اسٹیٹ بینک نے آکھیا ہے جو حکومتی قرضے ریکارڈ پدھر تے اپڑ گئے ہین مالیاتی خسارے ودھ گئے جدوں کہ مہنگائی نو فیصد ودھن دا امکان ہے۔ مالی سال وچکار جی ڈی پی دا ہدف حاصل نہیں کیتا جا سکے گا جدوں کہ افراط زر دی شرح چھ اعشاریہ پنج فیصد دے مقابلے وچ اٹھ توں نو فیصد تیکر رہوے گی۔
ایہہ گل اسٹیٹ بینک ولوں جاری دوجی سہ ماہی دی رپورٹ دو ہزار ست توں اٹھ وچ آکھی گئی جیہڑی پیر نوں جاری کیتی گئی۔ رپورٹ موجب جولائی توں دسمبر دو ہزار ست وچکار معاشی صورتحال ماڑی رہی۔ وڈیاں صنعتاں دی پیداوار جیہڑی پچھلے مالی سال دی ایسے مدت دے مقابلے وچ وڈیاں صنعتاں دی پیداوار اٹھ اعشاریہ تن فیصد توں گھٹ کے چار اعشاریہ پنج فیصد، ٹیکس ریونیو پنجھی اعشاریہ اک فیصد توں گھٹ کے دس اعشاریہ چھ فیصد، افراط زر دی شرح ست اعشاریہ ست فیصد توں ودھ کے اٹھ اعشاریہ چار فیصدہو گئی۔
ایسے مدت وچکار تجارتی خسارہ جی ڈی پی دا چھ اعشاریہ دو فیصد توں ودھ کے ست اعشاریہ نو فیصد، مالیاتی خسارہ اک اعشاریہ نو فیصد توں ودھ کے تن اعشاریہ چھ فیصد تے کرنٹ اکاؤنٹ دا خسارہ تن اعشاریہ چھ فیصد توں ودھ کے جی ڈی پی دا چار اعشاریہ اٹھ فیصد ہو گیا ہے۔ بینکاں ولوں نجی شعبے نوں دتے جاون والے قرضے دی شرح وچ زیرو اعشاریہ پنج فیصد دا وادھا ہویا جیہڑا گیاراں اعشاریہ دو فیصد توں ودھ کے گیاراں اعشاریہ ست فیصد ہو گئی جدوں کہ توسیع زر اٹھ اعشاریہ ست فیصد توں گھٹ ہو کے ست اعشاریہ اک فیصد تے آگئی۔ سمندر پار پاکستانیاں ولوں گھلے جاون والے زرمبادلہ دی مالیت تن ارب توں ودھ کے تن اعشاریہ چھ ارب ڈالر ہو گئی۔
رپورٹ وچ آکھیا گیا ہے جو ودھدے ہوئے معاشی عدم توازن اُچیچا مالیاتی تے جاری حساباں دے خساریاں دے کارن معاشی گنجل پیدا ہو رہے ہین تے گرانی دا دبا ودھ رہیا ہے۔ دوجے پاسے بین الاقوامی قرضہ منڈی وچ جاری ہلچل دے اثراں توں پاکستانی معیشت بوہتا محفوظ رہی ہے۔ مالی سال دوہزار اٹھ دی پہلی ششماہی وچ مالیاتی خسارے وچ وادھا پچھلے سال توں بوہتی چنتا رکھدا ہے۔ مالیاتی خسارے دی وجہ نال مجموعی طلب ودھدی ہے جیس نال سدھا ساہواں زری جتھیاں وچ وادھا ہویا تے گرانی دا دبا ودھ گیا۔ زرعی پربندھ وچ گنجل ہوئے تے جاری حساباں دے خسارے ودھے۔
رپورٹ وچ آکھیا گیا ہے جو ادھ فروری دو ہزار اٹھ تیکر ملن والیاں رپورٹاں توں ظاہر ہندا ہے جو زراعت دے شعبے وچ مالی سال دے وچکار مناسب نمو دا امکان ہے تاں جو سال لئی چار اعشاریہ اٹھ فیصد نمو دا ہدف حاصل کرنا اوکھا نظر آوندا ہے۔ پاکستان دے وڈے پیمانے دی شیواں بناون دے شعبے نوں مالی سال دو ہزار اٹھ دے مڈھ توں ہی اوکڑاں دا ساہمنا ہے۔ پچھلے ورہیاں دی شاندار کارکردگی دے مقابلے وچ سست رفتار نمو دا کارن ملکی تے غیر ملکی عوامل بنے ہین۔ اہناں عوامل وچ عالمی گرانی ، ملک وچ توانائی دے مسئلیاں تے (اُچیچا ٹیکسٹائل دیاں برآمدات دی ) طلب وچ کمی شامل ہے۔ ستائی دسمبر دو ہزار ست دے واقعے توں مگروں ہوون والے معاشی نقصاناں توں سالانہ ہدف پورا ہوون دے امکان ہور گھٹ ہو گئے ہین۔ مجموعی طور تے مالی سال دو ہزار اٹھ دی پہلی ششماہی وچکار وڈے پیمانے دی اشیاء سازی وچ سست رفتاری پندراں توں گیاراں صنعتی گروپاں وچ پائی گئی۔
رپورٹ موجب خدمتاں دے شعبے دے بوہتے اظہاریئے مالی سال دو ہزار اٹھ دے مڈھلے مہینیاں وچ مستحکم نمو دی عکاسی کردے ہین۔درآمدات وچ واہوا وادھے دی وجہ توں تھوک ترے خوردہ فروشی ( خدمتاں دے شعبے وچ جیس دا حصہ ادھے توں بوہتا ہے) دے شعبے دی کاکردگی چنگی ہوون دا امکان ہے۔
ایس ذیلی شعبے نوں ملکی تے غیر ملکی اسٹوراں دے ودھدے ہوئے سلسلے توں وی فیدا ہوون دی آس ہے، رپورٹ موجب ایس مالی سال دو ہزار ست اٹھ وچکار جی ڈی پی دی شرح چھ اعشاریہ صفر صفر توں چھ اعشاریہ پنج فیصد دے وچکار رہوے گی۔ اسٹیٹ بینک موجب ملکی معیشت حالی وی ملکی تے بین الاقوامی دھچکے جھلن دی خوبی دا وکھالا کر رہی ہے۔بھاویں اینا دھچکیاں دے نقصان ہوئے ہین تاں جو ایس دے مگروں وی مالی سال دو ہزار ست توں اٹھ وچکار معیشت دی نمو چنگی رہوے گی۔
رپورٹ موجب کرنٹ اکاؤنٹ بیلنس منفی پنج اعشاریہ تن فیصد توں ودھ کے منفی چھ فیصد ہوجاوے گا جدوں کہ ایس دا ہدف منفی پنج اعشاریہ صفر صفر فیصد رکھیا گیا ہے۔ انج بجٹ توازن وی منفی چار اعشاریہ تن فیصد توں ودھ کے منفی پنج اعشاریہ دو فیصد ہو گئی جدوں کہ سمندر پار پاکستانیاں ولوں گھلے جاون والے زرمبادلہ ہدف پنج اعشاریہ اٹھ ارب ڈالر دے مقابلے وچ چھ توں چھ اعشاریہ پنج ارب ڈالر تیکر ہو جاوے گا۔
