یورپی یونین نے پاکستان نوں جھبدے وپاری رعایتاں دین توں نانہہ کر دتی

یورپی یونین نے پاکستان نوں جھبدے وپاری رعایتاں دین توں انکار کردیاں ہوئیاں دسیا پئی یورپی منڈیاں تیکر بہتی اپڑ لئی اسلام آباد نوں اک توں تن سال اُڈیکنا پوے گا۔ یورپی کمیشن دے صدر جوزمینول نے جمعے نوں برسلز وچ وزیر اعظم سید یوسف رضا گیلانی نال ملنی توں مگروں نیوز کانفرنس نال خطاب کردیاں ہوئیاں کہیا پئی ورلڈ ٹریڈ آرگنائزیشن دے قانوناں ہیٹھ یورپی یونین کسے ملک نوں دوجیاں توں وکھریاں رعایتاں نہیں دے سکدا۔

اوہناں کہیا یورپی منڈیاں تیکر اپڑ لئی پاکستان نوں اک توں تن سال تیکر اُڈیکنا پوے گا۔پاکستان دی ویہہ فیصد توں بہتیاں برآمداں یورپی ملکاں وچ جاندیاں نیں جدوں کہ یورپی یونین تے پاکستان وچکار دوہواں پاسیاں دا وپاری حجم ست ارب یورو دے نیڑے نیڑے ہے۔ یورپی یونین نے 2011-13 لئی ترقیاتی فنڈ نوں وی ودھا کے 75 ملین یورو کر دتا ہے۔ جوزمینول موجب دہشت گردی توں متاثرہ صوبہ خیبر پختونخواہ نوں ٹرسٹ فنڈ وچ 69 ملین یورو دتے جان گے۔ یورپی یونین نے سوات آپریشن پاروں بے گھر ہون والے جیاں دی امداد لئی 149 ملین یورو دی امداد دا اعلان کیتا سی۔