سپریم کورٹ ولوں پٹرولیم دیاں قیمتاں وچ کمی دے دبا توں مگروں حکومت اہناں شیواں دیاں قیمتاں نوں متھن لئی کیتے گئے کجھ انج دے فیصلیاں توں آپوں ہی مکرن تے مجبور ہو گئی ہے جیہڑے اقتدار سنبھالن توں چھیتی مگروں موجودہ حکومت نے معاشی نظام چنگا کرن دے ناں تے کیتے سی۔
سپریم کورٹ دے حکم تے اوہدے اک گذریل جج جسٹس ریٹائرڈ رانا بھگوان داس دی پردھانگی وچ بنن والے کمیشن نے ملک وچ پٹرولیم دیاں قیمتاں دے طریقے کار بارے اپنی رپورٹ وچ کجھ صلاحواں پیش کیتیاں نیں۔ جنہاں وچوں اک تیل صاف کرن تے ایہدیاں شیواں ویچن والی کمپنیاں (او ایم سیز) دے منافعے وچ کمی بارے ہے۔
سپریم کورٹ نوں پیش کیتی گئی رپورٹ وچ تیل صاف کرن تے ویچن والیاں کمپنیاں دے منافعے بارے اپنے ریمارکس وچ بھگوان داس کمیشن نے کہیا ہے پئی ایہہ کمپنیاں تیل خریدن تے ویچن دے کم وچ اپنے حق توں ودھ کے نفع کماوندیاں نیں جیہدے پاروں عام لوکاں لئی اہناں شیواں دیاں قیمتاں وچ اینا وادھا ہوجاندا ہے۔
بھگوان دس کمیشن نے حساب لا کے دسیا پئی اہناں کمپنیاں دے نفعے وچ پچھلے اٹھ سالاں وچ کجھ صورتاں وچ تن ہزار فیصد تیکر وی وادھا کیتا گیا۔
تیل صاف کرن تے اہنوں ویچن والیاں کمپنیاں دے منافعے دا حساب حکومت کردی ہے جیہدے لئی اُچیچا فارمولا بنایا گیا ہے۔ انج دی ہی اک کمپنی وچ وڈے عہدے توں ریٹائرڈ ہوون والے اک افسر نے ناں ظاہر نہ کرن دی شرط تے دسیا پئی ایس بے پناہ منافعے دے مڈھ تے ایہہ کمپنیاں کئی حکومتاں وچ رلتی بیوروکریٹس تے سیاست داناں تے اثر پا کے اپنے منافعے وچ وادھے دا پربندھ کردیاں رہندیاں نیں۔
پاکستان پیپلز پارٹی دی حکومت نے اقتدار سنبھالن دے کجھ دن وچ تیل کمپنیاں دے نفعے وچ پنجاہ فیصد وادھے دا اعلان کیتا سی۔
رانا بھگوان داس کمیشن نے وی اپنی رپورٹ وچ کہیا ہے پئی تیل کمپنیاں دے منافعے طے کرن دا اختیار تے حکومت کول ہے پر پچھلے کئی سالاں دا سرکاری ریکارڈ دسدا ہے پئی ایہدا تعین کرن لئی ہوون والے انج دے اجلاس وچ سرکاری افسر کئی موقعیاں تے اہناں جلسیاں وچ شریک ہی نہیں ہوئے تے انج عملاَ منافعے طے کرن دا اختیار آپوں اہناں کمپنیاں دے سپردے کر دتا گیا۔
کمیشن دی رپورٹ وچ اہناں کمپنیاں دے افسراں دے امیراں والے طرز زندگی دی وی نکھیدی کیتی گئی ہے تے اہنوں پاکستانی وسیب دے عام معاشی تے سماجی صورتحال توں اڈ کہیا ہے۔ جسٹس رانا بھگوان داس نے تیل دیاں کمپنیاں دے افسراں نوں وی درخواست کیتی ہے پئی اوہ آپوں اپنا طرز زندگی بدلن دی کوشش کرن۔ ایہدے نال تیل دیاں قیمتاں تے ہی فرق نہیں پوے گا سگوں ملک وچ طبقاتی فرق نوں مٹاون وچ وی مدد ملے گی۔
سپریم کورٹ ولوں تیل دیاں شیواں دیاں قیمتاں تے اوہناں دے تقرر دے طریقے کار تے اعتراض توں مگروں ہن حکومت نے ارادہ دتا ہے پئی تیل دیاں کمپنیاں دے منافعے وچ کمی کیتی جاوے گی۔ ایس سلسلے وچ مشیر پٹرولیم ڈاکٹر عاصم حسین نے پارلیمنٹ دی اک کمیٹی دے ساہمنے اپنے لکھے ہوئے بیان وچ کہیا ہے پئی حکومت نے آپوں تیل صاف کر کے کئی شیواں وچ بدلن تے اوہناں نوں ویچن والیاں کمپنیاں دے منافعے نوں جائز پدھر تے لیاون دا فیصلہ کیتا ہے۔
مشیر پٹرولیم موجب ایس سلسلے وچ سرکاری صلاحواں ایس ہفتے لکھ لئیاں جاون گئیاں جیہدے مگروں پٹرول، ڈیزل تے ہور شیواں دیاں قیمتاں وچ اک روپیہ یاں ایہدے توں ودھ کمی دا امکان ہے۔ نویاں قیمتاں ، مشیر پٹرولیم موجب اگلے مہینے توں لگن گئیاں۔
جے انج ہوندا ہے تے پیپلز پارٹی دے دور حکومت وچ دوجی واری سیل دی ترسیل دیاں کمپنیاں دے نفعے وچ بدلی کیتی جاوے گی تے حکومت تقریبا دو سال پہلوں ایہدے وچ وادھے دے اپنے ہی فیصلے نوں واپس لین تے مجبور ہووے گی۔ پر کجھ ماہر ایس موقعے تے سوال چکدے نیں پئی ملکی معیشت بارے اینے اہم فیصلے پہلوں غیر سرکاری لوکاں تے ہن عدالت دے دبا دے تت وچ کیتے جاون پاروں کیہ معاشی حکمت توں ویہلے تے وقتی قسم دے نہیں ہوون گے؟
