پی ٹی سی ایل دا لوکاں دیاں جیباں تے 3.42 بلین دا ڈاکہ
وچار ڈیسک
April 17th, 2008
پاکستان ٹیلی کمیونیکیشن کمپنی (PTCL) نے دسمبر 2007 وچ سارے ملک دیاں ٹیلی فون لائناں تے لوکاں دی مرضی پُچھے بنا ای 'پاکستان پیکج' لا کے 3.42 بلین روپیئے دی کھٹی کیتی اے۔ ایہہ گل کمپنی دے ریوینیو آنکڑیاں وچ پتہ لگی ہے۔ آنکڑے دسدے ہین کہ لوکاں دی مرضی توں بنا ای اوہناں دیاں جیباں تے 958 ملین دا ڈاکہ ماریا گیا۔
آنکڑیاں تے گوہ کرو تے پتہ لگدا ہے کہ پی ٹی سی ایل دے لینڈ لائن ورتن والیاں نے .48 بلین وادھو سینٹرل ایکسائز ڈیوٹی بھری جیہڑی ہر بل تے لائی گئی سی۔ پی ٹی سی ایل نے 'پاکستان پیکج' ناں دی اک سکیم دا دھوکھا دے کے بھولے لوکاں نوں پھسایا جیہدے وچ 200 روپیئے بدلے پورے پاکستان وچ کال کرن لئی 500 منٹ دتے گئے۔ پی ٹی سی ایل نے لوکاں توں پچھے بنا ای اپنی مرضی نال ہر ٹیلی فون تے یکم دسمبر 2007 نوں ایہہ پیکج لا دتا تے ارباں روپیئے کمائے۔
پاکستان ٹیلی کمیونیکیشن اتھارٹی نے کمپنی نوں آکھیا سی کہ جیہڑے لوکاں دا بل مہینے وچ 200 روپیئے توں ودھ نہیں ہندا اوہناں کولوں ایہہ وادھو دا 200 روپیئہ نہیں لیا جاوے گا پر پی ٹی سی ایل نے ایس حکم نوں کسے کھاتے نہ لکھیا تے ہر ٹیلی فون ورتن والے بندے کولوں 200 روپیہ وصول لیا۔
وسیلیاں دا آکھنا ہے کہ پی ٹی سی ایل نے ایس پیکج نوں مکاؤن لئی عرضی دیون والی جیہڑی ٹیلی فون لائن دتی سی اوہ کدے وی کسے نوں ویہلی نہیں ملی۔ اوہناں دا آکھنا ہے کہ 'پاکستان پیکج' ہٹاؤن لئی پی ٹی سی ایل دے دفتراں دے باہر لگیاں لوکاں دیاں لمیاں لائناں توں پتہ لگدا ہے کہ ایہہ سکیم ناکام ہو گئی ہے۔ پر پی ٹی سی ایل دا ریوینیو بوہت ودھ گیا ہے۔
ریوینیو ودھن تے 'پاکستان پیکج' نال لوکاں نوں ہوون والی اوکھت توں بے خبر پی ٹی سی ایل دے بلارے جواد حسین دا آکھنا ہے کہ لوکاں نے ایس پیکج نوں بوہت سلاہیا ہے۔ اوہدا آکھنا ہے کہ لوکاں نوں جیویں جیویں ایس پیکج بارے پتہ لگ رہیا ہے لوک ایہنوں دھڑا دھڑ لے رہے ہین۔ نال اوہنے ایسی کسے وی اوکڑ دی خبر نوں رد کر دتا جو کسے بندے نوں ایہہ پیکج مکاؤن لئی ہندی ہے۔
