امریکہ دیاں پچھے لنگھیاں چوناں وچ جگ واسیاں نے جنی نیجھ وکھائی اینی خورے کدے وی نہیں وکھائی گئی سی۔ سانوں ایتھے تریجی دُنیا وچ بیٹھیاں نوں شیواں نوں یاں تاں تڑکا لا کے وکھایا جاندا اے یاں پھیر سچ اوہی جاندے ہن جیہناں کول وسیلے ہوندے ہن سچ جانن دے۔ پھیر وی سانوں ایتھے بیٹھیاں نوں اوبامہ دے جتن دی آس تاں بڑی سی پھیر جاپدا سی جیویں کجھ نہ کجھ اجیہا واپر جانا اے پئی اوبامہ رہ جانا اے۔ بھاویں سارے ویروے، ساریاں گنتری روپوٹاں اوبامہ دے حق وچ سن تے اک اک پل دی خبراں اوس دی حق وچ سن پر یقین نہیں بجھدا پیا سی۔ پر اخیر جو لوکاں چاہیا اوہ ای ہویا تے ساریاں سازش تھیوریاں سپھل نہ ہوئیاں۔
اوبامہ بارے پرکھ کاراں جو جو لکھیا اوہ مُڈھلے پکھوں دو گلاں سن۔ اوبامہ دے آون نال کجھ نہیں ہونا تے جیہناں نوں اوس دے آون دے چاء چڑھے ہوئے نیں اوہناں نوں چھیتی سار ہو جائے گئی ساری گل دی۔ اوبامہ اسٹبلشمنٹ دا جمیا جایا اے تے اوس نوں اُچیچے پکھوں تیار کر کے لیایا گیا اے پئی اوہ اوس امریکہ نوں مڑ سانبھے تے ہور ہیٹھاں جاون توں ڈکے جو اگے ای بش دیاں پالسیاں کارن جگ بھر وچ ورودھ کھٹدا پیا اے۔ دوجے بنے اوبامہ اوہناں نوں وی جواب اے جو ایہہ کہندے سن امریکہ وچ کالا صدر نہیں آ سکدا۔ ویکھو اساں ایس گل دا جواب دے دتا اے تے کالا صدر لے آندا اے پر اوہ ہووے گا ساڈی مرضی تے منشا دا۔
دوجی دِھر دا ایہہ وچار سی پئی اوبامہ آ جانا اے تے چھا جانا اے۔ اوبامہ دے آون نال اک نواں جگ اُسرے گا تے اک نواں امریکہ جم پیا اے۔ ہن امریکہ نوں ستے خیراں نیں تے کالیاں تن سو ورھے دے دھروہ دا بدلہ لے لیا اے۔ اوبامہ ووٹ فار چینچ اے تے ایہہ اُتھل آوے ای آوے۔ ساڈے بھانے ایہہ دویں گلاں کسے حد تیک اک پاسڑ نیں۔ بھاویں دواں وچ ادھا ادھا سچ لُکیا ہوئیا اے۔
اوبامہ دی چڑھتل توں پہلاں بش دے امریکہ نوں ویکھن پرکھن دی بوہتی لوڑ اے۔ بش اٹھ ورہے پہلاں جیہڑی لام امریکہ نوں تگڑا تے راکھواں بناون لئی چھوہی سی اوس اج امریکہ نوں بوہتا ماڑا تے ان راکھاواں کر دتا اے۔ پورا جگ بش دیاں امریکی پالسیاں توں نکو نک اے کسے پاسے سکھ دا ساہ نہیں۔ رہندی کسر بش دے اخیری ویلے دی معاشی بھاجڑ نے جس نوں جے بھاجڑ تخت واشنگٹن آکھیا جاوے تاں بوہتا ٹُھکواں ہووے گا۔ اوبامہ امریکیاں تے خورے ۔۔۔۔۔ خورے جگ واسیاں دی اوس آس وچوں پُنگریا اے جو جگ وچ سُکھ چین نوں تریہائے پئے نیں۔ اوبامہ کوئی اُتوں آئیا اوتار نہیں اوہ بش دیاں مارو پالسیاں دے اُلٹا وچوں جمیا اے۔ وار(تورایخ) آپوں اپنی لوڑ موجب وسیب وچوں بندے جمدی اے۔ پر نری اینی گل نہیں، کالے ہوون پاروں اوس پچھے تن سو ورھیاں دے یدھ، گھول دی وی وار کھلوتی ہوئی اے۔ ایہہ کہنا کافی نہیں اوبامہ امریکی راس وال(سرمایہ داری) نوں بچاون آئیا اے۔ آئیا اوہ اپنے اُدم دے زور تے اے تے امریکی اسٹبلشمنٹ وچ اینا دم خم نہیں سی پئی اوس نوں ڈک سکدی۔ پر اوس آونا ویہار وچوں ای اے، پرچلت سیاسی ویہار وچوں جو دو پارٹیاں وچ ونڈیا ہوئیا اے۔ ایس لئی اوبامہ اوناں بدلن ہار اے جناں ویہار اوس نوں وتھ دیندا اے۔ اوہ اُتھل ہار نہیں نہ اوس کدی ایس دا ہوکا دتا اے۔
پر اوہ جو وی بدلیاں لیاوے گا اوہ ات لوڑیندیاں نیں تے اوہناں بناں نہ امریکہ نے چلنا اے تے نہ جگ نیں۔ اوبامہ دا آون چنگا اے ۔ اوبامہ پچھے اوہ آس اے جو لوک پکھ سر کھلوتی ہوئی اے۔ اوبامہ نوں ماڑے گوریاں، کالیاں، اسپنیاں، گیز، سوانیاں، گبھرواں تے گھٹ گنتاں ووٹ پائے نیں۔ اوبامہ ہن جے آساں تے پورا نہیں اُتردا تاں اوہ لوک آساں تاں سچیاں نیں۔
میں اوبامہ دے جتن مگروں دے اکٹھ وچ تکیا پئی سارے لوک روندے پئے سن۔ کیہ کالے تے کیہ گورے۔ جد لاطینی امریکہ وچ دی ریاست کولمبیا دا پہلی وار چنیا دھرت واسی جتیا تاں وی سارے روندے پئے سن سگوں اوہناں دا جتیا صدر ایوا موریل وی رو رہیا سی۔ میں شگاگو وچ اپنی جیتو تقریر کریاں جد اوبامہ نوں پہلی وار گوہ نال تکیا تاں مینوں اوس دیاں اکھاں ڈوہنگیاں تے ات اُداس لگیاں۔ صدیاں دی باندھ نیں ساریاں کالیاں دیاں اکھاں نوں ات اُداس بنا دتا ہوئیا اے تے گورے امریکہ نے پہلی وار تکیا اے نیجھ تے گوہ نال کالیاں دیاں اکھاں نوں۔
