گذریل حکومت دیاں پلیسیاں الٹ کے کم بنے گا: وزیر خزانہ اسحق ڈار

پاکستان وچ بنن والی نویں حکومت دے نامزد وزیر خزانہ اسحق ڈار نے آکھیا ہے جو پچھلی حکومت دی اقتصادی پلیسیاں داپاسا الٹ کے ہی معیشت چنگی ہو سکدی ہے۔ اوہ ایتوار نوں لہور دے نیڑے رائے ونڈ وچ پاکستان پیپلز پارٹی دے شریک چیئر مین آصف علی زرداری تے پاکستان مسلم لیگ ن دے آگو نواز شریف دی سانجھی پریس کانفرنس وچکار اک سوال دا جواب دے رہے سن۔

پاکستانی معیشت بارے تبصرہ کردیاں ہوئیاں اسحق ڈار نے آکھیا پچھلے پنجاں ورہیاں وچ جنے بجٹ آئے ہین اوہ امیراں لئی سی تے، اوہناں موجب، عام بندے دا خیال نہیں رکھیا گیا سی، زراعت نوں چھڈ کے موبائل ٹیلی فون،ا ئیر کنڈیشنر تے گڈیاں تے توجہ دتی گئی۔

اوہناں دا آکھنا سی جو اگلے کجھ دناں وچ آگواں نے ہدایت دتی ہے جو دس دناں دے وچ اسیں بیلنس شیٹ تیار کراں گے۔چیتے رہوے جو ہفتے نوں قومی اسمبلی وچ نویں چنے وزیر اعظم نے حکومت دے پہلے سو دناں دیاں ترجیحاں بیان کردیاں ہوئیاں عوامی بھلیائی دے کئی کم کرن دا اعلان وی کیتا سی جنہاں دا عام لوک بوہت محتاط انداز وچ خیرمقدم کر رہے ہین۔ جنہاں لوکاں نال گل بات کیتی گئی اوہناں دا آکھنا سی کیوں جو پچھوکڑ وچ لوکائی نال حکومتاں دے وعدیاں دا ریکارڈ چنگا نہیں رہیا، ایس لئی ایس حوالے نال ڈر ہمیش ساہمنے رہندے ہین۔

مشہور تجزیہ کار مجیب الرحمن شامی دا آکھنا سی جو لوک ہن حکومت دیاں پلیسیاں تے اوہناں تے عملدرآمد دا غور نال جائزہ لیندے رہن گے، کیوں جو اوہناں موجب، ایس دور وچ لوکائی نوں مورکھ نہیں بنایا جاسکدا۔