حکومتی قرضے ودھ، سٹیٹ بینک نوٹ چھاپی جا رہیا ہے، شوکت عزیز دے کُوڑے آنکڑے
وچار ڈیسک
April 10th, 2008
اسٹیٹ بینک توں حکومتی قرضے باراں گنا ودھن مگروں 409 ارب 34 کروڑ دی ریکارڈ پدھر تے اپڑ گئے ہین۔ اسٹیٹ بینک نے دسیا ہے کہ جولائی 2007 توں مارچ 2008 تیکر حکومت نے بینک کولوں 409 ارب دے نویں قرضے لئے جیہدے نال اسٹیٹ بینک کولوں لئے گئے حکومتی قرضے 754 ارب توں ودھ گئے ہین۔
حکومتی قرضیاں وچ وادھے پاروں اسٹیٹ بینک نے 151 ارب 85 کروڑ دے نویں نوٹ چھاپ کے بینکاں نوں دتے ہین۔ معاشی سوجھواناں دا آکھنا ہے کہ ملک وچ ورتے جاون والے کرنسی نوٹ معاشی کار ویہار توں بوہت ودھ ہے جیہدے نال مہنگائی بڑی چھیتی ودھ رہی ہے۔
کل اک پریس کانفرنس وچ وزیر خزانہ اسحق ڈار نے پچھلی حکومت دے اقتصادی ترقی بارے دتے گئے آنکڑیاں نوں کُوڑ آکھدیاں دسیا سی کہ اجوکی حکومت کجھ کرڑے پربندھ کر کے معیشت نوں چھیتی سنبھال لوے گی۔ بینکاں کولوں قرضے لین دا کم گھٹایا جاوے گا۔ اوہناں آکھیا کہ جدوں تیکر حکومت لوکائی نوں اصل گل نہیں دسے گی مسئلیاں دا حل نہیں نکلے گا۔
پچھلی حکومت ولوں قرضیاں دے ٹھوٹھے توڑن دے دعویاں نوں رد دیاں اوہناں نے آکھیا کہ پچھلی حکومت نے ٹھوٹھا بھن کے دیگ چُک لئی سی۔ اوہناں آکھیا کہ 1947 توں لے کے 1999 تیکر 2946 ارب دے قرضے لئے گئے جدوں کہ 1999 توں لے کے 2008 تیکر 2749 ارب دے قرضے لئے گئے۔
وزیر خزانہ نے دسیا کہ تیل دی عالمی قیمتاں وچ ات دے وادھے مگروں وی پچھلی حکومت نے ایہدے لئی کوئی فارمولا نہیں بنایا جیہدے نال اجوکے بجٹ وچ پیٹرول دیاں وستاں تے 138.6 ارب دی سبسڈی رکھی گئی ہے۔
