چین پاکستان دے کرنٹ اکاؤنٹ خسارے نوں پورا کرن لئی پنج سو ملیں ڈالر دا آسان شرطاں تے قرضہ دے رہیا ہے۔ چیتے رہوے کرنٹ اکاؤنٹ خسارہ اودوں ودھدا ہے جدوں باہروں منگوایاں وستاں دا مل برآمد کیتیاں وستاں توں ودھ ہووے۔
پاکستان دے وزیر خارجہ نے جمعرات نوں دسیا جو ایس دا فیصلہ صدر مشرف دے دورے دوران ہویا۔ پاکستان دے وزیر خارجہ نے ایہہ وی دسیا جو ایس دورے وچ بیوپار، پاور تے انرجی دے دوجے دو پکھی معاملیاں تے وی گل بات ہوئی ہے۔
پاکستان دی نویں حکومت آؤندیاں ہی معاشی مسئلیاں وچ پھس گئی ہے۔ پچھلے ہفتے وزیر مالیات اسحاق ڈار ہوراں دسیا جو پچھلیاں اٹھ مہینیاں وچ بجٹ دا خسارہ قومی پیداوار دا چار اعشاریہ ست فیصد ہو گیا ہے جد کہ پچھلے پورے سال دا کل خسارہ قومی پیداوار دا چار اعشاریہ پنج فیصد سی۔
ایسے طرحاں پہلے اٹھاں مہینیاں وچ کرنٹ اکاؤنٹ دا خسارہ قومی پیداوار دا پنج اعشاریہ تن فیصد ہو گیا ہے جد کہ پچھلے پورے سال دا خسارہ چار اعشاریہ اٹھ فیصد سی۔ سٹیٹ بیک دی پیش گوئی ہے جو ایس سال دا یہہ خسارہ چھ فیصد ہووے گا۔
