امریکہ وچ غریباں تے امیراں وچکار فرق ودھدا ای جا رہیا ہے۔ اک نویں رپورٹ موجب ایس ویلے جدوں امریکی معیشت مندے حالاں وچ ہے، امیراں تے غریباں وچکار پاڑ بوہت ودھدا جا رہیا ہے۔ امیر پہلے نالوں وی ودھ امیر تے غریباں لئی اجوکی معاشی صورتحال وچ گزارہ کرنا ہور وی اوکھا ہو گیا ہے۔
1990 دے دہاکے دے اخیر تے بوہت گھٹ آمدن والے گھراں دی آمدن وچ 2.5 فیصد جدوں کہ اُچے گھراں دی آمدن وچ 9.1 فیصد وادھا ہویا ہے۔ اکنامک پالیسی انسٹی ٹیوٹ موجب اُتلے میل (امیر طبقہ) دے ٹبراں وچوں 5 فیصد دی اوسط سالانہ آمدنی ہیٹھلے 20 فیصد میلاں دے مقابلے 12 گنا ودھ ہے۔
رپورٹ وچ دسیا گیا ہے کہ 1980 دے دہاکے توں 87 ریاستاں وچ غریباں اتے امیراں وچکار پاڑ ودھن دا سلسلہ حالے وچ چل رہیا ہے ایہدے وچ کوئی فرق نہیں آیا۔ اج جدوں امریکہ دی معیشت تباہ ہوئی پئی ہے، امیری تے غریبی دا پاڑ بوہت اُگھڑواں ہو گیا ہے۔
