ایس ایم ایس تے 20 پیسے وادھو ٹیکس تے سی این جی تے کاربن ٹیکس واپس
وچار ڈیسک
June 22nd, 2009
وفاقی حکومت نے ایس ایم ایس تے ویہہ پیسے وادھو ٹیکس واپس لے لیا ۔ گریڈ اک توں سولاں تیکر دے سرکاری نوکراں دیاں تنخواہواں وچ ویہہ فیصد وادھا ہووے گا۔ حنا ربانی کھر نے قومی اسمبلی وچ بجٹ تے بحث مکاوندیاں ہوئیاں دسیا پئی ایس ایم ایس تے ویہہ پیسے وادھو ٹیکس واپس لے لیا گیا ۔
کسٹم پربندھیاں توں جوڈیشل پاور واپس لے لئی گئی ہے۔ نیوز پرنٹ دی دارومدار تے سولاں فیصد جی ایس ٹی مکا دتا گیا تے ایہدی تھاں ہن نیوز پرنٹ دی دارومدار تے پنج فیصد کسٹم ڈیوٹی لگے گی۔ حنا ربانی کھر نے کہیا سی این جی تے کاربن ٹیکس وی واپس لے لیا گیا۔ اوہناں نے دسیا فوجیاں سنے سولاں گریڈ تیکر دے سرکاری نوکراں دیاں تنخواہواں وچ ویہہ فیصد وادھا کیتا جاوے گا۔
جدوں کہ دس سال تے ایس توں پہلوں ریٹائرڈ ہوون والے افسراں دی پنشن وچ وی ویہہ فیصد وادھا ہووے گا۔ ٹیکسٹائل صنعت ودھاون لئی چالی ارب روپئے دتے گئے نیں۔ اوہناں نے دسیا این ایف سی تے نظر ثانی لئی اجلاس جولائی وچ سدیا گیا ہے۔ اوہناں نے دسیا فاٹا دے بجلی دے بل حکومت بھرے گی۔ اوہناں کہیا اگلا بجٹ تریہہ مئی توں پہلوں پیش کر دتا جاوے گا۔ تے قائمہ کمیٹیاں ہر تن مہینے مگروں بجٹ نوں پرکھن گئیاں۔
