باہروں تیل لیاؤن والیاں کمپنیاں نے پاکستانیاں نوں 80 ارب دا ٹیکہ لایا

جسٹس رانا بھگوان داس دی اگوائی وچ سپریم کورٹ ولوں بنائے جان والے جوڈیشنل کمیشن نے اپنی رپورٹ وچ تیل کمپنیاں دی صلاح کار کمیٹی ولوں پیٹرول دیاں وستاں دے مُل متھن وچ 80 ارب روپیئے دے گھپلیاں دی دس پائی ہے۔

رپورٹ موجب تیل کمپنیاں دی صلاح کار کمیٹی ولوں 2001ء توں 2006ء وچکار پیٹرول وستاں دے مُل متھے جاندے سن۔ جوڈیشنل کمیشن نے اپنی رپورٹ وچ تن مڈھلے گھپلیاں دی دس پائی ہے جیہناں دے سدھار لئی صلاحوان سنے پوری رپورٹ 30 جون نوں سپریم کورٹ وچ پیش کیتی جاوے گی۔

جوڈیشنل کمیشن نے جیہناں گھپلیاں دی دس پائی ہے اوہناں وچ آکھیا گیا ہے پئی تیل کمپنیاں دی صلاح کار کمیٹی ملک وچ تیل وستاں دا مُل عالمی منڈی وچ چل رہے مُل نوں ویکھ کے متھ دی سی جدوں کہ لوکاں نوں دتیاں جان والیاں وستاں اوس معیار توں ہیٹھاں سن۔ انج تیل وستاں باہروں لیاؤن والیاں غیر ملکی کمپنیاں نے 80 ارب توں ودھ دا ناجائز منافع کمایا۔

اس ویلے سپریم کورٹ وچ آئینی عرضی دی سنوائی ہو رہی ہے جیہدے وچ ایس رقم دی دس پائی گئی ہے۔ رپورٹ موجب پی ڈی ایل لوکاں کولوں لین مگروں اوہنوں ترقیاتی کماں تے نہ خرچنا وی غیر قانونی ہے۔