پردیسیاں نوں جمہوری حکومت دا تحفہ: بین الاقوامی کالاں تے انھے واہ ٹیکس

ہر دور حکومت وچ سمندر پار پاکستانیاں تے کسے نے کسے صورت چھری پھیرن دا رواج عام ہے۔ پیپلز پارٹی تے مسلم لیگ ن دی مخلوط حکومت وی کسے توں گھٹ نہیں۔ حالی حکومت بنیاں مساں ڈیڈھ مہینہ ای ہویا اے تے جمہوری حکومت نے سمندر پار وسدے پاکستانیاں نوں ٹیلی فون کالاں تے کئی گنا ودھ ٹیکس لا کے پہلی سوغات دتی ہے۔

پچھلے کجھ ورھیاں وچ سمندر پار تے خاص طور تے امریکہ وچ رہندے پاکستانی ہزاراں میل دور بیٹھے جیہڑی سوکھت نال اپنے عزیزاں تے پیاریاں نوں فون کر لیندے سی پاکستانی حکومت ولوں امریکہ توں پاکستان کیتیاں جاون والیاں کالاں تے 10 سینٹ فی منٹ دا وادھا کر دتا گیا ہے جیہدے نال فون کال دے ریٹ ودھ گئے نیں۔ جیہڑی کال چار سینٹ فی منٹ ہندی سی ہن اوہ 14 توں 16 سگوں 20 سینٹ فی منٹ پیندی اے۔

ایس گل نے پاکستانیاں نوں فکراں وچ پا دتا ہے۔حکومت پاکستان ولوں ایس ٹیکس مگروں کئی ٹیلی کام کمپنیاں اتے فون کارڈ دا وپار کرن والیاں نے وی منٹاں وچ بوہت گھاٹا کر دتا ہے۔ مثال دے طور تے دو ڈالر دے کارڈ نال سٹھ توں لے کے اک سو ویہہ منٹ گل ہو جاندی سی ہن اوسے کارڈ نال اُکا 20 توں 22 منٹ گل ہندی اے۔ جیہڑیاں ٹیلی کام کمپنیاں سو ڈالر وچ 36 گھنٹے گل کرواندیاں سی اوہ ہن 12 گھنٹیاں تے آ گئیاں نیں۔

لانگ ڈسٹنس کمپنیاں دا آکھنا ہے کہ ایہو جہیا اقدام کجھ چر پہلاں بنگلہ دیش نے وی کیتا سی۔ دو مہینے بعد امریکہ نے بنگلہ دیش توں امریکہ کیتیاں جاون والیاں کالاں تے 32 سینٹ فی منٹ ٹیکس لا دتا جیہنے بنگالی حکومت نوں ہلا کے رکھ دتا۔ فیر بنگلہ دیش نے امریکہ دا منت ترلا کر کے معاملہ نبیڑیا۔ ماہرین دا آکھنا ہے کہ پاکستان نال وی ایہو کجھ ہوون والا ہے۔ امریکہ پاکستان تے تن گُنا بوہتا ٹیکس لا سکدا اے جیہدے نال پاکستان توں امریکہ کیتیاں جان والیاں کالاں دا ریٹ بوہت ودھ سکدا ہے جیہدے نال حکومت پاکستان لئی بڑیاں اوکڑاں ہو سکدیاں نیں تے ایہنوں لوکاں دے غصے دا ساہمنا کرنا پے سکدا اے۔ نتیجے وچ پاکستان نوں وی امریکہ دے ترلے کرنے پین گے۔

شکریہ پاکستان پوسٹ نیو یارک