیت نوں جنرل مشرف دے خلاف اک حد تیکر ورتن دے حق وچ سن۔ چودھری شجاعت نے امریکہ توں بیان دتا کہ سول سوسائٹی تے میڈیا نوں بوہتا جذباتی ہوون دی لوڑ نہیں سی کیوں جو ایہہ عدلیہ تے فوج دی آپو دی لڑائی سی تے دوہویں اک دوجے نال ڈیل کر لین گے۔
ایہدے وچ کوئی شک نہیں کہ پاکستان بنن دے مگروں ایس ملک وچ پنج طاقتور طبقے، فوج ،عدلیہ، سیاست داناں تے بیوروکریسی نے اپنی لوکائی دے خلاف محاذ بنا لیا جیہڑا نو مارچ دو ہزار ست تیکر چلدا رہیا۔ اہناں پنجاں طبقیاں نے رل کے ایس ملک دے وسیلیاں نوں لُٹیا تے جدوں وی جمہوریت دا قتل ہویا تے اہناں پنجاں نے اک دوجے دا ساتھ دتا۔ سارے جگ وچ ہمیش میڈیا تے عدلیہ اصل وچ دوجے تناں طبقیاں دے خلاف لوکائی دے حقاں لئی لڑ دے رہندے ہین پر ساڈے ایتھے میڈیا تے عدالتاں نے فوج سیاست داناں تے بیوروکریسی دی لٹ مار نوں تحفظ دتا۔ پر نو مارچ نوں میڈیا تے ججاں نے لوکائی دے خلاف سٹھاں ورہیاں دے پرانے ایس جوڑ دے خلاف بغاوت کیتی تے اپنی لوکائی دے نال کھلون دا فیصلہ کیتا۔ سیاست دان، فوج تے بیوروکریسی نے بغاوت لئی تیار اپنے دوہواں سنگیاں نوں سزا دیون دا فیصلہ کیتا تے ایہو کارن ہے جو کم جنرل مشرف نے عدلیہ تے میڈیا دے نال کیتا سی اوہ اج تیکر جمہوری حکومت دے دور وچ وی جاری ہے۔
مینوں حیرانی ہوندی ہے جو اہناں سیاست داناں نے کیویں ججاں دی بحالی دی تحریک نوں سیاسی رنگ دتا تے اج اگے ودھ چڑھ کے ایسے جج نوں سیاسی تے متنازعہ کہہ رہے ہین جیہدے لئی یوسف رضا گیلانی چار دن تھانے وچ رہے، اٹارنی جنرل لطیف کھوسہ دا لہور وچ سر پاٹیا، اسلام آباد دی کورٹ وچ چیف جسٹس لئی لائے گئے استقبالیہ کیمپ وچ بمب دھماکے نال پیپلز پارٹی دے تریہہ وکیل شہید ہوئے۔ ایسے پیپلز پارٹی دے ہی زمرد خان ہر ویلے چیف جسٹس دی گڈی چلاوندے نظر آئے۔ لہور جاندیاں ہوئیاں جے چیف جسٹس دی گڈی خراب ہوئی تے قمر الزماں کائرہ بڑی خوشی خوشی اپنی گڈی لے آئے تے لہور تیکر نال گئے۔حالی ایس سارے ڈرامے دی کسر رہ گئی سی کہ اسیں ویکھیا کیویں جہانگیر بدر مولانا فضل الرحمن ، قاضی حسین احمد تے اسفند یار ورگے لیڈر لوکائی دے ججاں دے حق وچ ہوون والے وکھالیاں وچ رلتی ویکھے گئے۔ جے حالی وی لوکائی تے ججاں نوں ایہہ پک کروان وچ کوئی کسر رہ گئی سی تے سیاست دان اوہناں دے نال سی تے بینظیر آپوں چیف جسٹس دے گھر تیکرگئیاں۔
اسیں ویکھیا جیویں جیویں لوکائی تے عدلیہ دی وجہ توں ایہہ تحریک اگے ودھی سیاست داناں نے وی اپنا کھیڈ ہور سنجیدگی نال شروع کر دتا۔ اہناں ٹی وی چینلاں تے بیہہ کے اہناں سیاست داناں نے افتخار محمد چودھری دے حق وچ ایہو ایہو جئیاں دلیلاں دتیاں کہ عقل دنگ رہ گئی۔ اج پھیر اہناں ٹی وی چینلاں تے ایہو لوک نویں سرے توں ایسے جج نوں بحال نہ کرن دے حق وچ نویاں دلیلاں لبھ رہے ہین کہ سمجھ وچ نہیں آرہیا کہ ایہہ لوک اودوں ٹھیک کہندے سن یاں ہن ٹھیک کہہ رہے ہین۔ شطرنج دے اک چتر کھڈاری وانگوں اہناں سیاست داناں نے ایس باغی جج تے اوہدی لوکائی وچ مقبولیت نوں جنرل مشرف دے اقتدار نوں لسا کرن لئی ورتیا۔ چوناں وچ نعرے لائے ججاں نوں بحال کراں گے۔ جدوں الیکشن ہوئے تے لوکائی دی وڈی گنتی نے ججاں دی بحالی تے نواز شریف نوں ووٹ دتا جنہے آصف علی زرداری دے نال مری وچ بیہہ کے اک معاہدے تے دستخط کیتے۔ ایہہ لوکائی نوں دھوکہ دیون دا اک نواں رنگ سی۔ جدوں اہناں سیاست داناں نے ویکھیا کہ ہن گل زبانی تے لکھے وعدیاں نال نہیں بن رہی تے وچ قرآن شریف لے آئے تے اخیر وچ ایہہ کہہ دتا جو ایہہ معاہدے قرآن دی آیت تھوڑی سی۔ اہناں سیاست داناں نے اک نویں لین پھڑ لئی تے اک نواں راگ گاون لگ پئے کہ افتخار چودھری متنازعہ ہو گئے سن۔ سارے سیاست دان بڑی آسانی نال بھل گئے کہ کیویں اوہناں نے جون دی کڑکدی دھپ وچ سپریم کورٹ دے باہر کھلو کے ایسے جج دے حق وچ وکھالے کیتے سن۔ ایس ویلے ہر لیڈر اک دوجے توں اگے نکل جاون دے چکر وچ سی کیوں جو اوہناںنوں پتہ سی کہ لوکائی تے میڈیا ایس جج دے حق وچ سن۔
مینوں حیرانی ہوندی ہے جو بھلا افتخار چودھری نے کدوں اہناں سیاست داناں نوں کارڈ گھلے سن جو اوہ وکیلاں دیاں ریلیاں وچ شریک ہوون۔ اہناں سیاست داناں نے آپوں ہی وکیلاں دی تحریک نوں پہلوں ہائی جیک کیتا تے اخیر اوہنوں متنازعہ کہہ کے اوہناں دے مونہہ تے ماریا۔ بھلا ایہہ کیویں ہوسکدا سی جو ایہہ سیاست دان اپنی ورہیاں دی سنگی اسٹیبلشمنٹ دے خلاف بغاوت کرن والے جج نوں سزا نہ دیندے کیویں کہ جے ایہہ جج جت جاندا تے پھیر ہمیش لئی بیوروکریسی فوج تے سیاست داناں دی طاقت ٹٹ جاندی تے لوکائی دا راج آجاندا۔ ایہہ اُچے طبقے ایس گل تے اک ہین جو اوہ ایس ملک نوں لٹن لئی جمے ہین تے جیہڑا وی اوہناں دے خلاف کھلون دی کوشش کرے گا اوہدا حشر کردتا جاوے گا۔ انج دا چیف جسٹس بھلا کنہوں منظور ہو سکدا ہے جیہدا دل غریباں دے نال دھڑکدا ہے۔ ایہو کارن سی جو وکیلاں دی تحریک نوں اہناں سیاست داناں نے اک لانگ مارچ راہیں اسلام آباد دے ایواناں وچ اپڑن توں پہلے پارلیمنٹ ہاؤس دے ساہمنے بڑا چپ کیتیاں دب دتا۔ ٹی وی چینلاں تے انج دا پروپیگنڈا شروع کیتا کہ پچھلے ہفتے اعتزاز احسن دی پردھانی وچ بوہت تھوڑی گنتی وچ وکیل احتجاج لئی کٹھے ہوئے جنہاں نوں پلس نے سڑک تے لہولہان کر دتا۔ وکیلاں نوں توڑن لئی فاروق نائیک پاکستان بار کونسل نوں پنج کروڑ روپئے دے چکے سن۔ افتخار چودھری نوں کلا کرن لئی سنگی ججاں تے کم شروع ہو چکیا سی جنہاں نوں ایہہ پک کروائی گئی کہ اوہناں دا چیف ہن متنازعہ تے سیاسی ہو چکیا ہے ایس لئی اوہناں دے حق وچ ایہو چنگا سی جو اوہ چپ کر کے عبدالحمید ڈوگر توں حلف لے کے پرانی تنخواہ تے کم شروع کر دیون۔ کسے نے ایہہ پچھن دی جرات نہ کیتی کہ جناب افتخار چودھری جے سیاسی تے متنازعہ ہوئے سن تے ایہہ نیک کم تسیں آپوں کیتا سی۔
اج ساڈے سیاست دان لوکائی دے خلاف کامیاب سازش کر چکے ہین جنہوں خورے ہن اوہ سیاست دا ناں دیون۔ اک انج دی سیاست جیہدے وچ اخلاقیات تے وعدیاں دی پاسداری دا دور دور تیکر ناں نہیں۔ ایہہ ساڈے سیاست دان رل کے اپنے ڈرائنگ روماں وچ بیہہ کے خوش ہورہے ہین کہ اوہناں نے کیویں لوکائی تے ججاں وکیلاں نوں اُلو بنایا کہ پہلوں اوہناں دی ہی طاقت ورت دیاں ہوئیاں جنرل مشرف نوں اپنی راہ توں ہٹایا تے اج آپوں ایس ملک دے صدر تے وزیر اعظم تے وزیر اعلیٰ بن بیٹھے ہین۔ جیس چیف جسٹس نوں اپنے سر تے چکی پھردے سن تے اوہدے ناں تے ووٹ لئے اج اوہنوں چک کے پرے ماریا۔
اج جدوں افتخار چودھری اپنے گھر وچ کلا رہ گیا ہے تے خوشی نال بے حال اہناں سیاست داناں نوں پچھن دی جرات کرسکناں کہ کیہہ اوہ انج دیاں کامیاب سازشاں صرف اپنی لوکائی دے خلاف ہی کرسکدے ہین؟ کیوں کہ جدوں اوہناں نوں فوجی اسٹیبلشمنٹ دے خلاف انج دی سیاست کرن دی لوڑ پیش آئی سی تے باراں اکتوبر اُنی سو نڑینوے دے مگروں نواز شریف ، شہباز شریف تے آصف زرداری اک اک کر کے ملک چھڈ گئے سن۔ بینظیر بھٹو پہلوں جا چکیاں سن۔ ایہہ سارے اودوں ہی پرتے جدوں ایسے چیف جسٹس دی بغاوت کارن ملک وچ بدلی آئی۔ جیس چیف جسٹس دی بدولت ایہہ سارا کجھ ہویا۔ اج اوہ اہناں نوں سیاسی تے متنازعہ لگدا ہے کیوں کہ اوہ ہن طاقتور تے لٹ مار وچ رجھے طبقیاں نوں تحفظ دیون لئی تیار نہیں ہے۔ کاش جیویں کامیاب سیاست اہناں سیاست داناں نے اپنی لوکائی دے خلاف کیتی ہے اوہ کدی فوجی ڈکٹیٹراں دے خلاف وی کردے۔ بھلا ایہہ کنج دے لیڈر ہین جیہڑے ڈکٹیٹراں نال ڈیل کردے ہین تے لوکائی نال دھوکہ !
آؤ سارے رل کے اہناں سیاست داناں نوں اپنی ہی لوکائی دے خلاف کامیاب سازش کرن تے مبارک پیش کرئیے جنہاں نوں جے پھیر کدی ڈکٹیٹراں دا ساہمنا کرنا پیا تے انج ملکوں نس جاون گے جیویں پہلوں گئے سن !!
