Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> معیشت تے بیوپار >> ٹیکس چور تے ایگزٹ کنٹرول لسٹ

ٹیکس چور تے ایگزٹ کنٹرول لسٹ

جمیل احمد پال
May 4th, 2014

ایف بی آر نے 159 ارب رُپئے توں ودھ واجبات دی وصولی لئی ٹیکس چوراں تے نادیہندڑاں دے ناں ایگزٹ کنٹرول لسٹ وچ شامل کروان لئی غور شروع کر دتا اے‘ نان فائلرز دا کمپیوٹرائزڈ قومی شناختی کارڈ بلاک کرن دی وی تجویز اے۔ دسیا گیا اے کہ وار وار مہلت دین دے باوجود این ٹی این حاصل نہ کرن والے قابل ٹیکس آمدن رکھن والے لوکاں خلاف وی کارروائی کرن بارے غور کیتا جا رہیا اے۔
کسے وی مہذب معاشرے اندرٹیکس نہ دین بارے سوچیا وی نہیں جا سکدا۔ ٹیکس نہ دینا قتل ورگا جرم سمجھیا جاندا اے جہنوں کوئی وی نہیں کردا۔ ایہو کارن اے کہ یورپی ملکاں وچ لوکاں دی ادھی آمدن ٹیکس وچ نکل جاندی اے پر اوہ فیر وی مطمئن ہوندے نیں کہ ایس ٹیکس دے نتیجے وچ حکومت اوہناں نوں سہولتاں تے مراعتاں دیندی اے۔ روٹی کپڑے ‘ رہایش ‘ تعلیم تے علاج دِیاں سہولتاں حکومت دے ذمے ہوندیاں نیں۔ جے نوکری جاندی رہوے تاں حکومت ای بے روزگاری الاؤنس دے کے بھکھے مرن توں بچاندی اے۔ حکومت سڑکاں تے پارکاں نوں بہترین حالت وچ رکھدی اے تے اپنے لوکاں نوں ہر اوہ سہولت دیندی اے جہڑی اوہ منگدے نیں۔
دُوجے پاسے پاکستان وچ جہی رُوح تہے فرشتے ورگی صورتحال اے۔ جے حکومت نالائقی دے اعلا ترین منصب اُتے کھلوتی ہوندی اے تاں لوک وی بے ایمانی دے ایسے منصب اُتے نیں کہ اوہ ٹیکس دین توں کنی کتراندے نیں۔ کرپشن دا ایہہ حال اے کہ محکمے دے انسپکٹراں نوں تھوڑا بہت دے دوا کے خلاصی کرا لئی جاندی اے تے ٹیکس دین دا ناں وی نہیں لیا جاندا۔ ایس حمام وچ اُتلی سطح دے حکمراناں توں لے کے تھلویں سطح دی لوکائی تیکر‘ سبھ ننگے نیں۔ حکمراناں دے ٹیکس دین بارے میڈیا وچ خبراں آوندیاں رہندیاں نیں کہ اوہناں نے کنا ٹیکس دِتا۔ بعض دا تاں ایہ حال اے کہ اوہناں دی ’’غربت‘‘ ویکھدے ہویاں اوہناں نوں کجھ دے دوان نوں دِل کردا اے۔
ایف بی آر دے سیانیاں نے ٹیکس نادیندڑاں دا ناں ایگزٹ کنٹرول لسٹ وچ شامل کرن دا فیصلہ کجھ سوچ سمجھ کے ای کیتا ہووے گا پر ایہ گل سبھ نوں پتا اے کہ پورا ملک ای ٹیکس نہیں دیندا جد کہ پورا ملک باہر نہیں جاندا۔ جہناں نے باہر جانا ای نہیں‘ اوہناں دا ناں ایس لسٹ وچ شامل کرن دا فایدا کیہ ؟ گویا ایس لمی چوڑی کھیچل دے بعد نرا پنج ست فیصد لوکاں دے متاثر ہون یاں اوہناں اُتے کجھ دباء پین دا امکان اے۔
ضرورت لسٹاں تیار کرن دی نہیں‘ ملک وچ ٹیکس ادائی کلچر پیدا کرن دی اے۔ لوک مسیتاں وچ لکھاں رُپیا دان دے دیندے نیں‘ ہزار رُپیا ٹیکس کیوں نہیں دیندے‘ ایہدے بارے سرکار نوں گوہ کرنا چاہیدا اے۔ لوکائی دا دِتا ٹیکس جے لوکائی اُتے لگدا وی نظر آوے‘ اُتلی سطح دے وڈیار جے ایمان داری نال ٹیکس ادا کرن‘ ٹیکس دی شرح وی کھل لاہن دی بجائے مناسب ہووے تاں شاید کجھ بہتری دی صورت نکل سکدی اے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels