یکم جولائی توں بجلی 17 فیصد مہنگی کرن دا فیصلہ ہو گیا
وچار ڈیسک
June 20th, 2009
سرکار نے نویں بجٹ وچ بجلی تے دتی جان والی 65 ارب دی چھوٹ مکا دتی ہے جیہدے پاروں یکم جولائی توں بجلی دے مل وچ 17 فیصد وادھا ہو جاوے گا۔
واپڈا دے آنکڑیاں موجب ایس ویلے پیپکو نوں ہر ورھے چار سو ارب دا گھاٹا پیندا ہے۔ بجٹ توں پہلاں پیپکو ولوں سرکار نوں گھلی جان والی رپورٹ وچ دسیا گیا سی پئی گذریل وزیر اعظم شوکت عزیز دے 5 ورھیاں دے دور وچ بجلی دا مُل نہیں ودھایا گیا تے بجلی دے بل تے دتی جان والی چھوٹ ہولی ہولی مکاؤندیاں ایس ورھے اُکا ای مکا دتی گئی ہے جیہڑی 65 ارب ہو گئی سی۔
دوجے پاسے واپڈا دے بقایا جات ودھدے گئے ہین تے گیس، تیل تے نجی تھرمل پاور کمپنیاں دے بقایا جات وی 272 ارب توں ودھ گئے ہین جیہدے نال واپڈا دا گھاٹا چار سو ارب توں وی ودھ گیا ہے۔
رپورٹ موجب یکم جولائی توں بجلی 17 فیصد مہنگی ہو جاوے گی تے گھروکی طور تے بجلی ورتن والیاں لئی بجلی دا مُل ساڈے ست روپیئے فی یونٹ تے کمرشل مُل 13 روپیئے اتے صنعتاں لئی مُل 11 روپیئے فی یونٹ تے چلا جاوے گا۔ ایہدے نال واپڈا نوں سالانہ 125 ارب روپیئے لبھ سکدے ہین۔ پیپکو پربندھیاں موجب بجلی دا مُل ودھاؤن نال اگلے دو توں تن ورھیاں وچ ایہہ گھاٹا گھٹ جاوے گا تے نال آئی پی پی اتے ہور بقائے دین وچ وی سوکھت ہووے گی۔
