زرمبادلہ دے ذخیریاں تے زبردست دبا،پنجاں مہینیاں وچ تن ارب ڈالر دی کمی

ایس مالی سال وچکار پاکستان دے زرمبادلہ دے ذخیریاں تے دبا مسلسل ودھ رہیا ہے تے پچھلے پنجاں مہینیاں وچکار اہناں ذخیریاں وچ تن ارب ڈالر توں بوہتی کمی ریکارڈ کیتی گئی ہے۔ سٹیٹ بینک ولوں ذخیریاںولوں جاری کیتے گئے حساب موجب اُنتی مارچ تیکر ذخیرے گھٹ ہو کے تیراں ارب ستائی کروڑ ڈالر رہ گئے ہین جدوں کہ نومبر دو ہزار ست وچ زرِمبادلہ دے ذخیریاں دا حجم سولاں ارب سینتی کروڑ ڈالر سی۔

ذخیریاں وچ کمی وی وڈی وجہ کرنٹ اکاؤنٹ دا ودھدا ہویا خسارہ ہے جیہڑا تجارتی خسارے دا تت ہے۔حکومت نوں باہرلیاں ادائیگیاں لئی اپنے ذخیریاں نوں ورتنا پے رہیا ہے کیوں جو روایتی وسیلیاں توں جیہڑیاں رقماں پاکستان نوں لبھ رہیاں سن ایس عرصے وچ اوہ وی گھٹ ہو گئیاں ہین۔ سوائے باہرلے ملک وسنیک پاکستانیاں ولوں گھلیاں جاون والیاں رقماں جیس وچ اِکی فیصد دی شرح توں وادھا ریکارڈ کیتا گیا۔

برآمدات آس دے مطابق نہیں ودھ رہیاں ہین تے غیر ملکی سرمایا کاری وی گھٹ ہے جدوں کہ ملکی تے عالمی مالیاتی حالات دی وجہ توں پاکستان دے نجکاری دا عمل وی ایس سال ڈھلا ہے۔

پاکستان کئی وڈے اداریاں دے جی ڈی آر جاری کرن توں وکھ بین الاقوامی منڈی وچ بانڈز دے اجرا دا وی ارادہ رکھدا ہے۔ پر حالی تیکر ایس پاسے کوئی ٹھوس پیش رفت نہیں ہوئی جدوں کہ تیل دیاں قیمتاں وچ وادھے کارن تیل دی درآمدی توازن دا رجحان برقرار رہیا۔ زرمبادلہ دے ذخیریاں تے دبا پاروں پاکستانی روپئے دی قدر وی متاثر ہو رہی ہے۔

وائس آف امریکہ دے شکرئیے نال