پاکستان وچ بجٹ پیش کرن دی ریت وی انج ہی ہے جیویں ساتا یا چالیہا ہوندا ہے۔ کیوں جو ہر سال پاکستانی بجٹ ہرکھ دا اک ہور لشکارا، لوکاں دیاں آساں دا قاتل۔ہر نوں بجٹ پرانے نالوں بھیڑا ہوندا ہے تے ایہہ سال وی کوئی انوکھا ثابت نہیں ہویا۔ انج تے جد ملک وچ سول وار چل رہی ہووے تے بجٹ کیہ بننے ہوندے نیں پر فیر وی جو بجٹ ساہمنے لیاندا اوہدیاں کجھ پکھاں تے وچار دی لوڑ ہے۔
اک۔ پہلاں وانگ ایس سال وی بجٹ وچ ٹیکساں وچ وادھا کیتا گیا ہے۔ ایہناں وچوں بہتے ٹیکس درمیانے طبقے یاں غریباں نوں بھرنے پینے ہین۔ جے ایہہ ٹیکس درآمداں یا انڈسٹری تے وی لگے ہوون تاں وی لوکاں ہی بھرنے نیں کیوں جے سرمایہ داراں تے صنعت کاراں ایہہ ٹیکس اپنیاں وستاں دیاں قیمتاں ودھا کے لے لینے ہین۔ ایس دا مطلب ایہہ ہے جو غریبی وی ودھے گی، لوکاں دی خریداری گھٹے گی تے معیشت بھیڑے حالاں وچ ہی رہوے گی۔ دو۔ زرعی ٹیکس تے وڈے زمینداراں لگن نہیں دتا پر زرعی شعبے نوں کوئی سوکھ وی نہیں ملی۔ واہی بیجی وچ لوڑیندیاں مڈھلیاں شیواں، پانی، بجلی، پٹرول، کھاد تے کیڑے مار دواواں لئی کوئی اجیہا کم نہیں کیتا گیا جو اہناں دے مُل تھلے آون تے زرعی شعبہ اگے ودھے۔ سگوں جیویں دے ٹیکس لائے گئے ہین اوہناں نال بالواسطہ زرعی شعبہ وی ماریا جاوے گا۔
تن۔ ایس بجٹ وچ پاکستانی معیشت دے سب توں وڈے مسئلے، بجلی بارے کجھ نہیں کہیا گیا مطلب بجٹ وچ بجلی دی ودھیرے پیداوار لئی کوئی فنڈ نہیں رکھے گئے۔ ایس دا مطلب ہے جو لوڈ شیڈنگ ایویں ہی رہوے گی تے معاشی پیداوار ہور تھلے توں تھلے جاوے گی۔
چار۔ صنعتی شعبے لئی وی کوئی خاص رعایت یا سہولت نہیں دتی گئی۔ بس سرمایہ کار طبقے تے کوئی خاص آمدن ٹیکس نہیں لگیا۔ انج وی اوہناں کیہڑا دینا ہوندا اے ٹیکس۔
ایس لئی ایس بجٹ تے ایہو کہیا جا سکدا نہ ایہہ ایدھر ہے نہ اودھر
