جنرل ریٹائرڈ پرویز مشرف نے اپنے اک نویں بیان وچ کہیا ہے جو اوہناں دے سیاست وچ پھیر آون دا پروگرام مستقبل دے حالات تے ہے۔کیوں جو پاکستان وچ بدنام سیاست داناں تے جرنیلاں نوں وی ہار منن دی عادت نہیں ہے تے اوہ ہمیش ذاتی خوبیاں تے بھروسہ کرن دی تھاں تے مخالفاں دیاں غلطیاں تے اپنی پسند دا قلعہ کھلیارن دی کوشش کردے ہین ایس لئی اوہناں دا فرمان وڈیاں سیاسی جماعتاں یعنی پیپلز پارٹی تے مسلم لیگ نون لئی '' ہشیار باش '' دا نوٹس ہے۔ پر ایس توں وی ودھ اہم گل ایہہ ہے جو پیپلز پارٹی دی القاعدہ تے طالبان مخالف پالیسی دے مخالف کجھ میڈیا مجاہداں وانگوں جنرل (ر) جنرل مشرف اپنی ایہہ خوش فہمی دسن وچ کویل نہیں کیتی کہ ایہہ نظام خورے کجھ مہینیاں دا پروہنا ہے۔ پر جنرل مشرف نے فوجی انقلاب دا امکان ردیا ۔ مشرف نوں چنگی طرحاں پتہ ہے جو اوہ کیہہ کہہ رہے ہین کیوں جو اوہ آپوں اک اننگز وچ انقلاب لیا چکے ہین جیہڑی کہ اک انہونی جئی گل ہے۔ چیف آف آرمی سٹاف جنرل اشفاق پرویز کیانی وی اوہناں وانگوں ہی ہین جنہاں وچ انقلاب دے جراثیم بوہت گھٹ ہین۔
پر پیپلز پارٹی دی حکومت دی کاکردگی ولوں گلیاں گھراں تے لوکائی وچ جیہڑی چنتا ہے غلط نہیں ہے۔ پیپلز پارٹی نے افتخار محمد چودھری نوں چیف جسٹس دے طور تے بحال کرن دا وعدہ کیتا پر حالی تیکر دور دور تیکر کوئی آس نظر نہیں آرہی۔ اوہنے آئین دی دفعہ اٹھونجاہ ٹوبی ہیٹھ صدر دے اختیاراں نوں چھڈن دا اعلان کیتا پر صدر آصف علی زردای بڑے سکون نال ایوان صدر وچ بیٹھے چویہہ جولائی توں ملک دا نظام چلا رہے ہین تے ایس گل دی کوئی آس نہیں کہ چھیتی ایہہ اختیار چھڈ دیون گے۔ پارٹی نے قبائلی علاقیاں وچ امریکی کاروائیاں دے خلاف پاکستان دی علاقائی سانجھ بھیالی تے خود مختاری دی سوں کھادی۔ پر لوکاں دی ماڑی جئی تسلی لئی وی حکومت دے ماڑے جئے روس وکھالے نوں وی اوہدے وزیر دفاع احمد مختار نے غیر سفارتی انداز وچ ایہہ آکھ کے لپیٹ دتا کہ '' اسیں امریکہ نال کیویں لڑ سکنے آں؟'' پارٹی نے خود مختاری دے مڈھ تے معیشت دی بحالی دا وعدہ کیتا پر ہن اوہنے آئی ایم ایف دا بوہا کھڑکایا ہے۔اوہنے ایہہ وی دعویٰ کیتا سی کہ اوکھے ویلے وچ وزیراں تے حکومتی خرچے گھٹ کیتے جاون گے پر کابینہ تے کئی وزارتاں دی ونڈھ تے صدر تے وزیر اعظم دے نال باہرلے دوریاں تے سیاست داناں تے حاشیہ برداراں دے جہاز بھر بھر کے کھڑن نال سرکاری خرچیاں دے پرانے ریکارڈ توڑے جا رہے ہین۔ اوہناں ایہہ وی پک کروایا سی جو آپنیاں نوں پوجن دے کم نوں ہمیش لئی دب دتا جاوے گا پر اج سانوں ایہہ پورے زوراں تے نظر آرہیا ہے۔
پر ایہہ کہنا انصاف نہیں ہووے گا جو پیپلز پارٹی دا گلاس ادھا بھریا تے ادھا خالی ہے۔ جے تگڑی کابینہ تے غیر ملکی دوریاں ولوں کجھ بھیڑیاں خبراں سنن وچ آئیاں ہین تے ایہدے کارن ڈھلمل جمہوریت وچ اتحادی جماعتاں دیاں اوہ منگاں وی ہین جنہاں نوں پورا کرنا مجبوری ہے۔ پیپلز پارٹی دا اپنا قصور ایہدے وچ گھٹ ہے۔ جمہوری طور تے چنی ہوئی عوامی حکومت کسے نہ کسے طرحاں احساس جرم وچ رہندی ہے۔ پر سانوں '' نمائندہ '' جمہوریت دی عیاشی لئی اینی بھاری قیمت تے ادا کرنی پوے گی۔ مثال دے طور تے بلوچ لوکائی دے چنے ہوئے نمائندے سینیٹر اسرار اللہ زہری نوں لوکائی دے دبا تے وفاقی وزیر بناونا پیا جدوں کہ ملک دے دوجے حصیاں وچ ایس تقرر تے بڑا روس وکھالا ہویا کیوں جو زہری نے غیرت دے ناں تے قتل دی حمیت کردیاں ہوئیاں پھڈے والے خیال ظاہر کیتے سن تے بلوچستان دے اک ہور دور دے علاقے وچ پنجاں زنانیاں نوں جیوندیاں دبن دے واقعے نوں جائز آکھیا سی۔
جدوں حکومت دی سیاسی حیاتی خطرے وچ ہووے تے حقیقی سیاست دی آس رکھن وچ کوئی عیب نہیں۔ ہن جدوں کہ مسلم لیگ نون قاف لیگ لئی اپنیاں بانہواں کھلار رہی ہے تے ایس گل تے اڑی ہے جو کہ پھڈے والی حد تیکر سیاسی ہو جاون والے جسٹس افتخار چودھری نوں چیف جسٹس دے طور تے بحال کیتا جاوے صدر زرداری توں ایہہ آس کیتی جاسکدی ہے کہ اپنی پارٹی تے حکومت دی حیاتی نوں داء تے لا دیون گے تے آپوں کوئی داء نہیں کھیڈن گے۔ مسلم لیگ نون دے اک سر کڈھویں آگو جاوید ہاشمی دے ایہہ ریمارکس پکی گل ہے گوہ کرن دے قابل ہے جو مسلم لیگ نون دے کول اینی وڈی گنتری ہے جو پیپلز پارٹی حکومت نوں باہر سٹ سکدی ہے۔ پکی گل ہے ایہہ انج دا خطرہ ہے جیہڑا زرداری دے سر تے لمک رہیا ہے تے جنہوں اوہ بھل نہیں سکدے۔
ایہہ گل ٹھیک ہے جو پیپلز پارٹی حکومت نے نال ٹرن دی کوشش وچ بوہت ویلا کھنجایا۔ ایہہ وی ٹھیک ہے جو مسلم لیگ نون تے میڈیا مجاہد اوہنوں سوکھیاں جین نہ دیون گے تے معیشت دی بحالی دے کسے ایجنڈے تے عمل کرن تے القاعدہ تے طالبان دی سرکوبی لئی جنگ توں پہلوں سیاسی چیف جسٹس دی غیر مشروط بحالی تے زور دیندے رہن گے۔ پر ایہہ کہنا ٹھیک نہیں جو جنرل ریٹائرڈ مشرف دے ٹرن تے زرداری دے صدر بنن توں مگروں کجھ نہیں ہویا۔ حقیقت ایہہ ہے جو ہن تیکر بوہت سارے ججاں نوں بحال کیتا جاچکیا ہے، ڈگ دی ہوئی معیشت نوں سنبھالن لئی کاروائی کیتی جارہی ہے تے فاٹا وچ پاکستانی ریاست دی عملداری بحال کرن لئی پالیسی دسی جاچکی ہے۔
پر سانوں پیپلز پارٹی تے مسلم لیگ نون دا شکریہ ادا کرنا چاہی دا جو اوہناں نے کھچ دھرو دے مگروں وی ہن تیکر سیاسی سیانپ دا وکھالا کیتا ہے تے اک دوجے دا گل نہیں پھڑیا۔ اوہناں نوں چاہی دا کہ آپو وچ گتھم گتھا ہوونا چھڈ دیون۔ اک دوجے نال تعاون کرن تے سانگے چنگے رکھن دی کوشش کرن۔ پاکستانیاں نوں پچھوکڑ دی بھیڑی سیاست توں جان چھڈاون دی لوڑ ہے تاں جو اوہ اپنیاں حیاتیاں نوں نویں سرے توں شروع تے ہرحوالے نال ملک بارے بھیڑے خیال نوں مکا سکن۔
پاکستانی میڈیا نوں وی چاہی دا جو اسلام آباد تے لہور دیاں حکومتاں نوں اک ٹک شیشہ وکھاوندا رہوے۔ پر ایہہ کم ایس نیت نال کیتا جاوے کہ ایہدے نال دوہواں دھراں دی کارکردگی چنگی ہووے ایہہ نہیں کہ اوچھے طریقیاں نال میڈیا صرف اپنے نمبر بناوندا رہوے۔ ملک ایس ویلے بڑے وختاں وچ پیا ہویا ہے تے ایہہ ہر اک دا فرض ہے جو ایہدے وچوں نکلن لئی اپنا موڈھا دیوے نہ کہ لت اڑاوے۔
