عراق تے افغان جنگ نے امریکی معیشت نوں ڈوب دتا:ورلڈاکنامک رپورٹ

عراق تے افغان جنگ نے امریکی معیشت نوں ڈوب کے رکھ دتا ہے ورلڈ اکنامک رپورٹ موجب امریکی بینکاں نوں ڈیڈھ سو ارب ڈالر دے خسارے دا ساہمنا ہے جدوں کہ ایہہ خسارہ پنج سو ارب ڈالر تیکر اپڑ سکدا ہے جیس دی وجہ نال افراط زر وچ وی کالھی نال وادھا ہوندا جا رہیا ہے۔

وسیلیاں موجب ایس بحران دے اثر ہور ملکاں نوں وی اپنی لپیٹ وچ لین دا موجب بن دے جارہے ہین کیوں جو ایس مالی بحران نے پہلے مرحلے وچ تن یورپی بنکاں نوں دیوالیہ کر دتا ہے، دوجے پاسے امریکی کمپنیاں تے بنکاں نے اپنے نوکراں دی گنتی وچ کمی کرنا شروع کر دتی ہے جیس دی وجہ توں لکھاں بندے بے روزگار ہورہے ہین۔

رپورٹ موجب صرف سٹی بنک نے چالی ہزار توں بوہتے بندیاں نوں ویہلا کر دتا ہے۔ جدوں کہ حیران کن پدھر تیکر پیداوار وچ کمی ہوونا شروع ہوگئی ہے۔ یورپی یونین وی امریکہ دے مالیاتی بحران دے اثراں نوں گھٹ کرن دیاں کوششاں کر رہیا ہے ایسے تناظر وچ فرانس دے صدر نکولس سرکوزی نے تعلیم، صحت، تے ہاؤسنگ دے بجٹ وچ واہوا کمی کر دتی ہے۔

رپورٹ موجب مالی بحران نال جاپان ، جنوبی کوریا تے بھارتی کمپنیاں تے وی بوہت اثر پے رہیا ہے۔ ایس توں وکھ جے افغان جنگ وچ امریکی اتحادیاں نے وعدے موجب فنڈ نہ دتے تے جنگ دے مطلوبہ مقصداں دے حاصل وچ التوا تے عالمی امن لئی خطرے وچ وادھا وی ہوسکدا ہے۔