2017 وچ ہندوستان وچ چار لکھ توں ودھ لکھاں ڈالر پتی ہوون گے
وچار ڈیسک
November 19th, 2008
سرمایہ کاری وچ جگت جانوں کمپنی برکلے نے پیشین گوئی کیتی ہے کہ ورھے 2017 وچ ہندوستان وچ چار لکھ توں ودھ بندے ایہو جہے ہوون گے جیہناں کول اک ملین ڈالر توں ودھ سرمایہ ہووے گا۔ ایس طرحاں ہندوستان دنیا وچ پیسے دیاں وڈیاں منڈیاں وچوں اک ہووے گی۔
برکلے نے ایہہ پیشین گوئی ہندوستان وچ کم کرن لئی اپنا دفتر کھولدیاں کیتی ہے جتھے ایہہ کمپنی بہتے پیسے والے لوکاں نوں سرمایہ کاری کرن دے گُر دسے گی۔ ممبئی وچ گل کردیاں برکلے دے مینجنگ ڈائریکٹر رابرٹ موریس نے آکھیا کہ آس ہے کہ ورھے 2017 وچ ہندوستان وچ چار لکھ گیاراں ہزار بندے ایہو جہے ہوون گے جیہناں کول اک ملین ڈالر توں ودھ سرمایہ ہووے گا۔
برکلے نے گویڑ لاؤندیاں آکھیا ہے کہ ایس ویلے ہندوستان وچ اک لکھ دے نیڑے ایہو جہے بندے ہین جیہناں کول اک ملین ڈالر توں ودھ دا سرمایہ موجود ہے۔ رابرٹ موریس دا آکھنا ہے کہ 2017 وچ ہندوستان دنیا دی اٹھویں وڈی معیشت ہووے گا۔
