پاکستان تے ہندوستان نے گیس پائپ لائن دا جھیڑا نبیڑ لیا
وچار ڈیسک
April 25th, 2008
پاکستان تے ہندوستان نے اج جمعے دے دیہاڑے پاکستان راہیں ایران توں ہندوستان تیکر جاون والی گیس پائپ لائن منصوبے وچ اڑیچاں نوں نبیڑ لیا ہے۔ ایہہ گل اک پاکستانی بلارے نے میڈیا نوں دسی ہے۔پاکستان دے پیٹرولیم دے وزیر خواجہ آصف نے اک پریس کانفرنس وچ آکھیا ہے کہ '' ایس منصوبے دے مُڈھلے معاملیاں بارے سمجھوتہ ہو گیا ہے''۔ اوہناں آکھیا کہ ایس منصوبے راہیں دوہیں دیس اپنیاں گیس دیاں لوڑاں پوریاں کر سکدے ہین تے نال ای دوہاں دے معاشی سانگے وچ پکے ہوون گے۔
ہندوستان دے پیٹرولیم دے وزیر مُرلی دیورا نے آکھیا ''اسیں ایس گل تے سہمت ہاں کہ ایس منصوبے تے گل بات راہیں ہوون والے فیصلیاں تے چھیتی عمل کیتا جاوے۔
ایران پاکستان ہندوستان گیس پائپ لائن جیہنوں امن دی پائپ لائن وی آکھیا جاندا ہے، ایہہ اک 2775 کلومیٹر لمی پائپ لائن دا منصوبہ ہے جیہدے راہیں ایران توں قدرتی گیس پاکستان تے ہندوستان نوں پچائی جاوے گی۔ ایس منصوبے وچ واہوا کویل ہو گئی ہے تے ایہدے تے گل بات 1994 توں چل رہی ہے۔ ورھے 2007 دے وچکار ایس گل بات نوں ڈکا لگ گیا سی جدوں ہندوستان نے ایس منصوبے بارے پاکستان تے ایران نال گل بات کرن توں نانہہ کر دتی سی۔
ایس منصوبے دی لاگت 7.5 بلین امریکی ڈالر دسی جاندی ہے۔
